Saria bi urtean behin ematen da, eta 'Sociedad Española de Farmacia Industrial y Galénica' elkartearen XII. Biltzarrean eman zen, joan den astean, Bartzelonan. Bertan izan zen UPV/EHUko Farmazia Fakultateko NanoBioCel taldeko ikertzaile nagusia, Jose Luis Pedraz.

Orain arte, material genetikoa zelulen barnealdera (arazo genetikoak zuzentzen saiatzeko) eramateko modu eraginkor bakarra zen horretarako beren-beregi diseinatutako birus bat erabiltzea. Alabaina, hurbilketa horrek segurtasun arazo batzuk ditu, eta muga handiak, garraiatu beharreko material genetikoaren tamainari dagokionez. Testuinguru horretan, CIBERBBNren beraren proiektuetako batek (TEA proiektuak) estrategia terapeutiko berriak sortzea du ardatz, erretinako endekapenezko gaixotasunak tratatzeko.

UPV/EHUko Farmazia Laborategiaren eta Farmazia Teknologiaren (José Luis Pedraz irakaslea da zuzendaria), Kataluniako Kimika Aurreratuko Institutuko Azido Nukleikoen Kimika Taldearen (Ramón Eritja doktorea da zuzendaria) eta Elxeko Miguel Hernández Unibertsitateko Neuroprotesiak eta Neuroingeniaritza Taldearen (Eduardo Fernández irakasleak zuzentzen du) lan lerro partekatuaren helburua da bektore ez biral berriak sortzea, material genetikoa garraiatzeko erretinako zelulen barnealdera.Horren bidez, zenbait proteinaren adierazpena modulatu nahi da: erretinako zenbait patologiatan eraldaturik aurki daitezke, eta tratamenduaren bidez, arazoa lehengoratzea lor daiteke, zati batean bada ere. Hain zuzen ere, helburu horretarako, lipido kationikoetan oinarritutako nanopartikulak erabili dira, eta nagusiki erretinako zeluletara gehitzea errazteko formulatu dira.Lana Journal of Control Release aldizkari prestigiotsuan argitaratu da.

Teknologia berri hori arrakastaz probatu da ikerketarako animaliekin, in vitro eta in vivo egindako saioetan. Bada, begiko zenbait gaixotasunerako tratamendu aukera berriak irekitzen ditu; hala nola, erretinosi pigmentarioa, endekatze makularra eta erretinaren endekapenezko beste gaixotasun batzuk. Hala ere, hasiera bateko emaitza horiek oso prometagarriakdiren arren, tartean ari diren ikertzaileek ohartarazi dute oraindik lan handia dagoela egiteko eta oso garrantzitsua dela apurka-apurka aurrera egitea, aurreikuspen faltsurik sortu gabe. Gainera, "oraindik ez dakigu transfekzioa denbora tarte luzeetan mantentzen den, eta hori funtsezkoa da terapia genikoko modu berri hori tratamendu bidetzat jo ahal izateko, gaixotasun multzo honen aurka. Tamalez, oraindik ez dago inolako tratamendu eraginkorrik horientzat" esan dute.