Euskal Herriko Unibertsitateko (EHU) Informatika Fakultateak bere 50 urteko historia ospatu zuen Kursaalean, Donostian, 500 pertsona baino gehiago bildu zituen ekitaldi batean. Fakultateko kidea den Naiara Aginako Bengoak gidatutako ekitaldian azken bost hamarkadetako alderdirik garrantzitsuenak errepasatu ziren, informatikak hasierako txartel zulatuetatik gaur egungo konputazio kuantikoraino izan duen bilakaera barne.

Ekitaldia, ezinbestean, Amarako Merkataritza Eskolako eraikinean izandako hastapenak eta ondorengo lekualdaketa Ibaetako egungo eraikinera gogoratuz hasi zen. Instalazioetatik haratago, ekitaldian, Juan Pablo Fernández Ramírez eta Luisa Solé Simórekin batera, biak Fakultateko historia bizia direnak, ikastegitik igaro diren pertsonak gogoratu zituzten. Ondoren, Nerea Ezeiza Ramos, fakultateko egungo dekanoak hartu zuen hitza, eta ikasketen bilakaera errepasatu zuen, Informatikako Lizentziaturaren garaietatik egungo graduetara arte. Bere hitzaldian, dekanoak euskarazko prestakuntza-eskaintza sartzeko egindako ahalegina nabarmendu zuen, eta baita euskararen presentzia eta protagonismoa ikerketan ere.

Ekitaldiaren erdiko zatian ezusteko bat egon zen. CodeSyntax enpresaren eskutik, Egunean Behin jokoaren garatzaileak, partida oso berezia izan genuen--50 urtean behin--, gaurkotasunari eta Fakultatearen historiari buruzko hainbat galderarekin. Jokoa Ion Lizarazu Arbuluk, ikastegiko ikaslea ohiak, gidatu zuen, CodeSyntaxean bere lankidea den Unai Fernandez Diezekin batera.

Ospakizunaren bigarren zatia Informatika Fakultateko ikerketaren jatorria errepasatuz hasi zen, Alexander Mendiburu Alberroren eskutik. Bertako ikerketa-ildoak hasi zituzten pertsonak gogoratzeaz gain, azpimarratzekoa da lehen doktore-tesiaren aipamena, Francisco Javier Garijo Mazariok 1981ean Fakultatean defendatua. 45 urte igaro diren arren, tesiaren deskribapena ikusita, aurten defendatu dela pentsa genezake. Laburpena aipatuz, tesiak “programak automatikoki sortzeko sistema baten gauzatzea deskribatzen du, adimen artifizialeko teknikak erabiliz".

Bost hamarkada hauetako ikerketaren errepasoa egin ondoren, Maider Azanza Sesék Fakultateko transferentziaz hitz egin zuen. Horretarako, Nerea Larrañaga Sánchez, Jose E. Poza Sanz eta Unai Zabala Cristobal igo ziren oholtzara. Nereak LKS Next enpresako Unibertsitate-Enpresa ikasgelan izandako esperientzia partekatu zuen. Bertan, Gradu Amaierako Lana egin zuen, eta lan horren emaitza enpresan bertan ezartzeko bidean dago gaur egun. Josek, bere aldetik, ekintzailetzarako dei adierazgarria egin zuen, eta Unaik, Fakultateko kidea eta Robotikan adituak, transferentziaren alderdi sozialaren adibidea erakutsi zuen.

Ekitaldiaren azken atalean, Txelo Ruiz Vázquezek eta Olatz Arbelaitz Gallegok Informatika Fakultatearen erronka handienetako bati heldu zioten, teknologia digitalen munduan dagoen genero-desorekari. Hastapenetan, ikastegiko ikasleen erdia emakumeak zirela gogoratuz hasi ziren, baina pixkanaka ehuneko hori jaisten hasi zen. Egoera hori iraultzeko abian jarritako ekimenak ere gogoratu zituzten (adibidez, e-makumeak taldea). Atala etorkizunari begira amaitu zen, HackMorea ekimenaren eskutik. Ekimen horren bidez, Fakultateko ikasleek informatika eskoletara hurbiltzen dute, gazteenen artean teknologia hurbiltzeko eta sustatzeko emakumezko erreferenteen bitartez helburuarekin.

Ospakizuna EHUko Informatika Fakultateak bere lana garatzea posible egin (eta egiten) duten erakundeek babestu zuten. Ekitaldian Joxerramon Bengoetxea Caballero EHUko egungo errektorea, Jon Insausti Maisterrena Donostiako alkatea, Irune Berasaluze Lazkano Gipuzkoako Foru Aldundiko Gobernantza diputatu eta bozeramailea eta Juan Ignacio Pérez Iglesias Eusko Jaurlaritzako Zientzia, Unibertsitateak eta Berrikuntza sailburua izan ziren.

Azken batean, larunbateko ekitaldia ospakizun eta berrelkartzeko ekitaldi bat izan zen, fakultate honetatik igaro diren lankideekin elkartzeko aukera. Orain sortzen den zalantza bakarra da noiz izan beharko lukeen hurrengo ospakizuna. Ohiturei jarraituz, 75. urteurrenean pentsa daiteke, hala ere, badaude beste proposamen batzuk, Jose Pozaren proposamenari jarraituz, gauzak beste modu batera egiteko: EHUko Informatika Fakultatearen 64. urteurrena ospatzea. 14 urte barru arte!