Ikasle Bisitarientzako Hizkuntza Ikastaroen Arautegia

Atarikoa

Euskal Herriko Unibertsitateak (UPV/EHU), Euskara, Kultura eta Nazioartekotzearen arloko Errektoreordetzaren bidez, ikasle bisitarientzako hizkuntza ikastaroak eskaintzen dizkie mugikortasun programen bidez etorritako ikasleei, aukera izan dezaten gaztelania edo euskara ikasteko edo hobetzeko. Unibertsitateak esfortzu handi hau egin du ikasleoi behar diren tresna linguistiko eta kulturalak emateko, hartara gure unibertsitatean eta euskal gizartean egiten duten egonaldia ahalik eta emankorrena izan dadin.

Haien planteamenduagatik eta aitorpen akademikoagatik graduetan ematen diren gaien parean daude garrantziari dagokionez, nahiz eta haien ezaugarriengatik ezin diren sartu graduetako ikasketa planetan.  Hori dela eta, errektoreordetzak uste du funtsezkoa dela ikastarook egiten dituzten ikasleak ondo jabetzea haien garrantziaz, eta uneoro begirunez jokatzea matrikulazio prozesuei, eskolara joateari, irakasleei eta ikaskideei dagokienez, beste edozein irakasgaitan bezalaxe.

Sarbidea eta matrikula

Prezioa:

UPV/EHUko Euskara, Kultura eta Nazioartekotzearen arloko Errektoreordetzak kudeatutako truke programetako ikasleentzat: doan.

UPV/EHUko graduondoko programetan matrikulatutako nazioarteko ikasleentzat eta UPV/EHUk gonbidatutako irakasle edo ikertzaile bisitarientzat: 120 euro gaztelaniako ikastaro trinkoa eta 180  euro gaztelaniako edo euskarako ikasturte osoko ikastaro bakoitza.

UPV/EHUrekin loturarik ez daukaten ikasleek, goian aipatutako taldeetako pertsonen senideak barne, ezin izango dute honelako ikastarorik egin.

Sarbidea:

  • Ikastaroak lehen aldiz egiten dituztenek test bat egin beharko dute beren maila jakiteko, edo,  hutsetik hasi behar badira, zuzenean hasiko dira lehen mailan,  ikastaro bakoitzeko informazioan zehaztuko diren datetan. Matrikula ordainduta eduki arren ezinbestekoa izango da maila jakiteko testa egitea edo eskolara joatea zehaztutako datetan.
    Hasi aurretik, komeni da ikasleek begiratzea sarbide datak eta testen orduak.  

  • Maila batetik bestera pasatzea: ikastaro bat (trinkoa edo ikasturte osokoa) egin ondoren bigarrena pasatu nahi duten ikasleek ez dute testa egin beharko, egin duten lehen ikastaroaren ebaluazioak zehaztuko baitu haien maila. Alabaina, eskolara joan beharko dira dagokion datan.  Kontuan izan behar da maila bat gainditzeak ez duela bermatuko tokia izatea hurrengoan ikasleak ez badira eskolara azaltzen sarbide datan.

Matrikula:

Ez da onartuko entzulerik ikastaroetan. Beraz, interesa duten guztiek matrikula egin beharko dute horretarako ezarritako prozeduraren arabera, alde batera utzita beren unibertsitateetan kreditu horiek baliozkotuko zaizkien ala ez.

Kasu bakoitzean aurkeztu beharreko dokumentazioa web orriko «matrikula prozedura» izeneko atalean dago.

Ordutegi eta mailei buruzko oharrak

Datak eta ordutegiak:

Hemen aipatutako datak eta ordutegiak aldatu ahal izango dira campus bakoitzeko jai eta egutegi akademikoen arabera. Aldaketak orri honetan argitaratuko ditugu, guri jakinarazi bezain laster. Gauza bera ikasgela aldaketei dagokienez.

Mailak:

Maila aldaketa: badago malgutasunik mailaz aldatzeko. Ikaslea ados ez badago testaren emaitzarekin, irakasleei edo Hizkuntza Ikastaroen Bulegoko idazkaritzari esan ahalko die. Haiek kasu bakoitza aztertuko dute, sarbide testaren emaitzak edo ziurtagiri ofizialen bidez egiaztatutako maila kontuan hartuta. Azken erabakia Euskara, Kultura eta Nazioartekotzearen arloko Errektoreordetzak hartuko du, Hizkuntza Ikastaroen Bulegoaren bitartez.

Maila errepikatzea:

Kasu hauetan bakarrik errepikatu ahal izango da maila:

  • Ikastaro luzea suspenditu badu eta hurrengo lauhilekoan tokirik badago maila bereko ikastaro luzean.  
  • Ikasleak ikastaro trinkoa egin badu eta maila bera berriz egin gura badu udazkenean (ikastaro bien ezaugarri eta iraupen desberdinak direla eta).

Bestalde, bigarren ikastaroa ezin izango da izan egindako lehen ikastaroa baino maila apalagokoa.

