Bere prestakuntza-jardueraren ildotik, UPV/EHUko Ikerketa Zerbitzu Orokorretako Zientziometria Unitateak (IKS), bosgarren edizioan, 52 doktoregai eta doktoregairen lehen urratsak ikerketa-karreran ikastaroa eman du Arabako, Bizkaiko eta Gipuzkoako Campusetan, 2022ko otsailean eta martxoan

2016. urteaz geroztik egiten ari den ikastaro hori aurrez aurreko formatuan eskaintzen da Doktorego Eskolaren zeharkako prestakuntza-jardueren barruan, eta honako helburu nagusi hauek ditu: ikertzaileen kontratuak eta erakunde publikoek ikertzaileak kontratatzeko deitutako laguntzak sartzea; irakasleen figurak, akreditazio-prozesuak eta irakasleen ebaluazio-agentziak azaltzea; eta edozein ikerketa-arlotan ikerketa-jarduera neurtzeko erabilitako adierazleak ezagutzeko beharra helaraztea.

Bi goizetan banatutako hamar ordutan zehar, Zientziometria Unitateko teknikariek ikerketan aritzen direnen ibilbidea osatzen duten etapa nagusiak erakutsi dizkiete 34 emakumez eta 18 gizonez osatutako doktoregoko ikasleei, bai eta haien ekoizpen zientifikoa ebaluatzeko aplikatutako irizpideak ere, batez ere ikuspegi praktikotik, ezagutzaren adar guztiak barnean hartuta eta agentziek egindako azken aldaketak une oro txertatuta.