Fuente: https://www.anaminecan.com/post/oraculo-delfos
Delphi teknika, asko erabilia aditu talde baten iritzi fidagarriak lortzeko, oraindik ez dauka teknika kuantitatiboetan erabiltzen diren antzeko kalitate adierazle kontsolidaturik. Jon Landetak eta Aitziber Lertxundik, Enpresa Institutua eta Berrikuntza eta Pertsonen Zuzendaritza Taldeko (UPV/EHU) irakasleek, kalitate adierazleen proposamen bat argitaratu dute, Futures & Foresight Science aldizkari zientifikoan azken aldian gehien irakurri den lanetako bat izan dena.
Delphi metodoa ikerketa sozialeko teknika bat da, aditu talde baten iritzi bateratu fidagarria lortu nahi duena. Talde komunikazioko prozesu eraginkor bat egituratzeko metodoa da, pertsona talde bati arazo konplexu bat elkarrekin heltzeko aukera ematen diona. Berrogeita hamarreko hamarkadan sortu zen helburu militarretarako Rand Corporation-en, eta bilakaera nabarmena izan du, baina kritikei aurre egin beharrean jarraitzen du, azterketen kalitatea ebaluatzeko zorroztasun ezagatik. Horregatik, oso garrantzitsua da Delphi azterlanen kalitatea ebaluatzeko adierazleak izatea. Ikerketa honen helburua da teknika horrekin egindako azterketen sinesgarritasuna ebaluatzeko aukera emango duten irizpideak garatzeko beharrari erantzutea. Horretarako, bere aplikazioa ebaluatzeko erabilitako irizpideak eta txostenetan jasotzeko gomendatutako elementuak aztertzen dituzte. Literaturaren berrikuspenari esker, adierazleak hiru arlotan planteatzeko beharra identifikatu ahal izan da:
- a) Adituen panelaren kalitatea: hainbat adierazle biltzen ditu, hala nola aditu kopurua, haien esperientzia eta adierazgarritasuna eta parte hartzeko duten motibazioa.
- b) Adituetatik informazio garrantzitsua lortzea: galderen argitasuna, testuinguru komun baten konfigurazioa eta informazioa biltzeko mekanismoen kalitatea.
- c) Adituen arteko elkarreraginaren kalitatea: trukatutako informazioaren kantitatea eta kalitatea, iritzia aldatzeko aukerak eta kanpoko baldintzen egonkortasuna azterketan zehar.
Ebaluatzeko eta ulertzeko errazak diren adierazleak dira eta Delphi azterlanen kalitatearen neurri objektiboa ematen dute. Delphi azterlanen txostenetan sartzeak teknikaren aplikazioaren kalitatea hobeto ulertzen lagunduko luke, bai ikertzaileentzat, bai irakurle ez espezializatuentzat. Era berean, adierazle kontsolidatuak izateak zorroztasun handiagoz lan egitera bultzatuko lituzke ikertzaileak, Delphi ikerketen batez besteko kalitatea hobetuz.
Ildo horretan aurrera egiteko asmoz, gaur egun bi irakasleak nazioarteko Delphi ikerketa egiten dabiltza teknika horretan mundu mailan ospe handieneko adituekin eta emaitzek teknika honen zorroztasuna eta sinesgarritasuna sendotzen lagunduko dutela espero dugu.
Informazio gehiago: Landeta, J., & Lertxundi, A. (2023). Quality indicators for Delphi studies. Futures & Foresight Science, 6, e172. https://doi.org/10.1002/ffo2.172
Deje una respuesta