Berri bikaina da hau: munduko biztanleriaren gehiengoarekin bat egiten dugu, datuak aztertzeko JASPekin lan egin nahi dutenek gogokoen duten hizkuntza erabiliz: ingelesa, alemana, nederlandera, japoniera, galiziera, portugesa, txinera, gaztelania, frantsesa, poloniera, errusiera, indonesiera, tamilera eta euskara.

Euskal Herriko Unibertsitateko (EHU) Medikuntza eta Erizaintza Fakultateko irakasleek garatu dute euskarazko bertsioa: Joserra Rueda, Ziortza Barroeta, Angel Prieto eta Amaia Irizar.

JASP Amsterdamgo Unibertsitateak abiarazitako ekimen bat da, datuen analisia ahalegin minimoarekin egiteko sortua. JASP-ek interfaze grafiko modernoa du, eta horri esker, segundo gutxitan analisi estatistikoak egin ditzakezu, programazioa ikasi beharrik gabe edo programazio-erroreak egiteko arriskurik gabe. Doako software programa bat da, plataforma anitzekoa, Linux, Windows eta macOS-en instalatu eta erabil daitekeena (https://jasp-stats.org/download/).

JASP erabiltzeko erraza eta ikasteko azkarra da, aurretiko ezagutza estatistikoa edozein dela ere. Medikuntzako ikasleekin frogatu da hori.

JASP programa integrala da, eta EHUko graduko eta graduondoko programa ugaritan datu estatistikoen analisiaren arloko irakaskuntza eta prestakuntza beharrak asetzen ditu.

Eta ikasleek mugarik gabe erabiltzen jarrai dezakete unibertsitatea utzi ondoren ere.

JASP erabiltzeko erraztasuna kontuan hartuta diseinatu zen: APA formatuko taulak eta grafikoak testu-prozesadore batean kopiatu eta itsatsi daitezke, emaitzen oharrak programan bertan jar daitezke, eta sarrera-aukerak doitzean emaitzak dinamikoki aldatzen dira.

JASPen oinarrizko diseinu-printzipioa da lehenetsitako ezarpenek analisi sinple eta oinarrizkoak aurkeztea, behar denean aukera konplexuagoak eskuragarri izanik.

Laburbilduz, JASP erabiltzeko erraza, doakoa eta malgua den tresna bat da.

Animatu zaitez berau erabiltzera. JASP-en baliabide, eskuliburu eta bideo ugari daude linean eskuragarri.

JASP alternatiba bikaina da SPSS (lizentziak 22.869 euro kostatzen digu urtero)

edo STATA bezalako ordainpeko programen aurrean.

JASP gaur egun programazio ezagutzarik ez duten pertsonentzat datuak aztertzeko software libre eta kode irekiko programa onena da.

JASP programa oso indartsua eta sendoa da, atzean garatzaile komunitate sendo bat duena, eta aldizka eguneratzen da modulu berriekin. Edonork garatu ditzake modulu berriak JASP-era gehitu eta partekatzeko.

JASP-ek analisi klasikoa eta bayesiarra barneratzen ditu. Erabiltzaile aurreratuentzat ere oso erabilgarria izan daiteke, R kodea ikusteko eta zuzenean lan egiteko aukera ematen dielako. Programaren aurkezpen saioak EHUko hainbat zentrotan egingo dira ekainean, uztailean eta irailean zehar. Zure zentroan saio bat egitea nahi baduzu, jarri gurekin harremanetan.

EMAIL