Tituluaren gakoak
Kontsumo Zuzenbideko berezko tituluaren helburua da Zuzenbidean gaurkotasun handikoa den arlo konplexu honen gaineko prestakuntza ematea; betiere, prestakuntza integrala, diziplinartekoa, espezializatua, teorikoa eta praktikoa bermatuta. Ikasketa hauetan, Kontsumo Zuzenbidearen arloko gai nagusiak jorratzen dira: “kontsumitzaile” kontzeptuaren mugaketa eta haren oinarrizko eskubideak; Europa, estatu eta erkidego mailan elkartzen diren arautegiak; eta Zuzenbide publikotik (zehatzeko ahalmena) nahiz pribatutik kontsumitzaileen eskubideak zaintzeko dauden bideak, estrajudizialak (arbitrajea eta bitartekaritza) nahiz judizialak. Oinarrizko premisa horietatik abiatuta, kontsumitzaileekin egiten den kontratazioaren arloa jorratzen da, ondo aztertuta, alde batetik, zenbait gai orokor (kontratazioa babesteko arauak; baldintza orokorrak eta gehiegizko klausulak; urrutiko nahiz saltokitik kanpoko kontratazioa eta kontratazio elektronikoa; bermeak eta salmenta osteko zerbitzuak; eta ondasun edo zerbitzu akastunengatiko erantzukizun zibila…) eta, bestetik, gatazka gehien eragiten dituzten kontratuak: kontsumorako kreditua, higiezinetarako kreditua, aireko garraioa, eduki eta zerbitzu digitalen hornikuntza, etab.
Jardunean dauden irakasleek diseinatu eta zuzentzen dute titulua, eta eskolak ere beraiek ematen dituzte, ikuspegi erabat praktikoa ezarrita. Horretarako, programa honek kasu errealak hartzen ditu oinarri, eta marka, enpresa eta aholkularitza zerbitzuetan lan egiteko espezializatzen ditu ikasleak, handia baita sektorearen eskaria.
