EHUren xede nagusia da unibertsitateko goi mailako irakaskuntza publikoa garatzea, kalitatean eta bikaintasunean oinarrituz, ezagutza transmititze eta prestakuntza osoa sustatze aldera.

EHUk hasiera-hasieratik egin du irakaskuntza bikaintasunaren eta hezkuntza berrikuntzaren aldeko apustua, eta euskal unibertsitate publikoaren beraren historiaren parean garatu da. Hain zuzen, gure i3 hezkuntza eredua horren isla da.

Eredu horren esparruan, EHUk hainbat erakunde programa garatu izan ditu metodologia aktibo eta berritzaileak sustatu, oinarrizko eta aurreratuak diren hezkuntza berrikuntzako taldeei lagundu, irakasleak trebatu eta euren irakaskuntza garapena piztu, irakaskuntza jarduera ebaluatu eta ikastegi eta titulazioak egiaztatzeko. Horretarako, hainbat kudeaketa tresna garatu dira, baita laguntza eta orientazio materialak ere, elkarrekin eraikitzeko ahalegin handia eginez.

Ildo horretan, GAITUZ programa laguntza tresna da, eta helburu du EHUko IRIei laguntza ekonomikoa ematea, goi mailako irakaskuntzan irakaskuntza berrikuntzarekin lotutako jarduerak finantzatu ahal izateko.

GAITUZ programaren xedea da EHUren lehentasun instituzionalekin lerrokatutako gaitze eta eguneratze pedagogikoa sustatzea, irakaskuntza kalitatea eta ikasleen ikaskuntza esperientzia hobetzeko. Deialdi honek irakasleen hasierako eta etengabeko prestakuntza sendotzea bilatzen du, irakaskuntza praktika hobetzen duten prestakuntza eta berrikuntzara zuzendutako formazio ekintzak finantzatuz, betiere, unibertsitatearen premiei erantzuteko: ebidentzian oinarritutako berrikuntza didaktikoa, ebaluazio formatiboa, gaitasun digitalak, elebitasuna/eleaniztasuna eta inklusioa.

GAITUZ programak gure i3 hezkuntza eredua indartzeko eta sendotzeko tresna izan nahi du; beraz, diruz lagundutako ekintza guztiek eredu horrekin lerrokatuta egon behar dute.

Horretarako, guztira 60.000 euro jarriko dira, betiere EHUko Gradu eta Eraldaketa Digitalerako Errektoreordetzaren aurrekontuan behar adina aurrekontu kreditu badago.

GAITUZ laguntza eskatu ahal izango dute deialdia argitaratzen den egunean eta laguntza jasoko duen ekintza egiten den unean kontratua indarrean duten EHUko irakasle eta ikertzaileek.

Ezin izango dute GAITUZ deialdiko laguntza eskatu egoera hauetako batean daudenek:

• a) Epai irmoz dirulaguntza edo laguntza publikoak ez jasotzera kondenatuak izan badira.

• b) Zorrak badituzte dirulaguntzak itzultzeko dauden betebeharrak direla eta.

• c) Ebazpen irmo bidez dirulaguntzak ez jasotzera zigortuak izan badira hori xedatzen duten legeen arabera.

• d) Eskatutako laguntzaren xede den jarduera soldatapekoa bada.

• e) Eskatutako laguntzaren xede den jardueraren kontzeptuetako bat osorik edo zati batean beste erakunde, entitate edo ikastegi publiko edo pribatuen edo deialdi espezifikoen bidez finantzatu badira. Hau da, finantzaketa bikoitza saihesteko, deialdi honekin diruz lagundutako jardueraren kontzeptu bera ezingo da izan beste laguntza batzuen xede. Hala ere, jarduera beraren kontzeptu desberdinek dirulaguntza jaso ahalko dute.

