San Mameseko ikasketa amaierako ekitaldian parte hartuko duten ikasleentzako argibideak zabaldu ditu EHUk.

Ikasleak ekitaldian zehar zelaiaren erdian egongo dira. Une oro kamerak eta steadicamek hartuko dituzte ikasleen irudiak, estadioan jarriko diren hiru pantaila erraldoietan erakusteko, eguneko protagonistak baitira eurak.

Orlako irudia erakusteko baimena eman duten ikasleen argazkiak ere erakutsiko dira. Eta, jakinda, senideak eta lagunak ere une horren zain egongo direla, hurrenkera honetan erakutsiko dira pantailetan: 

- Arabako Campusekoak izango dira lehenak erakusten:  Ekonomia eta Enpresa Fakultatea; Farmazia; Hezkuntza eta Kirol Fakultatea; Lan Harremanen eta Gizarte Langintza Fakultatea; Letrak; Medikuntza eta Erizaintza; Ingeniaritza.

- Atzetik joango dira Bizkaiko Campusekoak: Arte Ederrak, Bilboko Hezkuntza Fakultatea; Bilboko Ingeniaritza Eskola; Ekonomia eta Enpresa; Gizarte eta Komunikazio Zientziak; Lan Harreman eta Gizarte Langintza; Medikuntza eta Erizaintza; Zientzia eta Teknologia; Zuzenbidea.

- Eta, ondoren, Gipuzkoako Campuseko ikastegietakoak:  Arkitektura, Ekonomia eta Enpresa; Hezkuntza, Filosofia eta Antropologia; Informatika; Kimika; Medikuntza eta Erizaintza; Psikologia; Ingeniaritza; Zuzenbidea; azkenik, zentro atxikiak eta Esperientzia Gelak.

Ikasleei aitortza

Ekitaldian zehar, fakultate edo ikastegi bakoitzeko dekanoak edo zuzendariak agertokira igoko dira, eta beren fakultateko edo ikastegiko ikasleei zutik jartzeko eskatuko diete. Modu horretan, ikasleak zutik direla, txapelak kentzeko eta airean astintzeko eskatuko zaie, agur eta ospakizun keinu gisa. EHUko ordezkariek argitu dutenez, baina, ez da hori izango txapelak airera botatzeko unea.  Keinu hori ekitaldiaren amaieran egingo da soilik, errektoreak graduatutako ikasle guztiak batera deitzen dituenean. Eta ekitaldia behar bezala garatzeko, ezinbestekoa izango da antolakuntzaren jarraibide guztiak une oro betetzea.

Banda akademikoak eta txapelak jasotzeko ordutegia

Ekitaldiari kolore emango dioten banda akademikoekin batera, kolore bereko txapelak ere jantziko dituzte ikasleek, eta horien banaketa fakultateka egingo da, beren beregi estadioaren kanpoaldean eta ikasleak sartzeko aukeratutako ateen ondoko mahaietan egingo da. Halaber, 16:00etatik photocall guneetan senideekin eta lagunekin argazkiak ateratzek aukera egongo da eta 16:45ean gainerako ikasleek ere izango dute horretarako parada.

Bestalde, ikasleak zelaira sartzeko ordutegia fakultateen eta ateen arabera antolatu da, sarrera erraztu eta arintzeko:

Puntualtasuna eskatzen da.