Santo Domingoko Unibertsitate Autonomoak (UASD) Ohorezko Irakasle izendatu du Universidad del País Vasco/Euskal Herriko Unibertsitateko (UPV/EHU) Filosofia Politikako irakasle Esteban Anchustegui Igartua, “Latinoamerikan eta Santo Domingoko Unibertsitate Autonomoan irakasle eta ikertzaile gisa izan duen ibilbide luzeagatik”. Ekitaldiko buruak entitateko errektore Editrudis Beltrán Crisóstomo eta Giza Zientzien Fakultateko dekano Gerardo Roa Ogando izan dira.

 “Uste dut izendapen hau 90eko hamarkadan hasi zenetik Graduondoko Sare Latinoamerikarraren esparruan egin dudan lanaren aitorpen baliotsua dela. Izan ere, aintzatespen hori, nire ibilbide pertsonala ohoratzeaz gain, hasiera‑hasieratik sare honen kide izan direnen konpromisoaren eta lan kolektiboaren lekukoa ere bada. Era berean, Universidad del País Vasco/Euskal Herriko Unibertsitateak ekimen horrekin duen etengabeko konpromisoaren isla da; UPV/EHUren laguntza oinarrizkoa izan baita ibilbide hori posible egiteko” azpimarratu du omenduak.

Gaur egun, Esteban Anchustegi sare horen Doktorego Programako zuzendaria da: “Globalizazioa Aztergai: Erronkak eta Diziplinarteko Erantzunak”. “Sortu zenetik, sarea nabarmen zabaldu da, bereziki Santo Domingoko Unibertsitate Autonomoan eta Dominikar Errepublikan; bertan, UPV/EHUk aintzatespen zabala du gure doktore eta irakasle ugarien prestakuntzari esker. Izan ere, horietako askok erakundeetan garrantzi handiko postuak lortu dituzte, hala nola errektoretzak, ministerioak edo ministerio ordeak”, azpimarratu du.

Bestalde, irakasle izan da Gizarte Demokratikoa, Estatua eta Zuzenbidea Masterrean eta Mundu Globalerako Filosofia Masterrean. Ikertzaile dominikarren hiru doktorego tesi zuzendu ditu, eta gaur egun beste hirutan ari da zuzendari gisa. Era berean, De la polis al nuevo Leviatán. Una historia de las ideas políticas liburua argitaratu du, UASDren ekimenaren bidez editatua; eta gaur egun liburu hori unibertsitate horretako Giza Zientziak eta Lege Zientziak eta Zientzia Politikoak fakultateetan irakaskuntza material gisa erabiltzen da. Gainera, mintegi akademikoak eta ikerketakoak antolatu ditu, eta Unibertsitatean eginiko nazioarteko hainbat jardunaldi, hitzaldi eta biltzarretan parte hartu du, modu aktiboan.

Nazioarteko biltzarrei dagokienez, 2008. urteaz geroztik, Graduondoko Sare Latinoamerikarrak aldizka topaketa akademikoak antolatzen ditu, eta UPV/EHUko irakasleak edizio guzti-guztietan parte hartu du antolaketa batzordeko eta batzorde zientifikoko kide, taldeen koordinatzaile eta hizlari gisa. Azpimarratu behar da edizio horietako hiru Dominikar Errepublikan egin izan direla, Santo Domingoko Unibertsitate Autonomikoarekin elkarlan estuan arituz.

Informazio osagarria

 Esteban Anchustegui Igartua Filosofia Politikoko irakasle osoa da UPV/EHUn. 40 urte baino gehiagoko ibilbidea du irakasle gisa, eta hamarkada bat baino gehiago darama 'Filosofiako gaur egungo arazoak' eta 'Kultura eta gizartea' doktorego programen arduradun gisa. 24 doktorego tesi (hamalau Nazioarteko Aipamenarekin eta hiru Aparteko Sariarekin) eta master amaierako, gradu amaierako eta ikertzeko nahikotasuneko 60 lan baino gehiago zuzendu ditu. ANECAk katedradun gisa akreditatu du, bai Gizarte eta Lege Zientzien arloan, bai Artean eta Humanitateetan, eta UNIBASQek egiaztatutako A1 osagarria ere badu (irakaskuntzan eta ikerketan bikaintasuna aitortzen du).

25 ikerketa proiektu baino gehiagotan parte hartu du eta gaur egun Biography & Parliaments ikertaldeko kide da (Eusko Jaurlaritzaren A mailako talde finkatua). Horretaz gain, Gipuzkoako Foru Aldundiaren Lehendakari Agirre saria jaso du, zientzia politikoaren arloan ikerketa aitortzen duena, 2011n egin zuen 'Actualidad y retos de la filosofía política' ikerlana saritzeko. Guztira 250 argitalpen baino gehiago ditu aldizkarietako artikuluak, liburuen kapituluak eta liburu osoak batuta, eta nazio mailako eta nazioarteko biltzarretan 60 ekarpen baino gehiago aurkeztu ditu; halaber, ekitaldi horietako askotan antolatzaile gisa jardun du.

Ikerketa egonaldiak egin ditu atzerriko unibertsitate batzuetan, hala nola honako hauetan: University of Nevada (Reno, AEB), Bernardo O’Higgins Unibertsitatea (Txile), Università degli Studi di Palermo (Italia), Stony Brook University (New York, AEB), San Antonio Abad del Cusco Unibertsitate Nazionala (Peru) edo Potiguarreko Unibertsitatea (Brasil). Egonaldi horiez gain, Università degli Studi di Palermon (Italia) Erasmus deialdiko ikastaroak eman ditu, eta beste unibertsitate batzuetan doktorego, graduko eta adituko irakaskuntza emateko gonbidatu dute. Indexatutako hainbat aldizkaritako referee‑a da, esate baterako, Religions, Araucaria, RIEV, Storia e Politica, Historia Contemporánea, Política y Cultura, Praxis Filosófica, Príncipe de Viana, Revista Deusto de Derechos Humanos, Comprendre, Analíticos edo Eunomía. Horretaz gain, argitalpenen batzorde editorial eta zientifikoko kide da honako hauetan: Studi Storici Siciliani, Araucaria, Res Publica edo Cuadernos de Ética eta Filosofía Política.

Esteban Anchusteguik hainbat aintzatespen jaso ditu: Euskalerriaren Adiskideen Elkarteko adiskide numerarioa, Salamancako Pontifize Unibertsitateko irakasle gonbidatua, Albako Unibertsitateko (Txile) irakasle bisitaria, San Antonio Abad del Cusco Unibertsitate Nazionaleko (Peru) ohorezko irakaslea, Rafael Landívar Unibertsitateko (Guatemala) katedraduna, Andina del Cusco Unibertsitateko (Peru) Graduondo Eskolako bisitari goraipatua edo Cuscoko Abokatuen Elkargoko (Peru) ohorezko kidea.