Aipatutako aukerak ez dira automatikoak, hau da, kasu bakoitza bere aldetik aztertuko da, eta, beraz, errepikatu nahi duten ikasleak Ikastaroen Bulegoarekin jarri beharko dira harremanetan bere eskaria azter dezan.

Komeni da ikasleek aurretik planifikatzea zenbat ikastaro eta kreditutan matrikulatu nahi duten, ikasle bakoitzaren ardura izango delako ondo matrikulatzea. Horretarako, kontuan hartu beharko dute, adibidez,  lehen lauhilekoan gaztelaniako maila aurreratua egin eta gainditu arren, ezin izango dutela berriz maila bera egin bigarren lauhilekoan, eta gauza bera gertatuko da lehen lauhilekoan euskarako hasierako maila egin badute: izan ere, ez kasu batean ez bestean, bigarren lauhilekoan ez da eskaintzen goragoko mailako ikastarorik.  

Ebaluazioa, ziurtagiriak eta kredituak

Ebaluazioa eta kalifikazioa:

  • Eskolen % 85era joandako ikasleak:
    Ebaluazioa etengabea eta batutzailea izango da. Programetan zehaztutako atal guztiak baloratuko dira. Beharrezkoa izango da ikastaroa gainditzeko azterketetan ebaluatutako alderdi, zeregin, atal eta gaitasun guztiak gainditzea.

  • Eskolen % 85era joan ez diren ikasleak:
    Kalifikazioa, ikastaroan emandako eduki guztien azken azterketa eginez lortuko da. Ikastaroa gainditzeko, beharrezkoa izango da azterketaren atal guztietara aurkeztea eta bertan ebaluatzen diren atal eta gaitasun bakoitza gainditzea. 

Garrantzitsua da ikasleek kontuan hartzea ikastaro hauetan ez dagoela azterketen  bigarren deialdirik.

Ziurtagiria:

Ikastaro bakoitza amaitzean Euskal Herriko Unibertsitateak (UPV/EHU) BERTARATZE ETA APROBETXAMENDU ZIURTAGIRI bat emango die ebaluazioa gainditu duten ikasleei.  Ziurtagiria eskuratzeko, ezinbestekoa izango da ikasleek gainditzea matrikulatuta egon diren ikastaroa.  Ez da hori beste ziurtagiririk emango. 

Nahitaezkoa eta ezinbestekoa da ikastaroetan matrikulatuta egotea ziurtagiria lortzeko.

UPV/EHUk egindako ziurtagiriok ez dira titulu ofizialak: balio akademiko hutsa daukate.

Kredituak:

Ikastaro bakoitzaren ziurtagiriak zenbakizko nota bat edukiko du (5etik 10era), eta ikasleak trebetasun bakoitzean (entzumenean, irakurmenean, mintzamenean eta idazmenean) lortutako maila, Hizkuntzen Europako Erreferentzia Marko Bateratuaren arabera (A1-A2, B1-B2, C1-C2).  Era berean, ikastaro bakoitzaren kredituak adieraziko dira:

  • Gaztelaniako ikastaro trinkoa: 4,5 kreditu.
  • Udako eta udaberriko ikastaroak:
    • Gaztelaniako ikastaroak: 6 kreditu (bai udazkenekoa eta bai udaberrikoa).
    • Euskarako ikastaroak: 6 kreditu (bai udazkenekoa eta bai udaberrikoa).

Ebaluazioaren jakinarazpena eta ziurtagirien bidalketa

Ikastaro bakoitzaren emaitzak ikastegi bakoitzeko nazioarteko harremanen arduradunei bidaliko zaizkie ikasle bakoitzaren espediente akademikoan sar ditzaten, beharrezkoa izanez gero.

Era berean, arduradunoi ikasleen ziurtagiriak ere bidaliko zaizkie paperean, ikasleak euren bila joan daitezen, gero bakoitzak bere jatorrizko erakundean aurkezteko, lortu duen kalifikazioaren froga legez. Ikasleak ezin badira bulegoetara ziurtagirien bila joan, ikastegiek posta arruntez edo emailez bidaliko dituzte, espediente akademikoekin batera, ikasleen unibertsitateetara.

Bestelakoak

Materiala:

Ikasleek beren mailako programa espezifikoa jasoko dute ikastaro bakoitzaren hasieran. Gure web orritik ere deskarga daiteke.

Ikasleen ardura izango da eskolak ondo segitzeko behar dituzten gainerako materialak eskuratzea (adibidez, testuliburua).

Argazkiak eta ikus-entzunezkoak:

Baliteke jardueren argazkiak edo bestelako materialak egitea, eta gure web orrian argitaratzea. Halakoetan, baimena eskatuko zaie ikastaroan ikasleei.

Bestelakoak:

Ikastaroen idazkaritzak eskubidea izango du  arau hauek betetzen ez dituzten eta eskolan lan giroa aldrebesten duten ikasleak kanporatzeko. 

Era berean, ez da iruzurrik onartuko: azterketan kopiatzen duten ikasleak kanporatuak izango dira eta suspentsoa jasoko dute. Halakorik gertatzen bada, ikaslearen ikastegiko arduradunari esango zaio.