• Gehienez 2 beka.
• Beka bakoitzeko, gehienez 3.000 €.
• Mentoria, proiektua garatzeko.
• Eskabideak: 2026ko urriaren 1etik 29ra, biak barne.

Zure sormena, abiapuntu

Musika, arte eszenikoak, arte bisualak, arkitektura, literatura, arte ederrak edo ondarea: aurkeztu zure proposamena eta eman forma zure kultura proiektuari. Bakarka zein taldean parte har dezakezu, euskaraz edo gaztelaniaz aurkeztutako proiektu batekin.

Nork parte har dezake?

2026–2027 ikasturtean EHUko Arabako Campusean gradu, graduondoko edo doktoregoko ikasketetan matrikulatuta dauden ikasleek. Taldean aurkeztuz gero, kide guztiek bete behar dute baldintza hori. Ikasle bakoitzak proiektu bakarrean parte har dezake.

Zer eskaintzen du bekak?

Proiektua gauzatzeari zuzenean lotutako gastuak estaltzeko laguntza ekonomikoa eta lana garatzeko mentoria. Diruz lagundu daitezkeen gastuen artean daude, adibidez, material suntsikor ez-inbentariagarria eta hedapen gastuak.

Oinarriek hiru ordainketa aurreikusten dituzte: 1.000 € 2026ko abenduan, beka emateko ebazpena argitaratu ondoren; 1.000 € 2027ko martxoan, proiektuaren txostena entregatu ondoren; eta 1.000 € 2027ko maiatzean, lana jendaurrean aurkeztu ondoren. Zenbatekoei indarreko atxikipenak aplikatuko zaizkie.

Nola aurkeztu eskabidea?

Aurkeztu eskabidea 2026ko urriaren 1etik 29ra, EHUko erregistro elektronikoaren bidez. Hautatu Arabako Campuseko Errektoreordetza jasotzaile gisa eta adierazi «kultura Bekak» azalpenean, oinarrietan jasotzen den bezala.

Eskabidea eskatzaileak zuzenean aurkeztu behar du. Oinarriek sektore publikoko beste erregistro elektroniko batzuen bidez aurkeztea ere onartzen dute, eta, salbuespenez, EHUko erregistro gaietan laguntzeko bulegoetan aurrez aurre.