nireEHU 
Tituluaren gakoak
Ikastaro honen xedea da ikasleei indarkeria matxisten gaineko ulermen eta ezagutza teoriko-praktikoak ematea (jatorria, kausak, egiturak eta tipologiak), teoria feminista oinarri hartuta. Helburuak:
- Indarkeria matxisten edozein adierazpenen aurrean jardun profesional, kontziente eta informatua bultzatzea, eta prebentzioa, antzemate goiztiarra eta lehen esku-hartzeak bideratzea.
- Indarkeriaren biktima izan diren emakumeei bide-laguntza emateko gakoak eskaintzea, genero ikuspegian oinarrituta eta intersekzionalitatez, beren errekuperazio prozesuak bultzatzeko, eskubideak berreskuratzen laguntzeko eta erreparazioa bideratzeko.
- Gizonei bide-laguntza emateko tresnak eskuratzeko aukera erraztea, prebentzioa sustatzeko, jarrera eta jokabide bortitzak goiz antzemateko eta, indarkeriaren eragile diren eta beren harremanetan horrelako jokabideak ezabatzeko borondatea duten gizonen kasuan, jarrerak errepika ez daitezen bultzatzeko.
Irakaskuntza-ikaskuntza prozesua abiatzeko, parte-hartzaile bakoitzak, introspekzioaren eta talde lanaren bitartez, bere esperientzia propioa berreraikiko du, norbanakoaren nahiz taldearen generoaren sozializazioak dituen eraginak aztertuz eta horiek indarkeria matxistekin duten harremana jorratuz. Hala, parte-hartzaileek ikuspegi intersekzional batetik aztertuko dute problematika hau, arreta eta bide-laguntza jasotzen duten pertsonen aniztasuna aprobetxatuta, eta esku hartzeko estrategia propioak diseinatuko dituzte. Lehentasuna emango zaio problematika sozial honen ikerketari, arazoaren erroak erabat desagerrarazte aldera.
