Urtarrilaren 15tik 26ra UPV/EHUko Zientzia eta Teknologia Fakultateak (ZTF-FCT) bigarren hezkuntzako eta batxilergoko 400 ikasle hartuko ditu bertako laborategietan Euskal Autonomia Erkidegoko hainbat udalerritako 30 ikastetxetatik, aurtengo Química en Acción / Kimika Bizirik programaren baitan. Programaren koordinatzailea, besteak beste, José Luis Ayastuy, eta Izaskun Gil de Muro irakasleak.

Ekimenak Kimika eta Ingeniaritza Kimikoa uztartzen ditu, unibertsitate aurreko ikasleen artean bi gai horien gaineko interesa indartzeko. Programan parte hartuko duten ikasleek euskaraz eta gaztelaniaz izango dituzte saioak, goizez eta arratsaldez. Aurten, ikasleen erdiak batxilergoko lehen eta bigarren mailakoak dira eta beste erdiak, berriz, DBHko laugarren mailakoak.

Ikasleek Kimikako lau praktika egingo dituzte laborategian, besteak beste, honako hauek: bost zentimoko kobrezko piezak "urrezko txanpon" bihurtuko dituzte prozesu elektrokimiko baten bidez (zinkez estaltzen dira eta zilar kolorea hartzen dute; ondoren, berotzean, zinka letoi bihurtzen da eta urre kolorea hartzen dute); detektibe kimikoaren jardueran, zortzi konposatu ezezagun identifikatu beharko dituzte, zenbait propietate kimiko eta fisiko neurtuta, esate baterako, pHa, eroankortasuna edo lumineszentzia. Ondorengo konposatuak identifikatu beharko dituzte: ur destilatua, itsasoko ura, tonika, kola edaria, tea, ozpina, lixiba eta gaseosa.

Era berean, 6-10 nylonaren sintesia egingo dute, polimerizazio bidez, bi erreaktiboak nahastuta, eta analgesiko komertzial baten osagai aktiboa identifikatuko dute. Azken jarduera horretan, ikasleek geruza fineko kromatografia erabiliko dute analgesiko baten benetako osagaiak identifikatzeko eta ondorengo agente aktiboen presentzia baieztatu edo ezeztatuko dute: parazetamola, ibuprofenoa, azido azetilsalizilikoa eta kafeina.

Gainera, esperimentuetan ere parte hartuko dute, betiere, Zientzia eta Teknologia Fakultateko tutore baten gidaritzapean; unibertsitateko zenbait irakaslek erakustaldiak ere egingo dizkiete.

Química en Acción/Kimika Bizirik programa 2006az geroztik gauzatzen da urtero eta bere helburua da bigarren hezkuntzako eta batxilergoko ikasleak zientzian murgiltzea, hain zuzen ere, kimikan eta ingeniaritza kimikoan.
 

DEIALDI HONETAKO BIGARREN ASTEAN PARTE HARTUKO DUTEN IKASTETXEAK

CPEIPS SAN JOSÉ HLBHIP

IES BIDEBIETA BHI

IES LIZARDI BHI

CPEIPS SANTA MARIA HLBHIP

IES IBARREKOLANDA BHI

CPEIPS NTRA. SRA. DE LA ANTIGUA HLBHIP

CPEIPS KIRIKIÑO IKASTOLA HLBHIP

CPEIPS NTRA. SRA. DEL CARMEN HLBHIP

IES ZUBIRI-MANTEO BHI

IES BALMASEDA BHI

IES ERMUA BHI

IES BURDINIBARRA BHI

IES BOTIKAZAR BHI

IES UROLA IKASTOLA BHI

CPEIPS ASTILEKU IKASTOLA HLBHIP

IES TRUEBA BHI

CPES OTEITZA LIZEOA BHIP

IES ARRASATE BHI

CPEIPS LAURO IKASTOLA HLBHIP

CPEIPS URRETXU-ZUMARRAGA IKASTOLA HLBHIP