A sample text widget

Etiam pulvinar consectetur dolor sed malesuada. Ut convallis euismod dolor nec pretium. Nunc ut tristique massa.

Nam sodales mi vitae dolor ullamcorper et vulputate enim accumsan. Morbi orci magna, tincidunt vitae molestie nec, molestie at mi. Nulla nulla lorem, suscipit in posuere in, interdum non magna.

Ilusionista Sozialen Nazioarteko Mintegia, 2022ko urriaren 3an

NOIZ
2022, urriaren 3a

NON
Hezkuntza eta Kirol Fakultatea, Irakasletza eraikina (UPV/EHU)
Juan Ibáñez de Sto. Domingo k/ 1 (Gasteiz)

GELA
3. mintegia (3M), 1. solairua

EGITARAUA
10:30-12:30 Unibertsitatea, zientzia eta komunitatea

  • Programa “Ciencia y Sociedad”  de la UNAM (México años 70). Sinaí Rivera Martínez.
  • “Serviço Cívico Estudantil” Michel Giacomettiren proposamena Portugalgo Iraultzaren ostean. Ainhoa Ezeiza.
  • Debatea

17:30-20:00 Hezkuntza eta komunitatea

  • Altzako ahozko historiak ikas-materialak sortzeko. Nahia Delgado de Frutos.
  • Educación Común en Iztapalapa (Ciudad de México). Sinaí Rivera Martínez.
  • Debatea

SARRERA LIBRE ETA DOAKOA
Ez da beharrezkoa saio guztietara etortzea. Etortzen zaren saioen bertaratze egiaztagiria eska dezakezu.

HARREMANETARAKO
ainhoa.ezeiza@ehu.eus

+INFO
www.ehu.eus/ism

ISM2022 kartela

AURKEZPENA

Gure ikertaldean hilabete hauetan Sinaí Rivera Martínez ikertzaile mexikarraren bisita dugula aprobetxatuz, jardunaldi hauetan bere hiru ikergunetan sakonduko dugu: unibertsitatea, hezkuntza eta komunitatea.

Alde batetik, unibertsitatea eta zientziaren garapena loturik daudelarik, eztabaida proposatzen dugu unibertsitatearen alderdi kritikoen inguruan. Horretarako, atzera begirada egingo dugu eta bi esperientzia unibertsitarioren inguruan hitz egingo dugu:

  • Programa Ciencia y Sociedad” izeneko programa sortu zuen taldea, Mexikoko Unibertsitate Nazional Autonomoan 70. hamarkadan. Sinaí Rivera ikertzailea tesia horren inguruan garatzen ari da, eta talde honek zientziaren ikuspegi kritikoa sustatu zuen, garai hartako krisi politiko, sozial, ekonomiko eta ekologikoaren aurrean.
  • Portugalgo Klabelinen Iraultzaren ostean (1974ko apirilaren 25ean), besteak beste “ikasle brigadak” antolatu zituzten, unibertsitatearen demokratizazio masiboari erantzuteko eta unibertsitatea “herriarekin” lotzeko. Bereziki interesatzen zaizkigu Michel Giacometti ikertzaileak tutorizatutako brigadak, jakintza herrikoiekin topatzean (talka egitean) gertatutakoaz sakontzeko. Gezurra badirudi ere, oso gutxi dakigu Portugalgo iraultza horren eta ondorengoen inguruan.

Beste aldetik, ohikoak dira hezkuntza eta komunitatea elkarlotu behar direlako diskurtsoak, baina gutxitan planteatzen da eraikitze kolektiboaren ikuspegitik. Eskola eta hezkuntza zentrifugoaren ideian sakontzen laguntzeko bi esperientzia hauek aurkeztuko ditugu:

  • Donostiako Altza auzoan ahozko historiak landu dira, komunitate dinamizazioa sustatzeko. Ahozko historia horietan oinarrituz, ikas-material digitalak sortu ditu Nahia Delgado de Frutos ikertzaileak, jakintza herrikoien hezkuntza-balioa azpimarratzeko. Bere tesi doktoralaren nondik norakoak argituko dizkigu eta, batez ere, ikas-materialen adibideak erakutsiko ditu.
  • Aldi berean, Mexiko Hiriko Iztapalapa kolonian, UACM unibertsitateko EDCO (Educación Común) taldeak komunitateko beste ikasgune batzuekin elkarturik, hainbat ekimen gauzatu ditu, bizikidetza dinamizatzeko. Horietako batzuetan hartu du parte Sinaí Rivera Martínez ikertzaileak, eta saio honetan horietako zenbait azalduko dizkigu.

