IKASGAIAREN KONPETENTZIA ESPEZIFIKOAK



1. Espainiako ekonomiaren oraingo egoera eta bilakaera deskribatzeko ezinbestekoak diren funtsezko adierazle estatistikoak ulertu eta zehaztasunez interpretatzea.



2. Egiturazko eraldaketa nagusiak identifikatzea, Espainiako ekonomiaren etorkizuneko erronkak azaldu ahal izateko.



3. Espainiar ekonomian gertatzen diren esku-hartze publikoen antolakuntza eta moneta- eta zerga-politika makroekonomikoen funtzionamendu-mekanismoak eta helburuak analizatzea.



4. Estatu Espainiarraren zerga-sistemaren egitura analizatzea (lurraldeak, Itun eta Konbenioaren erregimenak, lotura puntuak, tributu-administrazioak eta erakunde legegileak), egoera bakoitzari aplikagarria zaion legedia modu egokian aukeratzeko.



5. Tributu Lege Orokorraren eta Tributu Foru Arau Orokorren tributu-hiztegia norbereganatzea eta zehaztasunez erabiltzea, euren testuinguruan erabiltzeko eta zergarik garrantzitsuenei aplikatu ahal izateko.



6. Tributu-sistema osatzen duten zergarik garrantzitsuenak analizatzea eta haien funtzioaren inguruan eta errenta birbanatzeko eta dirubilketarako haien gaitasunaren inguruan hausnartzea.



7. Tributuak sailkatzea eta eguneroko egoerak analizatzea, kasu bakoitzari dagokiona egokiro aukeratzeko eta, zergen egiturara hurbiltzeko asmoz, oinarrizko likidazioak egitea.



TITULAZIOAREN KONPETENTZIA ESPEZIFIKOAK



15. Fiskalitate eta kontabilitatearen arloetan era eraginkorrean kudeatzea eta aholkatzea.

17. Lan merkatuaren inguruko datuak eta adierazle sozio-ekonomikoak interpretatzea eta lan arloan ikerkuntza proiektuak garatzeko teknika egokiak aplikatzea.



GRADUKO ZEHARKAKO KONPETENTZIAK



Problemak eraginkortasunez ebaztea, balizko alternatibak identifikatu eta baloratzeko eskuratu diren gaitasunak eta trebeziak erabiliz (M2)



IKASKUNTZAREN EMAITZAK

Ikasleak ondoko hauetarako gauza izango dira:

- paradigma ekonomiko nagusiaren arazoak identifikatzeko

- datuak eduki teorikoei begira analizatzeko eta ikuspuntu kritikoa emateko

- ekonomiaren ikuspegi ekologikoa, berdintasunezkoa eta feminista garatzeko

- Indarrean dagoen tributu-araudia analizatzeko, helburu hauekin: identifikatzea problemak ebazteko beharrezkoak diren urratsak; arauak zuzentasunez aplikatzea; eta, azkenik, zerga pertsonalak likidatzea.

I ZATIA: EKONOMIA-SISTEMAREN ANALISIA

ARLO TEORIKOAK

- BPG eta bere bilakaera (nominala, erreala, eros-ahalmenaren paritateak, kanbio-tasa korronteak, etab.)

- hazkunde ekonomikoa eta bere neurketa. Hazkundea eta ongizatea: bien identifikazioa

- hazkunde etengabearen ereduak sortutako arazoak

- iraunkortasuna, ekonomiaren ikuspegi alternatiboak eta aurrerapen soziala neurtzeko beste adierazle batzuk

- ezberdintasunak eta mugikortasun soziala: ezberdintasunen neurketa (adierazleak); ezberdintasunen existentziak sortutako arazoak; zer den mugikortasun soziala eta nola neurtzen den

- ekonomia feminista: patriarkatua eta lanaren banaketa sexuala; patriarkatua indartzen duten mekanismoak; ekonomia feminista baterako politikak

- administrazio publikoen kontuak: diru-sarrerak eta gastuak nazio kontabilitatean



ARLO PRAKTIKOAK

- datuak analizatzea, eduki teorikoei begira

- ondorioak lortzea, adierazleetan oinarrituta

- diskurtso kritikoa eta gizartearekin konprometitua garatzea



II ZATIA: TRIBUTU-SISTEMA

ARLO TEORIKOAK

- Tributaziorako sarrera orokorra: oinarrizko kontzeptuak, Tributu Foru Arau Orokorra eta Ekonomia Ituna