GAITUZ deialdiaren bidez 2026an zehar egingo diren honako jarduerak lagunduko dira (urtarrilaren 1etik abenduaren 31ra):

• a) Goi-mailako irakaskuntzarekin eta hezkuntza berrikuntzarekin erlazionatutako kongresuetara joateko (ez dira diruz lagunduko ikerkuntzarekin zerikusia duten kongresuak ).

• b) Goi mailako irakaskuntzan hezkuntza berrikuntzarekin erlazionatutako artikuluak publikatzera bideratutako zerbitzuak.

• c) Goi mailako heziketan hezkuntza berrikuntzako proiektuen esparruan sortutako irakaskuntza materiala argitaratzea, betiere unibertsitate komunitate osoaren eskura modu irekian jartzen badira.

• d) Goi mailako irakaskuntzan irakasleen trebakuntza eta berrikuntza hobetzeko prestakuntza ikastaroetan parte hartzea, baldin eta prestakuntza hori ez badu EHUk eskaintzen SAE/HELAZen hezkuntza hobekuntza eta berrikuntzarekin lotutako arloen inguruko trebakuntza programetan.

Deialdi honetan, pertsona bakoitzak eskari bakarra aurkeztu ahal izango du.

4.1. 2026ko urtarrilaren 1etik 2026ko abenduaren 31ra bitartean gauzatzen diren jarduerak diruz lagunduko dira, honako modalitate hauetako batean:

• a) Kongresuetan parte hartzen den kasuan, inskripzio, garraio, egonaldi, mantenuarekin eta materialak inprimatzearekin (posterrak) lotutako gastuak diruz lagundu ahalko dira. Zenbatekoak gehienez honako hauek izango dira:
• Espainiako Estatuko herrietan egindako kongresuetan: 600 € eskaera bakoitzeko.
• Europako herrietan egindako kongresuetan: 1.200 € eskaera bakoitzeko.
• Europatik kanpoko herrietan egindako kongresuetan: 1.200 € eskaera bakoitzeko.

Gehienez ere jarduerako egunak finantzatuko dira, gehi jardueraren aurretiko bat (mantenu erdia eta ostatua) eta amaitu ondorengo beste bat (mantenu erdia besterik ez), betiere egin beharreko bidaiak hala justifikatzen badu.

Kongresua Euskal Autonomia Erkidegoan egingo bada, ostatu gastuak behar bezala justifikatu beharko dira jarduerak egun batean baino gehiagotan egingo badira, arau orokorra izango baita halakoetan eguneroko joan-etorriak ordaintzea.

Kongresurako izena ematearen barruan mantenu erdia sartuko balitz, kasuan kasu, bazkari edo afariari dagokion eguneko dietaren ordainketa besterik ez da emango.

• b) Goi mailako irakaskuntzan hezkuntza berrikuntzarekin lotutako artikuluak argitaratzeko zerbitzuei dagokienez, artikuluak itzuli eta berrikustearekin lotutako gastuak diruz lagundu ahalko dira. Ez dira diruz lagunduko aldizkarietan argitaratzeko tasak.

Artikuluak argitaratzeko zerbitzuetan honako zenbateko hauek emango dira gehienez:

• Itzulpenak: gehienez 500 €
• Testuen berrikuspena: gehienez 500 €

• c) Goi mailako irakaskuntzan hezkuntza berrikuntzako proiektuen esparruan sortutako irakaskuntza materiala argitaratzeko, edukiak egitearekin lotutako gastuak diruz lagundu ahalko dira (euskarri grafikoen diseinu eta maketatzea, webguneak, etab.).

Edukiak egiteagatik emango den gehieneko zenbatekoa 1.000 eurokoa izango da.

• d) Goi mailako irakaskuntzan irakasleen gaikuntza eta berrikuntza hobetzeko prestakuntza ikastaroen kasuan, inskripzio, garraio, egonaldi eta mantenuari lotutako gastuak diruz lagundu/finantzatu ahalko dira. Gehienez 600 euro emango dira ikastaro bakoitzeko.

