Programa irailaren 26tik 29ra bitartean garatu da, eta alde batetik, 8 eta 13 urte bitarteko haurrentzako tailer praktikoak egon dira Nevers Ikastetxean. Bertan, burmuinaren funtzionamenduari buruz ikasi ahal izan dute, memoriarekin, neuronekin, ilusio optikoekin eta pertzepzioarekin lotutako esperimentuak izan dituztelarik.

Bestetik,  San Agustin Kultur Gunean jardunaldi irekiak egin dira "Garuna eta adimena" eta "Garuna eta osasuna" gaiak ardatz hartuta. Hitzaldietan hainbat gai jorratu dira, hala nola neuroteknologia, neuroeskubideak, pentsamendu kritikoa eta hainbat gaixotasun neurologiko, hala nola parkinsona, hestearen eta garunaren arteko harremana edo COVID iraunkorraren ondorio neurologikoak.

Ekimenak neurozientzian egindako aurrerapen zientifikoak modu eskuragarrian zabaltzea eta garunaren ezagutzarekiko eta horrek osasunean eta ongizatean duen eraginarekiko interesa sustatzea du helburu.