- Arlo praktikoan landuko diren tributuen arauak

ARLO PRAKTIKOAK

Tributu-sistemaren zerga pertsonalik garrantzitsuenak likidatzea:

- Oinordetza eta Dohaintzen gaineko Zerga

- Ondarearen gaineko Zerga

- Pertsona Fisikoen Errentaren gaineko Zerga

IKASGAIAREN LEHENENGO ZATIAN (EKONOMIA SISTEMAREN ANALISIA)

- eskola magistralak erabiliko dira, ikasgaiaren eduki-baliabideak aurkezteko (mobilizatuko diren gaiak, hau da, praktikara eramango direnak)

- eduki-baliabideetan aurrera egin ahala, ikasleei emango dizkiegu horiei dagozkien datuak (stats.oecd.org, Eurostat eta Eustat bezalako base ofizialetatik deskargatuak, edo ad hoc prestatuak). Ikasleek datuok analizatu beharko dituzte

- adibideak erabiliz, aurkeztuko dira ikasitako teoriari begira gauzatu ahal diren analisi motak; ondoren, kasu batzuk proposatuko dira, ikasleek banaka edo taldeka ebazteko. Ikasleek ebatzitako kasuak hartuko ditugu (borondatez entregatutakoak) eta gelan, jendaurrean, analizatuko ditugu, ezinbesteko feed back-a emateko



IKASGAIAREN BIGARREN ZATIAN (TRIBUTU SISTEMAREN ANALISIA)

Ikasleei beharrezko tributu araudia bide elektronikoz entregatuko zaie

Ikasleek analizatu eta beharrezko eduki zehatzak identifikatzeko gai izan beharko dira

Aurretik analizatutako araudiari dagozkion kasu praktikoak ikasleei helaraziko zaizkie

Ikasleek, banaka edo taldeka, kasu praktikoak ebatzi beharko dituzte, araudiari begira

Ebatzitako kasuak gelan komentatuko dira, ikasle eta irakaslearen arteko beharrezko feed-back-a lortzeko

Zailtasun maila lehen aipatutako feed-back-ean detektaturiko aurrerakuntzen arabera ezarriko da





EBALUAZIOA

Gure ustez, ebaluazioak bi funtzio bete behar ditu: formatzea eta zertifikatzea. Ebaluazio formatiboak, jarraituak, lagundu behar die ikasleei haien ikaskuntza prozesuan, eta ikasle eta irakasleen arteko feed-back-aren oinarri izan behar da.

Zertifikatiboak, ordea beste funtzio bat dauka; programatutako konpetentziak ikasleek eskuratu dituztela ziurtatu behar baitu. Horrela, bi ebaluazio mota hauek planteatzen ditugu:

Ebaluazio zertifikatiboa:

Irakasle-taldearen ustez ebaluazio zertifikatiboa batez ere banakakoa izan behar da. Beraz, ikasle guztiak banaka ebaluatuko ditugu, planeatutako konpetentziak garatzeko gauza direla egiaztatzeko. Hor ikasgaiaren eduki-baliabideak mobilizatu beharko dituzte, planeatutako graduazioari jarraiki.

Ebaluazio formatiboa:

Hala ere, irakasle-taldearen ustez, talde kooperatiboetan egindako lana edo problemen ebazpenean lortutako aurrerapenak ebaluatuak izan behar dira. Ebaluazio mota hau klaseetan zehar eta tutoretzetan egingo dugu: ikasleen jarraipena egingo dugu (analisien berrikusketa, problemak ebazten laguntzea...), ikasle eta irakasleen arteko feedback-aren bidez, haien lanaren puntu ahulak eta indartu behar dituzten gauzak identifikatzeko. Atal honetan irakaslearen ebaluazioa eta ikasleen autoebaluazioa eta koebaluazioa erabiliko ditugu.

Ikasgaiak ondo bereizitako bi zati dauzkanez, lehenengo zatiaren amaieran ebaluazio bat egongo da (gutxi gorabehera lauhilekoaren erdian). Bigarren zatiaren ebaluazioa ohiko deialdiaren data ofizialarekin bat etorriko da. Ikasgaia gainditzeko 5 puntu lortu beharko dira.

