Unibertsitateko mikrokredentzialek paradigma berri bat sortzen dute goi mailako hezkuntzan; etengabeko ikaskuntzari lotutako prestakuntza eredu berritzailea planteatzen dute, ikaskuntzari nahiz enplegagarritasunari bultzada berri bat ematen diona. Oro har, curriculuma eta gaitasunak hobetzeko interesa duten pertsonei zuzenduta daude, eta prestakuntza ibilbide pertsonalizatua diseinatzeko aukera ematen dute; izan ere, independenteak izan daitezke, baina metatu ere egin daitezke, kredentzial zabalagoak lortzeko.
EHUren berezko ikasketak dira mikrokredentzialak; kreditu gutxiko prestakuntza laburrak, kalitatea erabat bermatua dutenak. Prestakuntza modulu espezializatu eta eguneratuak eskaintzen dituzte, eta aukera ematen dute malgutasun handiz ezagutzak, trebetasunak eta gaitasunak (teknikoak, digitalak nahiz zeharkakoak) eskuratu, zabaldu eta eguneratzeko.
Prestakuntza programa hauen helburu nagusia da bizitza osoko prestakuntzaren behar aldakorrei erantzutea, baita beharrizan pertsonal, sozial edo kulturalei nahiz lan merkatuari lotutako premiei erantzutea ere; bide horretan, ezagutzaren gizartea sustatzen dute, goi mailako hezkuntzara iristeko aukera demokratizatuz eta enplegagarritasuna eta gizarteratzea bultzatuz.
EHUko irakasleak
EHUko irakaslea bazara, mikrokredentzialak proposatu, zuzendu eta eman ditzakezu. Zuzendaritza akademikoa Euskal Herriko Unibertsitateko irakasleei dagokie. Hala ere, profesionalek ere parte har dezakete zuzendaritzan eta irakaskuntzan.
Lankidetzarako bideak sortzea: Unibertsitatea-Gizartea.
Enpresak eta erakundeak
Enpresa, erakunde sozial edo administrazio publiko bateko kide bazara, kontsultatu EHUko Mikrokredentzialen egungo eskaintza; prestakuntza eguneratua eta kalitatezkoa da, Europako esparruan egiaztatua dagoena.
Gainera, zure erakundearen beharretara egokitutako mikrokredentzialak garatzen ditugu Euskal Herriko Unibertsitatean. Aurkeztu zure eskaera eta zurekin harremanetan jarriko gara.