 

HIZLARIEI BURUZ

SINAÍ RIVERA MARTÍNEZ Mexikoko CINVESTAV- IPN (Instituto Politécnico Nacional) ikerketa-zentruko doktoregoko ikaslea da. Universidad Pública Nacional (UPN) unibertsitateko irakasle izandakoa, askotariko proiektu eta mugimenduetan hartu du parte: UACMko EDCO (Educación Común, lehenago LaTicFM), UNISUR Hegoaldeko Herrien Unibertsitateko irakaslea, Mujeres y la Sexta mugimendua, eta abar.

NAHIA DELGADO DE FRUTOS Euskal Herriko Unibertsitateko Psikodidaktika doktoregoko ikaslea da, Didaktika eta Eskola Antolakuntza Sailean, tesia defendatzear duelarik. Horrez gain, Globernance Gobernantza Demokratikoaren Institutuko ikertzailea da. UPV/EHUko irakasle izandakoa, Berrikuntza Didaktiko-metodologikoko Proiektuen Garapena eta Kudeaketa Hezkuntza Erakundeetan Unibertsitate Masterra du eta ikas-materialgintza digitalean hainbat esperientzia gauzatu ditu, Gipuzkoako Foru Aldundiarekin lankidetzan, besteak beste.

AINHOA EZEIZA ISM ikerketa eta formakzio taldeko ikertzaile nagusia da. Psikodidaktikan doktore, UPV/EHUko Hizkuntzaren eta Literaturaren Didaktika Saileko irakasle-ikertzaile agregatua da Hezkuntza eta Kirol Fakultatean. Esperientzia luzea du irakasleen formakzioan, bai unibertsitatean, bai bestelako esparruetan. Hainbat ikerketa-proiektutan lan egin ostean, gaur egungo lan-lerro nagusia jakintza herrikoiak eta ezagutza zientifikoa elkarlotzeari lotutakoa da, bai ikuspegi komunikatibotik, bai hezitzailetik abiatuta.

Jakinmin. Filosofia saioak haurrekin Gasteizen

Haurrekin filosofia lantzeak aurreiritzi asko gainditzen laguntzen du, uste dugun baino pentsamendu sakonagoak eraiki baititzakete. Gainera, hizkuntza eta kognizioaren garapena sustatzen du nabarmen. Horregatik, saio hauen berri emateaz gain, animatzen zaituztet parte hartzera.

Honela dio iragarkiak:

Bizitzak, munduak eta unibertsoak hainbat gai misteriotsu gordeak dituzte.

Haiei buruzko galderak egin al dizkiozu noizbait zure buruari? Lagun talde batekin zure iritzia partekatu nahi duzu? Besteena entzun? Elkarrizketa batean zure ideiak azaltzeko prest?

Denok detektibe, ikerlari eta esatari!

Pentsatzea baliagarria bezain dibertigarria delako.

Anima zaitez zu ere!

Jakinmin. Filosofia saioak haurrekin

Ekimen ederra izateaz gain, oso baliagarria deritzogu haurren ulermena, arrazoitzeko trebetasuna eta munduan ekiteko gaitasuna lantzeko.

Euskaraz egingo dira hilabetean behin, eta saio guztietara edo banaka apuntatzeko aukera dago helbide honetara idatziz: ccuinfantil@araba.eus

Saioak urtarrilean hasi baziren ere, hurrengoetan parte hartzera animatzen zaituztegu, hau da:

  • Martxoak 11
  • Apirilak 8
  • Maiatzak 13

Gasteizko Ignacio Aldecoa Kultura Etxean (Floridan) egingo dira, Haur eta Gazte Sailean, eta bi taldetan banatuko dira haurrak: 6-8 urte artekoak 3. gelan eta 9-12 urtekoak, berriz, 2. gelan.

Esteka honetan duzu informazioa: https://web.araba.eus/eu/-/jakinmin-filosofia-saioak

 

 

Paulo Freireri ikasturte honetan egin diogun omenaldi xumearen xehetasunak

ABIAPUNTUA

2021 urtean zehar, hainbat ekitaldi antolatu dira Paulo Freire pedagogo eta filosofoaren jaiotzaren 100. urteurrena ospatzeko, eta pentsatu nuen gure fakultatean ere urteurren honek sona eduki behar zuela, gure xumetasunean.

