Ander Barroso Telekomunikazio Teknologiaren Ingeniaritzako Graduko tituluduna da, eta gaur egun, espezialitate bereko Masterra egiten ari da Eskolan. Saria, telebista digitalek eta azken belaunaldiko mugikorrek etorkizunean erabili beharreko plangintza-irizpideei buruzko ikerketa batez lortu du. Golardo hau Eskolak ematen du urterik urte, telekomunikazio arloko zerbitzuetan espezializatuta dagoen Itelazpi euskal enpresa publikoaren babespean. Barroso, ikasteaz gain, praktikak egiten ari da, Itelazpi Saria eskuratu dion jarduera-eremu berberetan (telebista digitala, telefonia mugikorra eta bestelako sareak eta komunikazio zerbitzuak) diharduen 3dB Consult konpainia bilbotarrean.

Saritutako lanak telebista digitaleko kanalek VHF banda erabiltzea proposatzen du, bereziki gogoan hartuta azken belaunaldiko telefonia mugikorraren banda zabaleko trafikoa telebistak erabiltzeko moduko esparru erradioelektrikoa murrizten ari dela, eta etorkizunean ere prozesu honek aurrera egingo duela. Aurreikuspenen arabera, gailu mugikorretarako banda zabaleko eskaria laukoiztu egin daiteke datozen lau urteotan.

Telebista digitalei esparru erradioelektrikoa murriztu eta mugikorren ordainduzko komunikazio-zerbitzuei ematea da "Dibidendu Digitala" izenaz ezagutzen dugun prozesuaren muina. Estatu espainiarrean, prozesu hau iaz amaitu zen, telebistako kanalek erabiltzen zituzten hainbat frekuentzia azken belaunaldiko 4G telefoniari esleituz, baina litekeena da, epe ertainean, mugikorrek telebista digitalari frekuentzia gehiago "osten" jarraitzea.

Gradu Amaierako proiektuan, Ander Barrosok telebista digitala frekuentzia baxuagoetara eramatea proposatzen du, eta horretarako, VHF banda eskaintzen du alternatiba gisa, oraingo DVB-T ordeztuko duen DVB-T2 estandarrerako, banda-aldaketa horrek dakartzan parametro guztiak aztertuz eta aldaketaren bideragarritasuna frogatzeko kalkulu teoriko guztiak gaineratuz.

Doako hartzea, tarifako megak kontsumitu gabe

Lanean bildutako ondorioen arabera, hasieran, telebista aparatuek deskodegailu berri bat beharko lukete, telebista analogikotik digitalera aldatzean gertatu zen bezalaxe. Baina, aldi berean, mugikorrek eta tabletek telebista seinalea doan hartu ahal izango lukete, Internetera konektatu eta tarifako megak kontsumitu beharrik gabe, baita abian dagoen ibilgailu baten barruan ere, pen drive baten tamainako gailu txiki bat itsatsiz.

"VHF bandako DVT-T2 sareen plangintza-irizpideen azterketa" izenburuko lan hau bederatzi hilabetez osatu du Ander Barrosok, proiektuaren zuzendari izan den Bilboko Ingeniaritza Goi Eskola Teknikoko (UPV/EHU) Pablo Angueira irakaslearen gainbegiradapean.

Saria emateko ekitaldia egin da Eskolako Gradu Aretoan, Eusko Jaurlaritzako Informatika eta Telekomunikazio zuzendari Jaime Domínguez-Macaya, Itelazpiko zuzendari nagusi Juan José Baños eta Eskolako zuzendari Enrique Amezua tarteko direla. Hauxe da Telekomunikazio arloko zerbitzuetan espezializatuta dagoen euskal enpresa publikoak babestutako sariketaren laugarren edizioa, 1.500 euroko dirusaria duena. Ander Barrosok proiektuaren aurkezpena egingo du.