Lan Harremanetako eta Gizarte Langintzako Fakultatearen buletina komunikazio-tresna gisa sortu zen, Fakultatean irakaskuntza, ikerketa, transferentzia eta dibulgazio arloetan garatzen eta gertatzen den guztia ikusgai jartzeko eta partekatzeko asmoz. Bai Fakultateko kideentzat, bai gizartearentzat oro har zuzenduta dago, eta honako lema hau du inspirazio-iturri: Berdintasunaren eta aberastasunaren banaketa zuzenaren alde.

Fakultateak irakaskuntza eskaintzen du Bizkaiko (Leioa) eta Arabako (Gasteiz) campusetan. Ibilbide luzeko bi ikastegi elkartuz sortu zen Fakultatea : Gizarte Langintzako Unibertsitate Eskola —1964ko martxoan Gasteizen sortua— eta Lan Harremanetako Unibertsitate Eskola, 1989an sortua. Hasieratik, bi ikastegiek gizarte-justiziarekin, lan-eskubideekin eta ongizate kolektiboarekin konprometitutako profesionalen belaunaldiak prestatu dituzte.

Gaur egun, Lan Harremanetako eta Gizarte Langintzako Fakultatea erreferentea da Euskal Autonomia Erkidegoan, lan-harremanen eta gizarte-langintzaren arloetako prestakuntzan. Bereziki nabarmena da lan-baldintzei, gizarte-ongizateari, genero-berdintasunari eta ingurumen-iraunkortasunari buruzko hausnarketa- eta ikerketa-proiektuetan eta espazioetan parte hartzen duen modua.

LHGL Fakultatearen Newsletterra, 2018an abiatua, sei hilean behin argitaratzen da. Unibertsitateko komunitate osoaren parte-hartzerako irekita dago —ikasleak, AZPko langileak eta IIPkideak barne—, eta eduki eta informazio esanguratsuak proposatzeko aukera eskaintzen die.

Ikuspegiak / Perspectivas atalean, Fakultateko kideei gonbidapena egiten zaie egungo gaietan beren ikuspegia partekatzeko. Atal horretan, maila handiko ikerketa-proiektuen dibulgaziozko bertsioak ere jasotzen dira, zeinen emaitzak aldizkari indexatuetan, liburuetan eta prestigio handiko argitaletxeetako kapituluetan argitaratzen diren. Halaber, buletinak lan-harremanen eta gizarte-langintzaren esparruetako profesionalekin elkarrizketa sustatzen duten atal bereziak ere jasotzen ditu, ezagutza eta esperientziatik abiatuta eztabaida publikoa aberasteko helburuarekin.

Horrez gain, buletinak lanaren eta gizarte-ongizatearen arloko mintegi, jardunaldi eta bestelako ekitaldien berri ere ematen du, non sektoreko aditu eta eragile esanguratsuek parte hartzen duten.