Inspirazio iturri nagusia Almeriako Unibertsitateko Teresa García Gómezen gonbitea izan zen, 2021eko martxo aldera Freireren kontzeptuak azalduko zituen liburu batean parte hartzea proposatu zigunean Javier Encina eta bioi. Lan horretarako, bi sarrera prestatu genituen: “Extensión cultural” eta “Comunicación“. Liburuak testu labur eta xumeak bildu nahi izan ditu, Freireren praxira erraz hurbiltzeko tresna gisa. Hauxe liburua:

García Gómez, Teresa (argit.) (2021). Palabras y pedagogías desde Paulo Freire. La Muralla.

Liburuan parte hartzea aitzakia bikaina izan zen Freireren lanak berrirakurtzeko, baita bere biografia arakatzeko ere.

IRAKASGAIA

Baina natorren harira. EHUko Gasteizko Hezkuntza eta Kirol Fakultatean, Lehen Hezkuntzako graduko 1. mailako ikasleekin Komunikazio Gaitasunaren Garapena -euskara eta gaztelania- Lehen Hezkuntzan I irakasgaia ematen dut, fakultateko hiru taldeetan, eta irakasgaiaren helburu nagusia “alfabetatze akademiko-zientifikoa” deritzona da: testu akademiko-zientifikoen bilaketa, iragazpena, irakurketa, sintesia, debatea eta erreferentzia-erak lantzea, alegia. “Alfabetatze” horren esanahia gehienetan inbasio kulturala izaten da, ikasleek modu akritikoan onartu behar baitituzte Unibertsitatearen era diskurtsiboak (ondorengo aurkezpenean azaltzen da laburki).


Sakontzeko:

Ezeiza, Ainhoa & Encina, Javier (2019). Zientziaren jabegabetzea, etika eta haurrei lotutako ikerketa. In A. Ezeiza eta J. Encina (koord.), Educación sin propiedad (separata, 2. argit) (35-64. orr.). ISM eta UNILCO-espacio nómada. Hemen eskuragarri: https://labur.eus/UxeWB

Horrela, Freireri omenaldia egiteak testu akademiko-zientifikoak jorratzeko aukera eskaintzeaz gain, ikasleengan kritikotasuna sustatzen lagundu digu, bai hezkuntzaren inguruan, baita Zientziaren eta Unibertsitatearen aurrean ere.

Kontua ez da ikasleak Zientziaren “aurka” kokaraztea, inolaz ere. Kontua da ikasleek zientzia eraikitzeko moduak ulertzea, bestelako jakintzetatik desberdintzea eta egiantzekotasunaren amarrutan ez erortzea, hau da, pentsatzea inportanteena “itxura zientifikoa” ematea dela (APA arauak aplikatzea, adibidez, nahiz eta iturria pobrea izan; edo testu batetik esaldi bat testuingurutik kanpo erabiltzea, autoreen proposamenaren kontra ere, baina, hori bai, dena oso ondo erreferentziatua; edo unibertsitateko irakasle batek idatzitako testua bada, automatikoki ontzat ematea; edo edozein ikerketa ona dela pentsatzea, ikerketa-metodoen inguruan hausnartu gabe, edo ikerketaren etika aztertu gabe…).

Hemen, irakasgaiko bideo gehiago ikus ditzakezu, irakasgaiaren zenbait ideia hobeto ulertzeko (irudian klikatuz ikusiko duzu):

https://youtu.be/Br9ZESelgLY

 

EGINDAKO LANKETA

Irakasgaian, aurretik beste gai batzuk landu ditugu: kultura eta kulturak, Zientzia eta Hezkuntza Zientziak, albiste faltsuak eta egiantzekotasuna, komunikazio antsietatea… Ikasleek, hainbat testu irakurri eta ahoz eztabaidatu ostean, euren ikuspegiak foro birtualean idatzi dituzte, eta horrela, erreferentzia bibliografikoak erabiltzera hurbiltzen hasi dira.

Horrez gain, hainbat saiotan, ikasleek euren proposamenak gauzatu dituzte, ahozkotasuna lantzeko helburuz. Saio hauek elkar ezagutzeko eta jarduera akademikoen loturetatik askatzeko erabili ditugu, giza-beharrak asebetetzeko modu gisa (Manfred Max-Neef-en adieran).