4.2. Deialdi honen estalduratik kanpo geratuko dira:

• Bisak lortzeko gastuak.
• Transakzioek eragindako banku komisioak, eta beste finantza gastu batzuk.
• Aseguru pribatuak.
• Deialdiaren helburuarekin lotuta ez dauden beste gastu batzuk.

4.3. Ibilgailu propioa salbuespen gisa erabiliko da, eta 1.000 kilometro, gehienez, joan-etorriko ibilbidean. Kilometrajeagatiko tarifa aplikatuko da, barne araudiaren arabera. Norberaren ibilgailuaren erabilera hertsiki mugatuko da IRIen arloko errektoreordetzak eta gerentziak zerbitzuengatiko kalte ordainei buruz hartutako erabakiak ezarritako arautegian finkatutakora. Bidesariak eta kilometroak ordainduko dira, baina ez da ordainduko erregaia.

Edozelan ere, aldez aurretik baimena eskatu beharko da, laguntza eskatzeko eskaera egiten denean, arrazoiak azalduta eta kalkulatutako aurrekontua zehaztuta. Ez dira finantzatuko eskatu eta deialdia ebazteko unean baimendu ez diren ibilgailu propioaren erabilerak eragindako gastuak.

Eskatzaileari jakinaraziko zaio, posta elektronikoz, ibilgailua erabiltzeko eskaera onartzen den ala ez.

4.4. Aurreko ataletan adierazitako gehieneko zenbatekoak gorabehera, laguntzen zenbatekoak eta horiek justifikatzeko moduak bat etorriko dira joan‑etorria hastean indarrean dagoen EHUren barne arautegiak zerbitzuengatiko kalte ordainei buruz dioenarekin. Indarrean dagoen araudia, honako esteka honetan argitaratuta dago: http://www.ehu.eus/es/group/iip/zerbitzu-ordaine

4.5. Jarduera jakin baterako laguntza esleitu ondoren, ezin izango da beste jarduera batekin ordezkatu.

5.1 Aurkeztu beharreko agiriak.

• a) Eskaera bakar bat, inprimaki arautuan eta eskatzaileak eta saileko zuzendariak elektronikoki sinatua. Eskaeran jasoko dira:

  • i. Eskatzailearen datuak.

  • ii. Eskatutako laguntzaren xede den jardueraren datuak (izena, jarduera antolatzen duen erakundea, egingo diren egunak, etab.) eta jarduera plan hori garatzeko zenbatetsitako aurrekontua, deialdi honen 4. oinarrian adierazitako irizpideekin bat.

  • iii. Hala badagokio, deialdi honetan eskatutako laguntzaren xede den jarduera bera finantzatzeko beste erakunde, entitate edo ikastegi publiko edo pribatuei eskatutako laguntza edo deialdi espezifikoak adieraztea, eskaera horietan eskatutako jardueraren kontzeptuak adieraziz.

  • iv. Jardueraren justifikazioa: eskaera orrian jardueraren justifikazioa egingo da, bere irismena eta inpaktua azalduz eta irakaskuntza berrikuntzarekin eta EHUko i3 estrategiarekin nola lerrokatzen den azalduz

  • v. Eskatzaileak sinatutako zinpeko adierazpena, 2. oinarrian aurreikusitako egoeretan ez dagoela eta deialdi honetan eskatutako jarduerei dagokienez ez duela kontzeptu berberengatik dirulaguntzarik jasotzen adieraziz, beste erakunde edo zentro publiko edo pribatu batzuen edo deialdi espezifikoen bidez.

  • vi. Hala badagokio, eskatutako aktibitatea egiteko ibilgailu pribatua erabiltzeko baimen-eskaera.

