Elkarrizketan zehar, Matxainek institutuan piztu zitzaion bokazio zientifikoa gogoratu zuen. Irakasle talde gogotsu batek eraginda, kimika teorikoan espezializatu zen. Arlo hori, abstraktua dirudien arren, oso aplikazio zehatzak ditu osasunaren, energiaren edo jasangarritasunaren arloan. “Kimika denetan dago: janzten dugun arropatik hasi eta gaur egun dugun bizi-itxaropeneraino. Baina gaur egungo arazo handien konponbidean ere egon behar du, hala nola klima-aldaketa,” azaldu zuen.

Kimika Fakultateko dekanoak nabarmendu zuen kimika teorikoak duen garrantzia erreakzio kimikoak ordenagailuz simulatuz aurreikusteko, kostuak aurrezteko, kutsadura gutxitzeko eta farmako edo material berrien garapena bizkortzeko. Gaur egun, Matxain buru duen ikerketa-taldea hiru ildo nagusitan ari da lanean: bioteknologian, material aurreratuetan (hala nola polimeroetan) eta teknologia kuantikoetan, eta hainbat zentrorekin kolaboratzen du, besteak beste, Donostia International Physics Center-ekin (DIPC).

Podcastaren barruan, Matxainek bere ibilbide internazionaleko pasarteak ere partekatu zituen —Barañainetik Donostiara, Holanda, Suedia eta Portugalen barrena—, eta azpimarratu zuen “kanpora irten eta mundua ezagutzea oso garrantzitsua da, baita ikasitakoa itzuli eta partekatzea ere”.

Kimika Fakultateak aurten beteko dituen 50 urteak gogora ekarriz, dekanoak etorkizunari begira dituen erronkak ere aipatu zituen: enpresekin eta erakundeekin lankidetza-sarea sendotzea, eskaintza akademikoa eguneratzea (gradu dualak eta mikro-kredentzialekin), eta ikerketa eta gizartearen beharrak asetzeko beharrezkoak diren azpiegiturak indartzea.

Kimika ikastea pentsatzen ari direnei mezua garbi utzi zien Matxainek: “Jarraitu ezazue zuen intuizioari eta pasioari. Exijentzia handiko ibilbidea da, baina oso asebetegarria ere bai. Kimikak jakin-mina duten pertsonak behar ditu, ikasteko eta egokitzeko gogoz daudenak.”

EHUpodcast: entzuteko zientzia

EHUpodcast da Euskal Herriko Unibertsitateak gizarteari zientzia hurbiltzeko abiatu duen proposamen berria. “Entzun ta zabal zazu” lelopean, hilean behin argitaratzen den elkarrizketa-podcast honek EHUko ikertzaileen lana aurkezten du, modu atsegin, ulergarri eta eskuragarrian, diziplina guztietakoak barne.

Ekimen hau Ikerketa Gizartean Zabaltzeko Zuzendaritzak bultzatu du, Gizarte eta Komunikazio Zientzien Fakultatearen laguntzarekin. Elkarrizketak Ikus-entzunezko Komunikazio eta Publizitate Saileko irakaslea den Tania Arriagak koordinatu eta aurkeztuko ditu. Ekimena Bitartez ikerketa-taldearen inplikazioarekin garatu da.

EHUpodcasten helburu nagusia da ezagutza zientifikoa gizartera hurbiltzea, pentsamendu kritikoa sustatzea eta publiko orokorraren jakin-mina piztea. Elkarrizketak euskaraz edo gaztelaniaz egiten dira, eta transkripzioak ingelesera ere itzulita eskaintzen dira, edonork eduki horietara sarbidea izan dezan.

Dagoeneko entzungai EHUpodcasten, Ikerketa Gizartean Zabaltzeko Zuzendaritzaren web orrian  eta ohiko plataformetan.