Hitzarmenaren jatorria legez besteko proposamen bat da, Eusko Legebiltzarrak iragan maiatzaren 7ko osoko bilkuran onetsi zuena, zeinetan jasotzen den, halaber, EITBren erreformarako azterketa-batzorde bat. Hitzarmena astearte honetan onetsi du Eusko Legebiltzarreko Mahaiak eta atzo, ostegunean, UPV/EHUk.

Euskal Herriko Unibertsitatearen lanaren helburua ez da izango EITBren erreformarako dokumentu bat prestatzea, baizik eta, eremu akademiaren bitartekoak eta aukerak baliatuz eta ekipo multidiziplinar baten eskutik, ahalik eta partizipazio-prozesu zabalena irekitzea, era guztietara eta inplikatutako sektoreekin gogoeta egiteko EITB euskal korporazio publikoak osatzen duen sistemari buruz eta biltzen dituen hedabideei buruz.

Partizipazioak bost eremu handi hartuko ditu:

• Azterketa eta gogoeta egitea zerbitzu publikoaren helburuei eta misioei buruz.
• EITB aro digitalera eta informazioaren gizartera egokitzea.
• EITBren egitura eta gobernantza-eredua.
• Enpresaren izaera, berrantolaketa eta finantziazio-sistema.
• Ikus-entzunezko euskal sistema. Eboluzioa eta aliantzak.

UPV/EHUko batzordea Gizarte eta Komunikazio Zientzien Fakultateko dekanoak, Simon Peñak, zuzenduko du eta bi hilabete edukiko ditu, bi instituzioek hitzarmena sinatu dutelarik gaurtik kontatuta, partizipazio-metodologiako eredu bat aztertu, diseinatu eta proposatzeko, azterketa-batzorde parlamentarioak erabili ahal izan dezan.