6.1 Eskaera aurkezteko epea 30 egun naturalekoa izango da, deialdia argitaratzen denetik aurrera zenbatzen hasita.

6.2  Eskabide-dokumentua prozedura honen bidez aurkeztuko da:

2024ko irailaren 11ko Universidad del País Vasco/Euskal Herriko Unibertsitatean bitarteko elektronikoekin funtzionatzeko eta jarduteko arautegiaren 5.1b) artikuluan adierazitakoaren arabera, Unibertsitatearekin harremanak bitarteko elektronikoen bidez izatera behartuta egongo dira, urriaren 1eko 39/2015 Legearen 14.2 artikuluan aipatzen diren norbanakoez gain, Unibertsitate-komunitateko kide diren pertsonak, UPV/EHUrekin egiten dituzten izapide eta jarduketetarako.

Horrela, bada, deialdi honetan eskaria epe barruan aurkeztu beharko duzu UPV/EHUko egoitza elektronikoaren bidez.

Egoitza elektronikoaren prozeduren eta zerbitzuen katalogoan prozedura espezifikorik ez dagoenez, eskaria erregistro elektroniko orokorraren bidez egin beharko duzu, “Eskatzen du” atalean, deialdiaren eta atal arduradunaren datuak zehaztuta: Gaituz 2026 deialdia – Gradu eta Eraldaketa Digitalerako Errektoreordetza. Horretarako, egoitza elektronikoan adierazita dauden identifikazio elektronikorako edozein sistema erabili ahal izango duzu, esaterako: BakQ, NAN elektronikoa, edo Diruaren eta Zerga Zigiluaren Fabrika Nazionalaren ziurtagiria (FNMT-CERES). Izenperen hodeiko ziurtagiri profesionala erabili nahi baduzu, “Ziurtagiri digitalak” aukeraren bidez, lehenago hodeiko txartel birtual profesionala instalatuta izan beharko duzu eta saioa hasi.

Bestalde, behar bezala egiaztatutako egoeretan, eskaria eta agiriak erregistro gaietan laguntzeko UPV/EHUko bulegoetan aurkeztu ahal izango dituzu. Euskarri ez-elektronikoan aurkeztutako agiriak digitalizatu egingo dira, administrazio espediente elektronikoan sartzeko. Aurkezten diren jatorrizko dokumentuak itzuliko egingo dizkizute, baldin eta arauren batek ez badu agintzen dokumentu horiek unibertsitateak zaindu beharrekoak direla edo ez bada nahitaezkoa objektuak edo dokumentuak digitalizatzeko aukerarik ematen ez duen berariazko euskarriren batean aurkeztu dela.

6.3. Eskatzaileak EHUko bi hizkuntza ofizialetako edozeinetan aurkez ditzake agiriak.

7.1. Irizpide hauen arabera ebaluatuko dira eskaerak:

• a) Jarduerak egiten duen ekarpenaren justifikazio arrazoitua irakaskuntzaren kalitatea hobetzeko, berrikuntzarako eta EHUren i3 estrategiarekin lerrokatzeko.

• b) DOCENTIAZeko ebaluazioa eta, hala badagokio, lortutako nota.

• c) ABIATU prestakuntza ikastaroan parte hartu izana.

• d) Irakaskuntza berrikuntzako proiektuetan parte hartu izana.

7.2. Eskaerak Gradu eta Eraldaketa Digitalerako errektoreordeak horretarako propio izendatutako batzorde tekniko batek balioztatuko ditu. Batzorde horrek eskaerak ukatu ahal izango ditu oinarrizko zientzia bermerik ez badute edo finantzatutako jardueraren eta irakaskuntza esparruaren artean harreman zuzenik ez badago. Horretarako, atzera botatzeko arrazoiak azaldu beharko ditu.

8.1. Kudeaketa organoak

UPV/EHUko Gradu eta Eraldaketa Digitalerako Errektoreordetzak kudeatuko du deialdi hau.

8.2. Ebazpena

Ebaluazio prozesu osoa amaitu ondoren, Ebazpen Batzordeak laguntzak adjudikatzeko proposamena helaraziko dio dagokion Errektoreordetzari.

