Ongi etorri Euskal Herriko Unibertsitateko (EHU) Zientzia eta Teknologia Fakultateko web orrira. Bertan, irakaskuntza-eskaintzari buruzko informazioa (tituluak, masterrak eta berezko titulazioak), ikerketari buruzkoa eta zerbitzuei dagokiona aurkituko dituzu. Hau, kalitatezko irakaskuntza inklusibo, berritzaile eta ikasleen garapen integralarekin konpromisoa hartzen duen Fakultatea da, unibertsitate-komunitate osorako topagune zein ikaskuntza eta hazkunderako gune izan nahi duena, eta etengabe aldatzen ari den testuinguru zientifiko, teknologiko eta sozialaren erronkei aurre egiteko gai diren profesionalak prestatzen dituena.

Zientzia eta Teknologia Fakultatea EHUko irakaskuntzan eta ikerkuntzan esperientzia handia duen goi-mailako irakaskuntza-zentroa da. Izan ere, 2018/2019 ikasturtean 50. urteurrena ospatu zuen eta unibertsitate-formakuntzan eta ezagutzaren sorreran erreferente gisa finkatu zen.

Zientzia eta Teknologia Fakultatean bederatzi titulazio eskaintzen ditugu: Biologia, Biokimika eta Biologia Molekularra, Bioteknologia, Fisika, Geologia, Matematika, Kimika, Ingeniaritza Elektronikoa, Ingeniaritza Kimikoa eta Fisika eta Ingeniaritza Elektronikoko Gradu Bikoitza. Halaber, oso berriki, nazioarteko hiru titulazio bikoitz ezarri ditugu: Ingeniaritza Elektronikoa (Limogeseko Unibertsitatearekin), Kimika (Estrasburgoko Unibertsitatearekin) eta Matematika (Paueko eta Aturrialdeko Unibertsitatearekin).

Fakultatearen graduondoko eskaintza zabala eta anitza da: bederatzi master ofizial, horietatik sei unibertsitate artekoak, lau Erasmus Mundus eta lau berezko titulazio. Zientzia eta Teknologia Fakultateko ikerketa-taldeen ikerketa-ibilbide aintzatetsiari esker, ikasleek abangoardiako ikerketari eta graduan zehar eskuratutako jakintzaren aplikazio praktikoei hertsiki lotuta dauden graduondoko ikasketak egin ditzakete.

Prestakuntza integrala eskaintzeko asmoz, Fakultateak ikasleen mugikortasuna eta nazioarteko ikasleen erakartzea sustatzen du eta ingurune akademiko anitza eta nazioartekoa ahalbidetzen du. Halaber, enpresako praktiken programa urtero hazi egiten da, baita erakunde kolaboratzaileen eta bertan parte hartzen duten ikasleen kopurua handiagotu ere. Nazioartekotzeak eta esparru profesionaleko esperientziak, asteazken kulturalekin batera, trebakuntza teknikotik haratago doan prestakuntzaren euskarriak osatzen dituzte. Helburua ez da soilik profesional bikainak prestatzea, etengabe aldatzen ari den gizarte bateko erronkei aurre egiteko gai diren pertsona konprometituak eta prestatuak osatzea baizik.

Irakasleak Fakultateko balio handienetako bat dira. Euren prestakuntza jasoak, irakaskuntzarekiko konpromisoak eta ikerketa-jarduera nabariak kalitatezko formakuntza bermatzen dute, aurrerapen zientifikoei eta gizartearen beharrei hertsiki lotuak. Haien lanak Fakultatearen izenean eta aintzatespenean modu erabakigarrian laguntzen du.

Halaber, Teknikariak eta Kudeaketako eta Administrazio eta Zerbitzuetako Langileak (TEKAZEL) ezinbestekoak dira Fakultatearen funtzionamendurako. Euren profesionaltasunak, ardurak eta erantzuteko gaitasunak, irakaskuntza, ikerketa eta kudeaketa jardueren garapen eraginkorra bermatzen dute. Horrela, zerbitzuen kalitatean eta unibertsitate-komunitate osoaren arretan modu erabakigarrian laguntza ematen dute.

Fakultateak Kalitatea Bermatzeko Barne Sistemaren (KBBS) bitartez, kalitatearen eta hobekuntzaren alde egiten du. Konpromiso hau aintzatespen eta akreditazio anitzek lagundu dute, besteak beste, 2024an berritu zen Egiaztapen instituzionalak. Halaber, plan estrategikoek eta egitura antolatzaile sendoak kudeaketa, ebaluazioa eta titulazioen hobekuntza bermatzen dute, eta zentroaren jardueran erabat integratutako kalitatezko kultura sendotzen dute.

Horrek guztiak, bikaintasun akademikoarekin, ikerketarekin, berrikuntzarekin eta gure unibertsitate-komunitatearen parte diren pertsonekin konprometituta dagoen Fakultatea osatzen du.

Espero dugu gure web orrira egindako bisita, harreman egonkor eta arin baten hasiera izatea, eta gure Fakultatea bizitzen laguntzea.

Itziar Alkorta

Dekanoa