EHUk bat egin du CRUEren adierazpenarekin, eta urtarrilaren 6an Palestinako Birzeiteko Unibertsitatean izandako esku-hartze militarra gaitzetsi du

Espainiako Unibertsitateetako Errektoreen Konferentziak (CRUE) bere kezka sakona eta gaitzespen irmoa adierazi ditu joan den urtarrilaren 6an Birzeiteko Unibertsitatean (Zisjordania) gertatutako esku-hartze militarraren harira. Israelgo armadak jarduera akademikoa normaltasunez garatzen ari zen bitartean egin zuen esku-hartzea, eta eskura dagoen informazioaren arabera, hainbat pertsona zauritu zituen

 Unibertsitateak funtsezko espazioak dira ezagutza sortzeko, goi-mailako hezkuntza garatzeko eta askatasun akademikoa bermatzeko. Espazio horien funtzionamendu normala indarrez eteten edo baldintzatzen duen edozein ekintza mehatxu zuzena da hezkuntzarako eskubidearentzat, bai eta nazioarteko unibertsitate-misioaren oinarrian dauden printzipioentzat ere.

CRUEk gogorarazi du hezkuntza-eremuak eta bertan diharduten pertsonak babestea nazioarteko zuzenbidean jasotako betebeharra dela, eta azpimarratu du unibertsitateen segurtasuna, osotasuna eta autonomia bermatu behar direla, testuinguru politiko edo gatazkatsua edozein dela ere.

Errektoreen Konferentziak elkartasuna adierazi die Birzeiteko Unibertsitateari, bertako ikasleei, irakasleei eta langileei, eta babesa eman die gertakari horien eraginpean dauden pertsona guztiei. Halaber, berretsi egin du goi-mailako hezkuntza herritarren ondare gisa defendatzeko eta nazioarteko lankidetza akademikoa sustatzeko duen konpromisoa. Gainera, unibertsitateko bizitza bakearen, giza eskubideen errespetuaren eta bizikidetzaren balioekin gidatzearen aldekoa dela nabarmendu du.