TITULUAREN GAKOAK
Unibertsitate adituaren titulu honek Euskal Herriko osasun sistemaren behar eta helburuei erantzun egokia emango dieten profesionalak prestatuko ditu. Tituluan eskaintzen diren hiru irakasgaietan ikasleek hainbat gaitasun eskuratuko dituzte. Gaitasun horiei esker jabetuko dira pazientea ardatz duen kalitatezko osasun arreta eskaintzeko, ezinbestekoa dela pazientearen hizkuntza eta kultura aintzat hartzea. Bereziki honako hauek azpimarratuko dira: pazientearen hizkuntza eta kultura beharrak, eskaintza aktiboa, pazienteak hautemandako emaitzen neurketa, zirkuitu elebidunak, hizkuntzan eragiten duten gaitzen tratamendua, osasun erakundeen hizkuntza kudeaketarako estrategiak, atzerritarrentzako harrera planak, osasun arloko ahozko eta idatzizko hizkeraren erabilera, galdetegiak baliozkotzeko prozedurak eta genero ikuspegia.