Behin-behineko ebazpen baten bitartez, argitaratuko da SAE-HELAZ webgunean eskaera ukatuen, izapidetzeko onartuen eta dokumentazioa zuzendu behar duten eskarien zerrenda. Behin-behineko erabaki hori eskariak aurkezteko epea amaitu eta 30 egun balioduneko epean emango da.

• a) Interesdunak 10 eguneko epea izango du eskatu zaion dokumentazioa zuzentzeko. Epe horren amaierarako dokumentaziorik aurkeztu ez badu, eskatzaileak eskaeran atzera egin duela ulertuko da, Errektoreordetza eskudunak ebazpena eman ondoren.

• b) Eskabidea ebaluatzeko deialdian eskatutako daturen bat falta bada baino ez da zuzenduko.
  Beraz, eskaerak, ebaluatu ahal izateko, argi eta garbi jaso beharko ditu gertaerak, arrazoiak eta eskatzen dena, eta hori ezingo izango da gerora zuzendu.

• c) Laguntza jasoko duten eskatzaileen  eta laguntza ukatu zaien eskatzaileen behin betiko zerrenda deialdia egin duen Errektoreordetzaren ebazpen baten bidez argitaratuko da bere webgunean, dokumentazioa zuzentzeko epea amaitu eta 10  egun baliodunetan.

• d) Behin-behineko eta behin betiko ebazpen horien aurka berraztertze errekurtsoa aurkez dakioke erabakia eman duen organoari, hilabeteko epean, bat etorriz Administrazio Publikoen Administrazio Prozedura Erkideari buruzko urriaren 1eko 39/2015 legeak 123. artikuluan zehaztutakoarekin.

• e) Era berean, ebazpen horien aurka administrazioarekiko auzi errekurtsoa aurkez daiteke, bi hilabeteko epean, ebazpen hau jakinarazi eta hurrengo egunetik aurrera zenbatzen hasita.

9.1. Laguntza jarduera gauzatu ondoren ordainduko da, eskatzaileak jarduera egin izana egiaztatzeko dokumentuak eta gastuaren justifikazioa aurkeztu ondoren.

Dokumentazio hau UPV/EHUko egoitza elektronikoaren bidez helarazi behar da Gradu eta Eraldaketa Digitalerako Errektoreordetzara. Gainera, jatorrizko gastuen egiaztagiriak (fakturak, tiketak, etab.) postaz edo barneko postaz bidali beharko dira honako helbide honetara:

GRADU ETA ERALDAKETA DIGITALERAKO ERREKTOREORDETZA
Liburutegiko eraikina, 6. Solairua, 1. Postontzia
Sarriena auzoa, z/g
48940 Leioa (Bizkaia)

9.2. Jarduera egin izana egiaztatzeko dokumentazioari dagokionez, dokumentu hauek aurkeztu beharko dira, jarduera motaren arabera:

• a) Kongresuetako parte-hartzeengatik, hauek aurkeztu beharko dira:

  • i. Bertaratze agiria, egunak jasotzen dituena.

  • ii. Aurkeztutako komunikazioaren ziurtagiria.

  • iii. Dagokion lizentzia.

• b) Goi mailako irakaskuntzaren arloan hezkuntza berrikuntzarekin lotutako artikuluak argitaratzera bideratutako zerbitzuen kasuan, hauek aurkeztu beharko dira:

  • i. Itzulpen edo berrikuspen profesionalaren edo enpresaren ziurtagiria, hauek jasotzen dituena: itzulitako artikulua, hizkuntza, testuaren guztizko luzera (orrialde edo karaktere kopurua), eta abar.

  • ii. Itzulitako edo berrikusitako materialaren lehenengo eta azken orrialdeak, eta orrialde horiek itzulitako edo berrikusitako testuaren hasiera eta amaiera direla egiaztatzeko ziurtagiri bat.

