Pablo Eguia, UPV/EHUko Energia Elektrikoko Sistemen Ikerketa Taldeko (GISEL) ikertzaile nagusia, Naiz hedabideak elkarrizketatu du azkenaldian Iberiar penintsulan izandako argindarraren etenari buruzko azalpen teknikoa emateko. Elkarrizketan, Eguíak azpimarratu du arazoa ez dela teknologia jakin batean, baizik eta sistema elektrikoaren sendotasun faltan. Bere esanetan, ezinbestekoa da inertzia eta tentsio-kontrolerako mekanismoak edukitzea, batez ere energia berriztagarrien integrazio gero eta handiagoak sistemari berez inertziarik eskaintzen ez dion testuinguru batean. Horrez gain, sistemaren erreakzio-gaitasuna mugatua izan zela aipatu du, eta egonkortasuna indartzeko konponbide teknikoak badaudela, hala nola konpentsatzaile sinkronoak, nahiz eta gaur egun ez den haien ezarpena nahitaezkoa. Eguíak gaineratu du Iberiar penintsulako sistema elektrikoak kanpoarekiko energia-truke gaitasun mugatua duela, eta horrek zaildu egiten du larrialdien kudeaketa. Irakurri elkarrizketa osoa Naiz atarian.