Sareak oinarrizko garrantzia duen aplikazioen garapenerako oinarriak ikasiko dira irakasgai honetan. Hortaz, irakasgaiak sareari estuki lotutako aplikazioen garapenean jartzen du arreta, garrantzia berezia emanez TCP/IP arkitekturaren gaineko garapenari, eta honen barruan, web aplikazioei. Sare aplikazioak lantzeko ereduak aztertuko dira eta berauek garatzeko interfazeak.



Lortzen diren gaitasunak:

· Sareetan orokorrean, eta TCP/IP arkitekturan bereziki, aplikazio berriak asmatu, diseinatu, garatu, dokumentatu eta ustiatzeko gaitasuna.

· Sare aplikazio baten kalitatea, zerbitzu maila eta erakunde baten beharretara zenbateraino egokitzen den ebaluatzeko gaitasuna.

· Aplikazioen garapenetan lantaldeak zuzendu eta koordinatzeko gaitasuna.

· Sare aplikazio bat garatzeko tresnak eta teknikak ebaluatzeko eta aukeratzeko gaitasuna.

· Sare aplikazio baten garapenaren, moldaketaren edota mantentze-lanaren kostu ekonomiko eta tenporala ebaluatzeko gaitasuna.

1 Sare aplikazioen diseinua.

1.1 Sare aplikazioen egitura.

1.2 Bezero/zerbitzari eta P2P ereduak.

1.3 TCP/IP mailako garraio zerbitzuak.

1.4 Protokolo aplikazioak.

2 Sare zerbitzuak atzitzeko interfazeak: socketak.

2.1 Sare aplikazioen programazioa socket interfazea erabiliz.

2.2 Zerbitzari iteratibo eta konkurrenteak.

2.3 Multicast.

2.4 IPv6.

3 Webean oinarritutako aplikazioak.

3.1 Web teknologiaren oinarriak.

3.2 HTML eta XHTML.

3.3 CSS estiloak.

3.4 Javascript.

3.5 PHP.

3.6 XML.

3.7 Ajax eta web zerbitzuen oinarriak.

4 Aplikazioak ingurune berezituetan: gailu mugikorrak.

4.1 Androiden gaineko programazioaren oinarriak.

4.2 Android sisteman sare aplikazioak programatzen.

Nagusiki praktikoa den irakasgai bat izanik, klase teorikoetan ikasleari oinarrizko kontzeptuak azalduko zaizkio. Ondoren, ikasleak berak sakondu beharko du kontzeptu hauetan, irakasleak emandako erreferentziak jarraituz. Klase praktikoetan kontzeptu teorikoak praktikan jarriko dira.



Metodologia aktiboak

--------------------

Ikasleek bi praktika mota egin beharko dituzte, binakako taldeetan. Alde batetik klase praktikoetan hainbat lan praktiko egin beharko dituzte, beti ere irakasleak lagunduta. Orokorrean praktika motzak (saio bakarrekoak) eta oso zuzenduak izango dira, beharrezko kontzeptu teorikoak modu azkar batean praktikan jartzeko. Bestalde, kontzeptu teorikoen erabilpen praktiko zabalago bat egin beharko du ikasleak, klase orduetatik kanpo, baina irakasleak zuzenduta. Mota honetako 3 lan praktiko egin beharko ditu, lehenengo 3 gaiei dagokienak hain zuzen ere.

Ikasleak bi ebaluazio sistema ezberdinen artean aukeratu beharko du: ebaluazio jarraitua ala azken ebaluazioarena. Bi kasuetan gaitegiko gai bakoitzak ebaluazioan izango duen pisua berbera izango da: %10, %45, %40 eta %5.

Ebaluazio jarraitua ikastaroaren hasieran aukeratu ahal izango da, eta behin betiko bihurtuko da adieraziko diren epeetan (ikastaroaren %60 - %80 igarota), ikasleak hala eskatuta eta irakasleak ikaslearen errendimendua egiaztatu ondoren. Epe horietan ikasleak ez badu eskaerarik egiten, ebaluazio jarraituari uko egiten diola ulertzen da.

Ebaluazio jarraitua aukeratu duen ikaslea eskoletara etortzea ezinbestekoa izango da. Kasu honetan ebaluazioak hiru atal izango ditu. Alde batetik, ikasleek, bi laguneko taldeetan, hainbat lan praktiko egin beharko dituzte lehenengo hiru gaietan, oro har klase orduetatik kanpo. Atal honen pisua %60koa izango da (%10, %25 eta %25). Bestalde, 2. eta 3. gaien kasuan, ikasle bakoitzak test motako idatzizko azterketa bat egin beharko du. Azterketa hauen pisua %35ekoa izango da azken notan (%20 eta %15). Bukatzeko, azkeneko gaian, laborategian eginiko praktika ebaluatuko da, bere pisua azkeneko notaren %5ekoa izanik.

Azken ebaluazioaren sistemaren kasuan ikasleak hainbat lan praktiko egin beharko ditu, banaka, klase orduetatik kanpo. Honetaz gain, idatzizko azterketa bat egin beharko du, bere pisua bukaerako notan %70 izanik.

Irakasleak eGelan atzigarri utzitako materiala: gidak, adibideak, enuntziatuak...

Oinarrizko bibliografia

- Computer Networking: A Top-Down Approach, 4th ed. J.F. Kurose and K.W. Ross. Addison-Wesley 2008. [http://wps.aw.com/aw_kurose_network_4/63/16303/4173750.cw/index.html]

- Designing Data-Intensive Web Applications. S. Ceri et al. Morgan Kaufmann 2003.

- TCP/IP Sareak, 3. argitaldia. JM Rivadeneyra. UEU 2009

Gehiago sakontzeko bibliografia

- Unix Network Programming, Vol 1, 2nd ed. W. R. Stevens. Prentice Hall 1998.
- Internetworking with TCP/IP Vol III: client-server programming and applications. D.E. Comer, D.L. Stevens. Prentice hall 2001.
- TCP/IP Guide. A Comprehensive, Illustrated Internet Protocols Reference. Charles M. Kozierok. No starch press. 2005. [http://www.tcpipguide.com/free/t_toc.htm]