• c) EHUk parte hartzen duen goi mailako irakaskuntzan hezkuntza berrikuntzarako proiektuen esparruan sortutako irakaskuntza materiala argitaratu bada, hauek aurkeztuko dira:

  • i. Unibertsitateko kide guztien esku irekian jarri izanaren ziurtagiria (ADDI gordailua).

  • ii. Dagokion enpresaren ziurtagiria, edukia egin izanari buruzkoa.

• d) Goi mailako irakaskuntzan hezkuntza eta berrikuntzako gaikuntza hobetzeko prestakuntza ikastaroetan parte hartu izanaren kasuan, hauek aurkeztu beharko dira:

  • i. Bertaratze ziurtagiria, ikastaro edo mintegiko antolatzaileak emandakoa, zein egunetan egin den jasotzen duena.

  • ii. Hala badagokio, dagokion lizentzia.

9.3. Eginiko gastuaren egiaztagiriei dagokienez, dokumentu hauek aurkeztu beharko dira:

• a) 1. eranskina behar bezala beteta. Horretan zehaztu beharko da gastuen xehakapena. Eta gastuak justifikatzeko dokumentu hauek aurkeztu beharko dira:

• b) Jatorrizko fakturak edo tiketak, eskatzailearen izenean, zerbitzua eman duen enpresak edo profesionalak emandakoak.

• c) Laguntzaren eskatzaileek eginiko ordainketen bankuko egiaztagiriak, beren izenean.

9.4. Ez da gasturik ordainduko hura justifikatzeko dokumenturik aurkezten ez bada.

9.5. Mantenuari, ostatuari eta bidaiari dagozkien tiket eta faktura guztiak banakakoak izan behar dira, eskatzailearen izenean egon behar dira eta eskatzailearen gastuak bakarrik agertu behar dira zehaztuta. Ez dira faktura edo tiket partekatuak onartuko, pertsona bati baino gehiagori dagozkien gastuak barne hartzen dituztenak. Horrenbestez:

• Ostatuari dagozkion fakturek argi eta garbi adierazi beharko dute ostatu hartutako pertsonen kopurua, baita egonaldiaren egun kopurua ere, sarrera- eta irteera-datekin.

• Garraiobideak erabiltzeagatik sortutako fakturek argi eta garbi adierazi beharko dituzte bidaiaren datak eta ibilbidea, jatorria eta helmuga adierazita. Hala badagokio, txartelak eta hegazkineratzeko txartelak eskatuko dira.

9.6. Ez da onartuko ibilgailuak alokatzeko egindako gasturik.

9.7. Ibilgailu partikularra erabiliz gero, egiaztagiri gisa aurkeztu beharko dira autobideko agiriak, baldin badaude, edo joan‑etorri horiek justifikatzen dituzten erregai kargak. Aitzitik, ordaindu daitezkeen gastuak kilometrajeari eta autobideko ordainagiriei dagozkienak dira.

9.8. Egindako ostatu eta mantenu gastuak bat etorriko dira EHUren barne arauketan ezarritakoarekin lekualdatzea hasteko unean indarrean dagoen zerbitzuagatiko kalte ordainen arloan; eta betiere, estatu mailan eta helmugako herrialde bakoitzean zehaztutako gehieneko balioak kontuan izanik.

Une honetan indarrean dagoen araudia hau da: http://www.ehu.eus/es/group/iip/zerbitzu-ordaine

9.9. Inola ere ez da fotokopiarik onartuko jatorrizko agiriak galtzeagatik.

9.10. Eginiko gastua justifikatzeko dokumentazioa gehienez 30 egun naturaleko epean bidali beharko da, jarduera amaitzen denetik aurrera zenbatzen hasita.

Abenduan zehar egiten diren jardueren kasuan, epe hori murriztu ahal izango da, unibertsitateak 2026ko aurrekontua ixteko emango duen aginduan adierazitako daten arabera.

