Deskribapena

EHUko Kultura Zientifikoko Katedrak “Ekimen kolektiboen eragina osasunean” dibulgazio-hitzaldia antolatu du, gizarte-kohesioan, ongizatean eta bizi-kalitatean talde-jardueretan parte hartzearen garrantzia erakusteko.

Jon Zabala ikertzaileak, Psikologian doktore eta Bilboko Hezkuntza Fakultatean irakasle dena, azalduko du nola ekimen kolektiboetan parte hartzeak gizarteratzen eta osasuna hobetzen laguntzen duen. Bere doktore-tesiaren gaia izan zen Korrika bezalako fenomeno kolektiboei buruzko ikerketen adibideak aurkeztuko ditu.

Hitzaldi-solasaldia euskaraz izango da, urtarrilaren 9an, ostirala, 18:30ean Durangoko Bizenta Mogel Bibliotekan. EHUko Kultura Zientifikoko Katedrak eta Durangoko Liburutegiak antolatutako Zientziaren Ertzetik dibulgazio-zikloaren parte da. Sarrera doakoa izango da aretoa bete arte, eta streaming bidez jarraitu ahal izango da Orainen (EiTB).