nireEHU 
TITULUAREN GAKOAK
Digitalizazioaren eraginez, paradigma-aldaketa gertatzen ari da gaur egun, Humanitateetan ez ezik baita kultur-sorkuntzan eta zientzietan ere: informazioa digitalki sortzen, gordetzen eta zabaltzen dugu, eta horrek testuinguru berri batera garamatza.
Humanitate Digitalak (HD) Humanitateen eta teknologia digitalen arteko elkargunea dira, paradigma-aldaketaren testuinguruan kokatu beharreko alorra. Izan ere, konputazio-zientziei esker, batetik, gero eta modu eraginkorragoan kudea daitezke datuak kantitate handietan, eta, bestetik, errazagoa da alor bereizietako datuak elkarrekin lotzea.
Askotariko diziplinetako adituek dihardute HDen inguruan lanean, eta, horren erakusgarri, Goimailako Online Institutuak ere diziplinarteko irakasle-taldea osatu du aditu-titulu honetarako, ikuspegi zabal bat eskaini eta proiektu berritzaileak abiaraziko dituena. Gainera, garrantzi berezia emango zaio alorrean diharduten beste zentro eta erakunde batzuekiko elkarlanari, bai Euskal Herri mailakoari eta bai nazioartekoari ere, graduondokoaren helburu nagusia lortze aldera: testuinguru digitalak sorrarazi dituen erronka berrietan sakontzea eta horiei aurre egiteko prestakuntza eskaintzea.
