Desgaitasunak edo/eta hezkuntza premia bereziak dituzten unibertsitateko ikasleen harrera

Egokitzapenak eskatzeko jarraibideak

Matrikula egin ondoren, zerbitzuan lanean diharduten teknikariak harremanetan jartzen dira ikasleekin, zerbitzuari berari, beharrezko orientabideei eta eskura dauden baliabideei buruzko informazioa eskaintzeko.

Ikaslearen datu bilketa unibertsitateko webgunean dagoen GAUR aplikazioaren bitartez ikasleak gauzatu behar duen eskaeraren bidez egiten da. Behar izanen balorazioa egin ondoren ikasketak egiteko behar dituzten baliabideak  ikasleei eskaintzen zaizkie.

Egokitzapenak eskatzeko, prozedura honi jarraitu behar zaio:

  1. Gaur aplikazioan sartu UPV/EHUren web-orriaren bidez: http://gestion.ehu.eu/gaur. Sartu ahal izateko, matrikularen agiriarekin batera ematen diren erabiltzailearekin eta pasahitzarekin identifikatu behar da.
  2. Aplikazioaren menuan aukeratu "Desgaitasun zerbitzua" atala.
  3. "Desgaitasun zerbitzua" atalaren barruan, hautatu "egokitzapen eskaera" atala.
  4. Formularioa bete. Horretarako, honako hauek egin behar dira:
    • Desgaitasun ziurtagiria eta/edo ikaslearen egoera egiaztatzen duten txosten medikoak edo psikopedagogikoak kargatu.
    • Diagnostikoari buruz eskatzen diren datuak sartu.
    • Formularioan agertzen den zerrendan egokitzapenak aukeratu.
    • Onartu datuak babesteko klausula eta gorde.
  5. Zerbitzuak eskaerak baloratuko ditu.
  6. Ikasleak "Egokitzapen eskaeraren kontsulta" atalaren bidez kontsultatu ahal izango du eskaera onartu den ala ez.

Eskaera formularioa GAUR aplikazioan aktibatuko da ikasle bakoitzarentzat, matrikula egin eta hurrengo egunetik aurrera. Maiatzaren 31ra arte eskatu ahal izango dira egokitzapenak.

Komeni da eskaera ahalik eta lasterren betetzea, klaseak hasi aurretik beharrezko baliabideak eta egokitzapenak izateko.