Ongi etorri Bilboko Hezkuntza Fakultatearen webgunera. Hemen irakaskuntza eskaintzari, ordutegiei, egutegiei eta dokumentazioari buruzko informazioa aurkituko duzu, bai eta ikerketa jarduerei, zerbitzuei eta gure eguneroko jarduerari buruzkoa ere. Gainera, Fakultateari, Sailei, irakasleei eta unibertsitateari buruzko informazioa eskaintzen da.

Fakultatea 2010etik Leioako campusean kokatuta dago, eta Bizkaian XIX. mendearen erdialdetik datorren maistrak eta maisuak prestatzeko tradizio luzea biltzen du. Gaur egun, irakasleen prestakuntza eta ikerketa jarduerarekin batera, ezagutza transferentziako eta irakasleen prestakuntzako jarduera ugari hartzen ditu. Unibertsitate komunitate hau osatzen dugun pertsonak, 160 irakasle eta ikerlari baino gehiago eta administrazio eta zerbitzuetako 22 langile, gure herrialdeko hezkuntzaren etengabeko hobekuntzaren alde eta trantsizio ekosozial justu batekin konprometitutako fakultate inklusibo eta abegitsua lortzeko lan egiten dugu.

Gaur egun, Bilboko Hezkuntza Fakultatean (UPV/EHU) Lehen Hezkuntza, Haur Hezkuntza (azken bi hauek eleanitzak ere) eta Gizarte Hezkuntzako Graduak irakasten dira. Horrez gain, master eta graduondoko eskaintza zabala dago, hezkuntzaren arloko etorkizuneko ikertzaileen prestakuntza eta garapena zein profesionalen etengabeko prestakuntza sustatzen dutenak.

Fakultate dinamikoa da eta erreferentea hezkuntza ikerketa eta berrikuntzako hainbat esparrutan, bai eta ezagutzaren transferentzian ere. Ikerketa taldeek Hezkuntzaren inguruko ezagutza-arlo ugari hartzen dituzte barne. Horren emaitza da era askotako proiektuak garatzea, tokiko zein nazioarteko mailan inpaktu handia dutenak hezkuntza-komunitate zientifikoaren barruan. Emaitza hauek etengabe transferitzen zaizkie hezkuntza-komunitateari eta gizarteari.

Irakaskuntza eta ikerketa garatzeko, hezkuntza berrikuntzarako eta kalitatezko hezkuntza garatzeko azpiegiturak ditugu. Horien artean nabarmentzen dira zientzia laborategiak, eskola baratzea, putzua eta 0-3 urteko tailerra. Bestalde, gure hezkuntza komunitatearen nazioartekotzea, ikasleena, irakasleena eta ikertzaileena, gure funtsezko ardatzetako bat da, eta eskaintza zabala du ERASMUS, SICUE eta abarren esparruan.

Eta instalazio eta zerbitzu-sare hauekin batera, gure jarduera paradigma aldaketa baterantz joateko premiazko beharrak gidatzen du: pertsona eta komunitate guztientzat bizitza duina bermatu nahi dugu, jada mugak gaindituta dituen eta belaunaldi gazteenentzat kontserbatzera behartuta gauden planeta batean.

Testuinguru honetan, gure helburu nagusia Hezkuntza arloan profesional gaitasundunak prestatzea da. Gizartearekin konprometitutako pertsonak, gaur egungo eta etorkizuneko hezkuntzaren erronkei modu eraginkor eta berritzailean erantzuteko gai direnak. Gainera, hezkuntzaren arloan topagune, hausnarketa eta kalitatezko ikerketa gune izateaz gain, gizarte, hezkuntza eta erakunde eragileekin sinergiak eraikitzea sustatzen dugu, kalitatezko hezkuntza, jasangarria eta ebidentzia zientifikoan oinarritua eraikitzeko, baina gizarte eta ingurumen justiziaren printzipio argiekin.

Joserra Díez

Dekanoa