Euskal Irrati Telebistak Euskal Herriko Unibertsitatearekin (UPV/EHU), Deustuko Unibertsitatearekin eta Mondragon Unibertsitatearekin sinatu dituen hitzarmenen ondorioz, 2019/2020 ikasturtean prestakuntza praktikoa EiTBn, Euskal Telebistan, Eusko Irratian eta eitb.eus-en egiteko aukera ematen die EiTBk unibertsitate horietako ikasleei. Gainera, UPV/EHUko Gizarte eta Komunikazio Zientzien Fakultateko ikasleei formakuntza duala ere eskainiko zaie, hau da, praktikak heziketa-zentroan eta enpresan txandakatzen dituena.

Prestakuntza praktiko horien helburua ikasleak lan mundura hurbiltzea da. Horretarako, enpresan egiten den eguneroko lana ezagutu ahalko dute bekadunek, eta, horrez gainera, aukeratutako lanbidean aritzeko beharrezko ezagutzak, trebetasunak eta abileziak irakatsiko dizkiete, baita gaitasun osagarriak (lantaldean aritzea, ardura...) ere. Izan ere, gaur egungo produkzio-sektorean lan egiteko ezinbestekoa da arlo horietan ere trebatzea.

Lankidetza bekak 4 eta 6 hilabete artekoak izango dira, eta bekadunek 300 euro jasoko dituzte hilero. Formakuntza duala, ordea, urtebetekoa izango da, eta lanaldi erdikoa eta bekadunek hilero Lanbide Arteko Gutxieneko Soldataren parte proportzionala jasoko dute. Gaur egun, 900 eurokoa da.