Repsol Fundazioa trantsizio energetikoaren gelak – Hidrogenoaren Teknologiak, Repsol Fundazioaren eta Euskal Herriko Unibertsitatearen (EHU) arteko lankidetzaz bultzatuak, trantsizio energetikoan laguntzea du helburu, hidrogenoaren teknologien arloan prestakuntza, ikerketa, ezagutzaren transferentzia eta dibulgazio zientifikoa bultzatuz.

Gela 2021ean sortu zen, eta lehen bost urteetan bere jarduera Ekonomia Zirkularraren esparruan garatu zuen. 2026ko irailaz geroztik, Hidrogenoaren Teknologietan oinarritutako etapa berri bati ekin dio, energia- eta industria-sistemaren jasangarritasunarekin, berrikuntzarekin eta deskarbonizazioarekin duen konpromisoari jarraipena emanez.

Orientazio berri hori Bilboko Ingeniaritza Eskolako hainbat ikerketa-talderen esperientzian eta gaitasun zientifiko eta teknologikoetan oinarritzen da. Hidrogenoaren teknologiak ingeniaritza kimiko, energetiko eta elektrikoaren ikuspegi osagarrietatik jorratzen dituzte, eta jasangarritasun-irizpideak eta ingurumen-ebaluazioa ere txertatzen dituzte.

Gela honen helburu nagusia trantsizio energetiko iraunkor eta lehiakor batean lagunduko duten hidrogeno-teknologien garapena eta aplikazioa bultzatzea da, unibertsitatearen, industria-sarearen eta gizartearen arteko lankidetza sustatuz.

Gelaren jarduera hiru lan-ildo nagusiren eta zeharkako eremu baten inguruan egituratzen da, hidrogenoaren teknologiei diziplina anitzeko ikuspegi batetik heltzeko aukera ematen dutenak.

• 1. lerroa. Hidrogenoaren eta haren deribatuen ekoizpena, eraldaketa eta balorizazioa. Hidrogenoa modu iraunkorrean ekoizteko, erregai sintetiko bihurtzeko eta beste energia-molekula interesgarri batzuetarako teknologiak ikertu eta garatzea, bai eta hidrogenoa CO2 -a harrapatzeko eta balioesteko prozesuekin integratzea ere. Ildo horren barruan prozesuak, materialak eta katalizatzaileak garatzea eta optimizatzea sartzen da, baita erreakzio- eta bereizketa-teknologia aurreratuak aztertzea ere.

• 2. lerroa. Hidrogenoan oinarritutako energia-sistemak diseinatzea, modelizatzea eta integratzea. Hidrogenoa ekoizteko eta erabiltzeko sistemak diseinatzeko, modelizatzeko, simulatzeko eta integratzeko teknologiak ikertu eta garatzea. Elektrolizagailuak, errekuntza-sistemak, energia berriztagarriekiko integrazioa, prozesuen segurtasuna eta hidrogenoaren eta haren deribatuen energia- eta industria-aplikazioak barne hartzen ditu, eta arreta berezia eskaintzen dio industria-, logistika- eta portu-inguruneetan integratzeari.

• 3. lerroa. Hidrogenoa sistema elektrikoetan eta energia-aplikazioetan integratzea. Hidrogenoa sistema elektriko eta energetikoetan integratzeko irtenbideak ikertzea eta garatzea. Lerro honek barne hartzen ditu potentzia-elektronika, sare elektriko adimendunak, erregai-pilak, sistema hibridoak, biltegiratze energetikoa, sarearen malgutasuna eta deskarbonizazio industrialera eta mugikortasunera bideratutako aplikazioak.

• Zeharkako eremua. Hidrogenoaren teknologien iraunkortasuna eta ebaluazio integrala Hiru lan-ildoek, interesgarria denean, ebaluazio teknikoa, ekonomikoa, ingurumenekoa, erregulatzailea eta soziala barne hartzen dituzte. Erabilitako metodologien artean daude Bizi Zikloaren Analisia (BZA), azterketa tekno-ekonomikoak, ingurumen-inpaktuaren eta inpaktu sozioekonomikoaren ebaluazioa, arau-esparruaren azterketa eta erabakiak hartzen laguntzeko beste tresna batzuk. Ikuspegi horrek aukera ematen du hidrogenoaren teknologiak ikuspegi integral batetik ebaluatzeko, bideragarritasun teknikoa ez ezik, jasangarritasuna eta ezartzeko ahalmena ere kontuan hartuta.

Ion Agirre Arisketa <ion.agirre@ehu.eus>
Erlantz Lizundia Fernández <erlantz.liizundia@ehu.eus>
Estibaliz Sáez de Cámara Oleaga <estibaliz.saezdecamara@ehu.eus>

Harremanetarako: ehugela-repsol@ehu.eus 

Bere helburuak lortzeko, Gelak prestakuntza-, ikerketa-, transferentzia- eta dibulgazio-jarduerak garatzen ditu.

• Prestakuntza eta ikerketa aplikatua. Ikasturte bakoitzean, gelako lan-ildoei lotutako lan akademikoak (GrAL eta MAL) garatzea sustatzen da.

• Lan akademikoentzako sariak. Gelak sari-deialdi bat antolatzen du, trantsizio energetikoan egindako ekarpenengatik nabarmendu diren lan akademikoak aintzatesteko eta ikusarazteko.

• Jardunaldiak eta webinar-ak. Gelak bi webinar antolatzen ditu urtero Repsol Fundazioarekin lankidetzan, unibertsitateko, ikerketa-zentroetako, enpresetako eta energiaren sektoreko beste eragile batzuen arteko dibulgaziorako, ezagutza trukatzeko eta eztabaidarako gune gisa sortuak.

• Dibulgazio zientifikoa eta ezagutzaren transferentzia. Gelako lan-taldeak kongresuetan, jardunaldi teknikoetan, dibulgazio-jardueretan eta zientzia gizartera hurbiltzeko ekitaldietan parte hartzen du, hala nola Zientzia Astean. Horrez gain, dibulgazio-artikuluak argitaratzea eta jardueren emaitzak zabaltzea sustatzen du.