Deskribapena

Bilbo izango da 2025eko urriaren 6tik 10era sareetan aplikatutako ikerketa matematikoari  eskainitako aste nazioartekoaren egoitza, 60 aditu baino gehiago elkartuko dira, eta Euskal Herriko Unibertsitateak (EHU) antolatuko du. Jarduerek telekomunikazioetan, energian, garraioan eta sare  sozialetan aplikazioak aztertuko dituzte, matematikek eguneroko bizitzan duten eragina  nabarmentuz. 

Matematika tresna ezinbestekoa da gure egunerokoan erabiltzen ditugun sareak ulertzeko eta hobetzeko. Haiei esker, posible da telekomunikazio-sare azkarragoak eta seguruagoak diseinatzea, sare elektriko egonkorrago eta jasangarriagoak sortzea, garraio-azpiegitura eraginkorragoak planifikatzea edo baita plataforma digital eta sare sozial orekatuagoak garatzea ere. Eredu matematikoek arazoak aurreikusteko, baliabideak optimizatzeko eta irtenbide berritzaileak proposatzeko aukera ematen dute, herritarren bizi-kalitatean eta enpresen lehiakortasunean eragin zuzena dutelarik.  

Ekimenak bi jarduera nagusi izango ditu:  

1. Sareetan aplikatutako joko-teoriari buruzko VI. ikastaroa (urriaren 6a eta 7a). José Manuel Zarzuelo (EHU), Josu Doncel (EHU) eta Balakrisha J. Prabhu (LAAS-CNRS, Toulouse) irakasleek 10 ordutik gorako prestakuntza aurreratua eskainiko dute joko-teoriak sareen kudeaketan eta optimizazioan dituen aplikazioei buruz.  
2. NetGCoop 2025 nazioarteko kongresua (urriaren 8tik 10era). Frantzia, Italia, Alemania, Estatu Batuak edo India bezalako herrialdeetako ikertzaileak bilduko ditu, eta sareekin lotutako matematiketan —joko-teoria, kontrol-teoria, adimen artifiziala eta optimizazioa— azken aurrerapenak aurkeztuko dituzte. Jarduera nabarmenen artean, hiru nazioarteko adituren hitzaldi nagusiak egongo dira: 

• R. Srikant, Illinois Urbana-Champaign Unibertsitateko katedraduna (AEB) eta c3.ai Digital Transformation Institute-ko zuzendariordea, adimen artifizial aplikatuan mundu mailako erreferentea. 
• Rosa E. Lillo, Madrilgo Carlos III.a Unibertsitateko Estatistikako katedraduna eta IBiDat Institutuko (uc3m-Santander Big Data) zuzendaria, datu-zientzia eta big datan aditua.  
•  Patrick Loiseau, Inria-ko ikerketa-zuzendaria eta École Polytechnique-ko irakaslea (Paris), joko-teorian eta sareen segurtasunean espezializatua. 

“Uste dut jarduera hauetan sortuko den ezagutzaren trukeak sareetan (telekomunikazioak,  elektrizitatea, garraioa...) hobekuntza handia ekarriko duela datozen urteetan”, azpimarratu du Josu Doncel, EHUko irakasle titularra eta jardueren koordinatzailea.