Irakasgaiaren erdi aldera, urriaren bigarren hamabostaldian, FREIRE GOGOAN proiektua aurkeztu diet. Proiektuaren jomuga poster erakusketa bat egitea izan da. Hauek izan dira proiektuaren elementuak:

  1. Paulo Freireren gaztaroko testuinguru geopolitiko soziala aurkeztu. Hau ahoz egin genuen eta Brasil eta Txileko garaiak komentatu genituen, informalki. Hori bai, express formatuan 😉
    • Brasilgo krisia, mugimendu kristauak, helduen alfabetatzea, Brasilgo diktadura, Txileko gobernu demokristaua, Aurrerapenerako Aliantza eta J.F. Kennedy, Komunismoaren indarra, Kuba, askapenerako teologia, Allenderen garaipena eta hilketa…
  2. Artikulu honen laburpen akademiko-zientifikoa idatzi (laburpen edo “errezentsioen” egitura erabiliz):
    • Cabaluz, F. & Areyuna-Ibarra, B. (2020). La ruta de Paulo Freire en Chile (1964-1969): alfabetización popular e influencias del marxismo heterodoxo. Revista Colombiana de Educación, 1(80), 291-312. https://doi.org/10.17227/rce.num80-11066
  3. Liburu honen erreseina argitaratu, foro birtualean, eta klasean komentatu:
  4. Poster-taldeak libreki sortu, 5-8 kide artekoak (handi samarrak egin behar dira, poster erakusketan txandaka antolatzeko).
  5. Gai-banaketa: talde bakoitzak gai bat hautatu du, gaiak gela guztien artean banaturik. Hauek dira hautatutako kontzeptuak:
    • Hitz eta gai eragileak (Arceluz, 2006)
    • Itxaropenaren pedagogia (Ibáñez Luque, 2021)
    • Galderaren pedagogia (Castaño Villar, 2021)
    • Zapalduaren antzerkia (de Vicente Hernando, 2021)
    • Kontzientzia kritikoa (Díez-Gutiérrez, 2021)
    • Autonomiaren pedagogia (Freire, 1999)
    • Komunikazioa (Ezeiza & Encina, 2021)
    • Kontzientizazioa (Díez-Gutiérrez, 2021)
    • Elkarrizketa (Mayor Paredes, 2021)
    • Hitzaren irakurketa (Teixeira Maldonado, Quintão de Almeida & Moreno Doña, 2021)
    • Utopia (Ibáñez Luque, 2021)
    • Praxia (Escaño, 2021)
    • Hezkuntza askatzailea (Granjero Andújar, 2021)

    Iturri bibliografiko hauetan oinarritu gara, kontzeptuetan murgiltzeko:

    Ikusten den bezala, gehien erabili dugun iturria azken liburua izan da (García Gómez, 2021), testuak ulergarriak eta laburrak izanik, ikasleek oso ondo maneiatu dituztelarik. Kontzeptuen ideia bera liburu honetatik hartua da, eta oso-oso lagungarria egin zaigu lana antolatzeko eta Freireren lana hobeto ezagutzeko. Izan ere, ikasleek hasieran uste zuten Freireren biografiaren poster bat egin beharko zutela, antzeko lana egina zutelako beste irakasgai batean, baina biografian zentratu izan bagina, hagiografiak aterako ziren eta Wikipediaren antzerako edukien kopiaitsatsia. Aldiz, kontzeptuak landuta, talde bakoitzaren lana elkarren artean konpartitzeak zentzu handiagoa hartuko zuen, eta, aldi berean, kontzeptu batean zentratzeak lan sakonagoa egiteko aukera zabaltzen zuen.

  6. Talde bakoitzak, kontzeptu bakoitzari lotutako testu bat landu du, denbora laburrean (3 ordu, gutxi gorabehera): testua irakurri, ulertu, taldean komentatu, posterra irudikatu eta sortu, Canva erabiliz (tresna ikasleek hautatua izan da, baina talde guztietan tresna bera erabili dute, seguruenik erraza delako maneiatzen eta kalitate oneko posterrak egin daitezkeelako).
  7. Posterrak A4 formatuan inprimatu ditugu, koloretan, eta talde bakoitzak berrikusketa sakona egin die, bai testuak ondo-ondo birpasatzeko (errorerik egon ez zedin), bai estetikoki azken doikuntzak egiteko (kolore konbinazioak, espazioak eta hutsuneak…). Azken bertsioa A1 posterretan inprimatuko zenez, erroreak oso handi ikusiko zirela ohartarazi nien, eta horrek formari arreta berezia jartzea sustatu zuen.
  8. Posterra nola azaldu prestatu dute.

