nireEHU 
TITULUAREN GAKOAK
Ikastaroaren helburu nagusia da profesionalak genero ikuspegian prestatzea, zehazki maskulinitatearen arloan, gizonekin lan egiteari begira, edozein dela ere lan horren nondik norakoa (esku hartze soziala, plangintza, gizarte politika...). Desparekotasunaren agertoki desberdinak erakutsiko dira, eta bereziki azpimarratuko dira maskulinitate hegemonikoak botereari eusteko darabiltzan mekanismoak, eta aparteko arreta emango zaie indarkeria matxista prebenitzeko estrategiei. Nazioartean eta testuinguru kultural desberdinetan garatu diren zenbait ikuspegi eta metodologia ezagutuko ditugu.
Gainera, aztertuko ditugu gizon izate hutsagatik gizonek bakarrik dauzkaten arazoak, ikusiz nola maskulinitatearen eraikuntza jakin bat lotuta egoten den gizarte esklusioko zenbait egoerarekin (hala nola etxe gabetasunarekin, adikzioekin, buruko gaixotasunekin, kartzelarekin etab.).
Prestakuntza espezializatu hau hartzera animatzen bazara, eskuratuko dituzu maskulinitatearen eraikuntza soziala aztertzeko zenbait gaitasun teoriko-praktiko; tresna metodologikoak; gai izango zara genero desparekotasunari eta diskriminazioari lotutako faktoreak aztertzeko eta kritikoki baloratzeko; ezagutuko dituzu honen inguruko aurrerapen nagusiak, politikak eta oztopoak; jabetuko zara gizonen inplikazioak daukan garrantziaz berdintasuna lortzeko bidean; ikasiko duzu genero ikasketei eta maskulinitateari buruzko baliabide bibliografikoak eta intereseko informazioak erabiltzen; eta, gainera, ezagutuko duzu gizonekiko gizarte ekintzaren bidez berdintasuna lantzen duten herri, estatu eta nazioarte mailako esperientzia pila bat.