Ekonomia-sistemaren atala azken notaren %50ko pisua (5 puntu) edukiko du. Ebaluazioa tresna hauetako baten edo batzuen bidez egingo da:

- galdera teorikoak: erantzun laburrekoak edo garatzekoak

- kasu praktikoak: ikasleei entregatuko dizkiegu gelan landutakoak bezalako kasu batzuk, eduki teorikoei begira lantzeko (agertzen diren adierazleak aurkeztu eta definitu, datuak analizatu eta ondorioak atera).

Proba hau eskola-egun normaletan egingo dugu (aldez aurretik abisatuta, gutxi gorabehera 8. astean), eta data ez da inolaz ere aldatuko.

Tributu sistemaren atala banakako proba baten bidez ebaluatuko da. Probak bi zati edukiko ditu:

- galdera teorikoak (erantzun laburrekoak edo garatzeko idazlanak), bai sarrerako ikasgaien ingurukoak, bai tributu-araudien ingurukoak

- tributazio kasu praktiko batzuk ebaztea

Hori azterketaren data ofizialean egingo da, eta notaren gainontzeko %50 izango dira. Azterketa horretan araudiaren atal batzuk erabili ahal izango dira (taulak, koefizienteak, eskalak edo inprimakiak). Horiek e-gelaren bidez ikasleen esku jarriko dira, aldez aurretik ezagutzeko.



Ebaluazio jarraituan parte hartzen duten ikasleek, lehenengo zatian 4 puntu edo hortik gorako kalifikazioa lortuz gero, lan osagarri bat aurkezteko aukera izango dute. Lan horren helburua hauxe da:

- interesa duten ikasleei, haien kalifikazioetan bikaintasuna lortzea erraztea

- lan akademikoak egiteko metodologian ikasleak urratsez-urrats trebatzea, eta haien GrAL egiteko orduan gaiak aukeratzen laguntzea

Ezaugarriak:

- ikasleei gai batzuk emango dizkiegu, haiek aukeratzeko; halaber, lana egiteko oinarrizko bibliografía gomendatuko diegu

- lana 5 eta 10 orrialde bitartekoa izan beharko da; ikasleek, aldez aurretik, jakingo dute zer formatutan egin beharko duten, bide elektronikoz jakinaraziko diegulako.

- azterketaren deialdi ofizialaren datan entregatu beharko dute

- ikasleei, aldez aurretik eta bide elektronikoz, jakinaraziko dizkiegu ebaluatzeko irizpideak; bestalde, lanak azterketen kalifikazioa puntu bateraino igo ahal izango du



Ikasleak "ez aurkeztutzat" hartuko dira baldin eta proba bi horietatik bakar batera aurkezten ez badira. Batera aurkezten diren ikasleak "aurkeztutzat" hartuko ditugu, bestera aurkeztu zein ez aurkeztu.

Ebaluazio jarraituan parte har ezin dezaketen ikasleek azken azterketa edukiko dute, 10 puntukoa. Bere egitura eta puntuazioa aurretik azaldutako berbera izango da (baina azterketa bakar batean).

Ondoko egoera honetan suposatuko dugu pertsona batek ebaluazio jarraituan ez duela parte hartuko: lehenengo proba partzialera aurkezten ez bada. Kasu horretan, zuzenean azken azterketara pasatuko da. Ez da inolako eskakizunik eskatuko ebaluazio jarraitura edo azken ebaluaziora joateko.

Sailak prestatutako materialak, web-bidez entregatuko direnak
Web-bidez entregatuko diren erreferentzia bibliografikoak
Web-bidez entregatuko den tributu-araudia

Oinarrizko bibliografia

Lequiller, Francois., & Blades, Derek. (2009). Comprendiendo las cuentas nacionales. París: OECD publishing



Pazos, M. (2015). Desiguales por ley: Las políticas públicas contra la igualdad de género. Madrid:Los Libros de la Catarata



Piketty, T. (2015). El capital en el siglo XXI. Madrid: Fondo De Cultura Económica



Raworth, K. (2018). Economía rosquilla: 7 maneras de pensar como un economista del siglo XXI. Barcelona:Paidós

Gehiago sakontzeko bibliografia

Sakontzeko bibliografia esteka honetan dago:

https://sites.google.com/view/materialosagarriak/bibliografia?authuser=0

Aldizkariak

Papeles de Economía Española
Ekonomiaz