Enpresa Institutuak eta Enpresaren Ekonomia Ikertu eta Garatzeko Emilio Soldevilla Fundazioak (FESIDE) ekitaldi bateratua egingo dute martxoaren 13an, EHUko Ekonomia eta Enpresa Fakultateko Areto Nagusian (Sarriko), institutuaren 60. urteurrena eta fundazioaren 25. urteurrena ospatzeko. Joxerramon Bengoetxea EHUko errektorea buru dela, bertan elkartuko dira erakundeetako goi-ordezkariak eta esparru akademiko, instituzional eta enpresarialeko ordezkariak.
Topaketaren bidez, ezagutza aplikatua, ikerketa zorrotza eta horrek gizartean duen benetako eragina aintzat hartu nahi dira, eta urteurrenak probestuz, baita bi erakundeek Enpresaren Ekonomian erreferente gisa duten zeregina indartu ere.
Ekitaldiaren une nagusietako bat Enpresaren Ekonomiako Doktore Tesi Onenaren I. Emilio Soldevilla Saria izango da. Espainia osoko unibertsitateetan defendatu diren eta bikaintasun-aipamena duten doktore-lan onena saritu da, eta 7.000 euroko zuzkidurarekin. Saria antolatuz, FESIDEk ikerketa-bikaintasuna eta talentu akademikoa bultzatzearekin duen konpromisoa agerian jartzen du du.
Ekitaldian zehar, Covadonga Aldamiz-echevarría Enpresa Institutuko zuzendaria eta Arturo Rodríguez FESIDEko presidentearen arteko elkarrizketa egingo da, Pilar Kaltzada kazetariak moderatua. Ondoren, bigarren solasaldi bat izango da, Ainara Basurko Bizkaiko Foru Aldundiko Ekonomia Sustatzeko foru diputatua eta Adolfo Rebollo Ingeteameko CEOaren artean, Aitziber Lertxundi irakasleak (EHU) gidatuta, Enpresaren Ekonomiaren gaur egungo erronken inguruan eta ezagutza aplikatuak eraldaketa ekonomiko eta sozialean duen zereginari buruz.
Ospakizunaz haratago, unibertsitatearen, enpresaren eta erakundeen arteko topaketa eta elkarrizketarako gune gisa antolatu da ekitaldia, errealitate ekonomiko eta sozialarekin lotutako ezagutza-eredu hau eraikitzen jarraitzeko abiapuntu gisa. Bi erakundek azpimarratu dutenez, “bikaintasun akademikoak zentzu osoa hartzen du gizartearen zerbitzura jartzen denean eta gizartearen aurrerabideari laguntzen dionean”.
Ekitaldi horren bidez, Enpresa Institutuak eta FESIDEk berretsi egiten dute hainbeste hamarkadatako ibilbidearen ondoren bere horretan dirauen asmo partekatu bat: enpresarekin hitz egiten duen eta gizarte prestatuago, kritikoago eta iraunkorrago bati lagunduko dion ikerketa zentzuduna bultzatzea.
Izena eman hemen
Enpresa Institutuari buruz
Sortu zenetik, Enpresa Institutua – Enpresari Aplikatutako Ekonomia Institutua erreferentea da Enpresaren Ekonomia ikuspegi aplikatu, zorrotz eta enpresa-errealitatearekin konektaturen sustapenean. Euskal Herriko Unibertsitatearen unibertsitate-institutuak Sarrikoko campusean (Bilbo) du egoitza. Enpresa-zuzendaritzarekin lotutako hainbat sailetako irakasle doktoreak biltzen ditu, eta ikerketan, graduondoko prestakuntzan eta ezagutzaren transferentzian lan egiten du, aurrerapen akademikoak enpresa- eta antolaketa-praktikara hurbiltzeko.
FESIDE Fundazioari buruz
Enpresaren Ekonomiaren Ikerketa eta Garapenerako Emilio Soldevilla Fundazioaren (FESIDE) helburua da ikerketa, prestakuntza aurreratua eta talentuaren garapena sustatzea, bai ikertzaileena bai enpresena, Enpresaren Ekonomiaren esparruan. Finantza-, merkataritza- eta antolaketa-ikuspegitik, enpresa-kudeaketara bideratutako azterlanak, proiektuak eta jarduera akademikoak bultzatzen ditu. Bere ibilbidean zehar, FESIDEk doktorego-tesiak, ikerketa-proiektuak eta prestakuntza-ekintzak babestu ditu, ezagutza aplikatua indartzen eta gizartean eragiten lagunduz.
Deje una respuesta