10.1. Dirulaguntza emateko kontuan hartu diren baldintzak aldatzen badira, betiere dirulaguntzaren helburua bete dela ulerturik, eta, hala badagokio, beste erakunde publiko edo pribaturen aldetik dirulaguntzarik jasotzen badute GAITUZen eskatutako jarduera beraren kontzeptu bererako, horrek bere garaian dirulaguntza emateko onartutako ebazpena aldatuko duen ebazpena ekar dezake. Bertan, honako hau ezar daiteke:

• Jarduerari esleitutako aurrekontua murriztea.

• Eskatzaileak jasotako laguntza osoa edo zati bat itzultzea.

• Ebazpena dagokion administrazio prozedura egin ondoren emango da, Gradu eta Eraldaketa Digitalerako errektoreordeak proposatuta edo txostena eginik, eta indibidualki jakinaraziko zaio dirulaguntzaren titularrari.

10.2. Kasu hauetan ulertuko da dirulaguntza jasotzeko baldintzak aldatu direla:

• Laguntzaren titularrak bertaratzeari uko egiten dionean, hots, laguntzaren xedea betetzeari.

• Ekintza berbera egiteko beste iturri batetik heldutako dirulaguntza pilatzen denean, edo behar adina justifikatu gabe ekintza bera aurkezten zaionean beste erakunde edo zentro publiko nahiz pribatu batzuei dirulaguntza jasotzeko, aldez aurretik Gradu eta Eraldaketa Digitalerako Errektoreordetzari horren berri eman gabe.

• Deialdi honetako oinarriak, guztiak edo batzuk, modu larrian ez betetzea.

• Eskaeran datuak ezkutatu, aldatu edo moduren batera edo bestera manipulatzea.

• Gastu bera aurrekontuko atal organiko bati baino gehiagori egoztea.

10.3 Gerora sortutako arrazoiengatik eskatzaileak ezin izango balu azkenean laguntzaren xede den jarduera egin, ahalik eta arinen justifikatu beharko luke, gertatutakoa egiaztatzeko dokumentazioa aurkeztuta. Arauz kanpoko jardunik antzemanez gero, zehapenak jaso ahal izango dira hurrengo deialdiei begira, eta beste erantzukizun batzuk ere bai, hala badagokio.

Deialdi honetan jasota ez dagoen guztirako, Dirulaguntzei buruzko azaroaren 17ko 38/2003 Lege Orokorrean ezarritakoari jarraituko zaio, besteak beste, dirulaguntzak itzultzeari buruzko xedapenei eta arau-hauste eta zigorrei buruzko arauei.

Aurreko ondorioetarako, ulertuko da Dirulaguntzei buruzko Lege Orokorrean aipatzen diren beste administrazio batzuetako organo zehatzen inguruko aurreikuspenak eskumen baliokideak dituen unibertsitateko organoaz  (edo honen ahalik eta antzekoenak dituen organoaz) ari direla.

Deialdi honek amaiera ematen dio administrazio bideari, eta haren aurka administrazioarekiko auzi errekurtsoa jar daiteke Bilboko administrazio auzietako epaitegietan, bi hilabeteko epean, deialdia argitaratzen den egunetik aurrera zenbatzen hasita. Aurrekoa gorabehera, nahi izanez gero, berraztertze errekurtsoa aurkez dakioke Gradu eta Eraldaketa Digitalerako errektoreordeari, deialdia argitaratu eta hilabeteko epean, 39/2015 Legearen 123. artikuluarekin bat etorriz.

Deialdi hau SAE-HELAZen webgunean argitaratzen den egunean sartuko da indarrean.

Ezarritako arautegia indarrean egongo da harik eta egungoa ordeztuko duen hurrengo deialdia argitaratu arte.

Leioan, 2026ko otsailaren 27an

Urtza Garay Ruiz
Gradu eta Eraldaketa Digitalerako errektoreordea