Jardunaldietan bederatzi hitzaldi eskeiniko dira, bakoitza 30 minutu ingurukoa eta bi egunetan banatuta, non disziplina ezberdinetako ikuspuntu geologikoak eskeiniko diren.

Lehen hitzaldia Estibaliz Apellaniz Dreak eskeiniko du, UPV/EHUko Estratigrafia eta Paleontologia saileko irakasle titular jubilatuak. Bere hitzaldia geologia zientzia gisaren inguruan izango da, hau da, zientzia honen bidez aztertzen direlako denbora geologikoan zehar eragin duten mekanismoak, eta hauen azterketak oraina ulertzen laguntzen dute, baita etorkizuna aurreikusten ere.

Bigarren hitzaldian Eneko Iriarte Dreak, Burgoseko Unibertsitateko Giza Eboluzioaren Laborategiko geologoak azalduko du nola geologiak aintzinako klimaren eboluzioa aztertzen laguntzen duen, denboran zehar emandako aldaketa klimatiko handien zergatiak ulertuz eta nola aldaketa hauek organismo guztiengan eragin duten, baita gaur egungo eta desagerturiko hominidoengan..

Harrilur geoteknia eta Euskadiko Geologoen Elkarte Ofizialeko Virginia Ormaetxea geologoak gure inguruan eragiten duten arrisku geologikoei buruz hitz egingo du: lur-erorketa eta labainketa arriskuetaz ez bakarrik, arroka azido-sulfatatodun inguruko arriskuez ere hitz egingo digu. Bere hitzaldian zein arrisku eragin dezaketen, hauek aurreikusteko zein teknika dauden eta nola ekidin azalduko digu.

Luis Carcavilla doktoreak, Espainiako Geologia eta Meatzaritza Institutoko (IGME) zientzialari titularrak ondareaz hitzegingo du. Bere hitzaldia geologiak ondarean duen paperaren inguruan izango da, Gizateriaren Ondarea diren leku gehienek izaera geologiko nabarmena dutelako. Horretaz gain, naturaren babesean eman ziren lehen pausoetan geologiak izan zuen garrantzia azalduko du, gaur egun zertan aberasten duen Ondare Geologikoak Ondare Naturala, eta hau nola kudeatzen den.

Maialen Sagarna Dreak, arkitektua eta UPV/EHUko Gipuzkoako Ingenieritza Eskolako Arkitektura saileko irakasleak, geologiaren eta arkitekturaren artean dagoen erlazioaz hitz egingo du. Eraikuntzako materialen jatorriaz gain, bere portaera mekanikoaz, egituraren ezagutzaz eta alteratzen diren moduan geologiarekin duten erlazioa azalduko du. Horretaz gain, eraikinen kokapen geologikoaren garrantzia aipatuko du.

Artea eta geologiaren arteko lotura Joaquín del Val geologoak egingo du. Joaquín “Arte y Geología” blog eta Facebookeko orriaren egilea da. Bere hitzaldia arte garaikidearen eta geologiaren arteko loturaz izango da, azken hamabost urteetan hainbat artistek – asko nazioartean ezagunak – Lur Zientzietan, eta batez ere geologian, topatu baitute insipirazioa.

Ostiraleko jardunaldia baliabide naturalen ingurukoa izango da, Iñaki Antigüedad geologo eta UPV/EHUko Geodinamika saileko katedradunak hasiko du. Bere hitzaldian baliabide geologikoen inguruan dagoen ezagutza faltaz hitzegingo du. Gizartearen parte handi baten ustetan baliabide geologikoak zapaltzen eta ustiatzen ditugun baliabideak soilik dira (hidrokarburoak edo industria-arrokak eta mineralak), baina errealitatean baliabide goelogikoak ere badira beste baliabide batzuk, paisaia, lurzorua, ura edo gatza bezalakoak, gure gizartearen garapenerako berdin garrantzitsuak. 

Raoul Servet geografo eta paisajista, Araudi Aholkularitzako zuzendaritza taldeko eta Fundicot-eko kide da. Bere hitzaldia geomorfologian, erliebearen formak ulertzeaz arduratzen den zientzian, oinarrituko da, azken hamarkadetan paisaiaren azterketa integratuak egiteko aplikatzen dena. Geomorfologiak paisaiak sailkatzeko hainbat metodo ezartzen ditu, eta paisai unitateak mugatzeko oinarrizko tresna da, paisaiak aztertu eta planifikatzeko garaian geologo eta geomorfologoen lana ezinbestekotzat bihurtuz. Gainera, lurralde antolakuntzaren ikuspuntutik gaur egungo araudiaren berrikusketa bat egingo du. 

Azken hitzaldian Asier Hilario doktoreak eta Euskal Kostaldeko Geoparkeko zuzendari zientifikoak geologia baliabide ekonomikoaz sakonduko du. Hainbat paisaia eta elementu geologikoek kalitatezko helmuga turistikoko potentzialaz hitz egingo du. Geologia bertan egon ohi da eta harritu egiten du. Munduko turismo helmuga ezagunenetako batzuk geologia hutsa dira, milioika bisitari dituzte eta, askok ez dakiten arren, geologia horrek interesa sortzen die. Bere esperientziatik, geoturismoaren gako eta aukeretaz hitz egingo du turismo helmuga berritzaile eta jasangarriak sortzeko, Lur Zientziak ezagutaraziz eta gozatuz.