Unibertsitateko etapa ibilbide akademikoko eta pertsona baten bizitzako etaparik zirraragarrienetako bat da. Hazkunde-aldia da, ez bakarrik intelektuala, baita pertsonala eta soziala ere: aukeratu duzuna aztertzen hasi behar duzu, airez aldatu, jende berria ezagutu... "Aldaketa asko dakartzan garaia da, eta ingurune berri batera egokitzeak, presio sozialak, lan-kargak eta/edo etorkizunari buruzko ziurgabetasunak zaurgarritasuna sor dezakete ikaslearengan, haren osasun mentala arriskuan jarriz", azaldu du Andone Sistiaga Psikologia Fakultateko irakasle eta Laguntza Psikologikorako Zerbitzuko zuzendariak.

Zerbitzu horrek, urriaren 10ean osasun mentaleko arazoen inguruan kontzientziatzeko ospatzen den Osasun Mentalaren Munduko Eguna dela eta, unibertsitateak ikaslearen ongizate psikologikoaren alde egiten duen lanari balioa eman nahi izan dio. "Osasun mentala unibertsitateko etapa ahalik eta gehien aprobetxatzeko oinarria da", gaineratu du Sistiagak.

Hori dela eta, osasun mentala zaintzeko hamar gomendio praktiko biltzen dituen dekalogo bat egin du zerbitzuak, banakakoa zein taldekoa, eta EHUn eskuragarri dauden baliabideekin lagundu dute, osasun mentala zaintzen lagun dezaketen aholku horiek praktikan jartzea errazteko.

1. HARREMAN POSITIBOAK LANDU
Babestu zaitzaten eta argi eta garbi hitz egin dezakezun pertsonez inguratu zaitez. Eraiki harreman osasuntsuak jardunbide egokiak erabiliz zure harreman afektibo-sexualak eta adiskidetasunezkoak hobetzeko.
«Desira, erotismoa eta tratu ona» tailerra.

2. ERRUTINA ETA ELIKADURA OSASUNTSUAK MANTENDU
Ikasteko, atseden hartzeko eta aisialdirako ordutegiak antolatu, akidura saihesteko. Modu orekatuan elikatzeak eragin positiboa du gogo-aldartean eta kontzentrazioan.
«Osasun mentala indartuz: psikohezkuntza prebentziorako» hitzaldi-zikloa.

3. JARDUERA FISIKOA ERREGULARKI EGIN
Zure gorputza mugitzeak estresa murrizten laguntzen du eta gorputzaren eta buruaren arteko oreka osasuntsua lortzen laguntzen du.
EHUkirola. Lehia eta jolas ekimenen programa zabala.

4. AISIALDIRAKO TARTEA BILATU
Eskaini eguneko uneak hobbiei, naturari, arteari edo gozatzen dituzun jarduerei
EHUkultura. Ikastaro, tailer eta jarduera eskaintza zabala.

5. DENBORA GORDE DESKONEKTATZEKO
Gelditzea ere beharrezkoa da. Gelditzeak eta atseden hartzeak emozioen erregulazioa errazten du, estresa eta antsietatea murrizten ditu, eta bizitza akademikoaren, pertsonalaren eta sozialaren arteko oreka indartzen du.
Arnasa hartu, sentitu, egon: Mindfulness tailerra.

6. GEHIEGIZKO AUTOEXIJENTZIA SAIHESTU
Onartu huts egitea ikaskuntzaren parte dela eta beti ezin dela perfekzioa aurkitu. Zentratu prozesuan ikasten eta gozatzen, zure lorpen guzti-guztiak baloratuz.
«Garatu zure adimen emozionala: ongizate pertsonal eta akademiko/profesionalerako estrategiak» tailerra.

7. ESTRESA KUDEATZEN IKASI
Arnasketak, erlaxazioak edo meditazioak tentsioa askatzen lagun diezazukete.
«Estresetik konponbideak aurkitzeko gaitasunera » tailerra.

8. GALDETU, ENTZUN, LAGUNDU
Izan zaitez osasun-agentea. Adi egon ondoezaren seinaleei zure ingurukoengan; galdera zintzo batek marka dezake aldea.
Unibertsitatearen testuinguruan suizidioa prebenitzeko Gatekeeper trebetasunak.

9. BEHAR DUZUNEAN LAGUNTZA ESKATU
Bilatu laguntza lagunengan eta familiarengan, eta ez izan beldurrik laguntza profesionala eskatzeko. Arreta Psikologikorako Zerbitzuak banakako arreta psikologikoko saioak eskain diezazkizuke.
Arreta Psikologikorako Zerbitzua eta Entzute eta Erantzute Sarea.

10. IZAN BIHOZBERA ZEURE BURUAREKIN
Baloratu egunero zure lorpenak eta alderdi positiboak: aitortu zure lorpenak, ospatu zure aurrerapenak eta praktikatu autoerrukia.

"Arreta Psikologikorako Zerbitzutik gomendio sinple horiek praktikan jartzera animatzen dugu ikaslea, sinetsita baikaude osasun mentalean inbertitzea bizi-kalitatean eta osasun mentaleko arazoen prebentzioan inbertitzea dela etorkizunean", gaineratu du zuzendariak.

Dekalogoa hemen deskarga dezakezu.