Euskal Herriko Unibertsitateko hiru campusetako Esperientzia Geletako 90 ikaslek parte hartu dute Bilbon antolatutako II. Jardunaldietan, hiria memoria, identitate eta eraldaketaren gune bizi gisa aztergai izan dutela. Bizkaiko Campuseko eta Komunikazioko errektoreorde Estitxu Garaik nabarmendu du beharrezkoa dela hiri bizigarriak sustatzea, bertako bizilagunen premiei erantzuten dietenak eta, era berean, bisitarientzat ere abegikorrak direnak: "Herritarrak desplazatzen ez dituzten hirien aldeko apustua egiten jarraitu behar dugu, aldi berean bisitarientzat ere atseginak izan daitezen."

Jardunaldiak hainbat hitzaldi eta itsasadarrean barrena egindako bisita gidatua izan ditu, hiriaren bilakaera urbanistikoa, paisajistikoa eta soziala lehen eskutik ezagutzeko.