POSTER ERAKUSKETA: PAULO FREIRE GOGOAN

Erakusketa, blog honetan bertan iragarri genuen bezala, abenduaren 7an izan zen, arratsaldez. Egun hori erabili genuen gure fakultatean ez zegoelako hainbeste jende, eta pandemia zela eta, nahiago genuen talde txikietan sakabanaturik egotea, jende pilaketak saihesteko. Horrez gain, poster erakusketa zaratatsua izaten da, azalpenak korridoreetan egiten direlako eta pertsona asko aritzen direlako han-hemenka. Datak zenbait tentsi0 eragin bazizkigun ere (badirudi hainbat ikaslek ez zutela etortzeko asmorik… hori ez da horren harritzekoa, bestalde, baina tira), ikasleek oso ondo erantzun zuten.

Momentu ederrenetako bat hasiera izan zen. Ikasleek beren posterra A1 formatuan ikusteak poza eta harrotasuna eragin zuen, eta beren posterra zeinen polita zen komentatzen hasi ziren. Ondoren, talde bakoitza bitan banatu zen, eta denbora eman nuen posterrez poster ibiltzeko, talde erdiak azalpenak eman bitartean. Bi gune nagusitan aritu ginen, eta argazkietan erakusten den moduan (anonimotasunagatik eraldatutako argazkiak), distantzia pandemikoak errespetatzen aritu ginen.

Gimnasioko posterrak

 

Korridorean

Gimnasioan

Giro ederrean aritu ginen. Oso pozgarria izan zen ikasleek zeinen gustura azaldu zuten euren posterra, behin eta berriz. Lehen itzulien ostean, aldaketa egin genuen eta beste talde-erdia geratu zen posterrean, azalpenak ematen.

Hasieran dinamika arraroa egin bazitzaien ere, askatasunez aritu ziren baina, era berean, posterrek eskaintzen duen gertutasunari esker, galderak eta iruzkinak egin zituzten. Gainera, post-it batzuk utzi nituen, posterretan komentarioak idazteko, eta ugari izan ziren idatzitako iruzkinak, gehienak interesgarriak, atseginak eta lagungarriak.

Hona posterrei amaieran egindako argazkia:

Eta hona ikaskideen arteko feedbackarekin bildutako post-it-etako batzuk:

Hau da saio amaieran, posterrak jasotakoan, grabatu nuen bideoa, posterren eta iruzkinen ideia bat jasotzeko (egin klik irudian edo estekan, bideoa ikusteko):

https://www.youtube.com/watch?v=r2ZmynRDUpA

Ikasleengan eragina izan zuen saio honek, izan ere, irakasgaiaren amaiera aldera egin genuen hausnarketan gehienek aipatu zuten saio hau. Lanketa hau guztia sakontasunez egin genuen? Ba, zintzoki, uste dut ez genuela asko-asko sakondu, egin genituen jarduerak denbora labur samarrean egin genuelako. Hala ere, Freireren lanera hurbiltzeko baliagarria izateaz gain, hurbilpen horretan beren interpretazioak egin ahal izan dituzte, eta zenbait kasutan atxikipena sentitu dute Freireren lanarekiko.

Horrekin batera, komunikazio gaitasun akademikoa lantzeko proiektu ona izan dela esango nuke, idatzizkoaren ulermena, ahozkoaren ulermena, idazmena (laburpen eta erreseina akademikoen kontzeptuetara hurbilduz) eta ahozkoaren adierazpen akademikoa landu dugu, gertutasunez, enpatiaz eta modu esanguratsuan.

 

KULTUR INBASIOA ETA MUTISMO KULTURALA

Egindako lanketan, nabarmena izan da ikasle gutxi-gutxik dutela Latinoamerikako mugimendu sozial eta politikoen berri, Kubatik aparte; aldiz, denek dute JFKren inguruko erreferentziarik, nahiz eta erreferentzia horretan ez duten erlazionatu komunismoaren aurkako borrokarekin edo Aurrerapenerako Aliantzaren planarekin. Bestalde, Espainiar estatuan demokrata-kristauak PPn edo, gure kasuan, EAJn integraturik daudenez, oso gutxik kokatu dute orientazio politiko hau. Zer esanik ez, askapenerako teologiaren inguruko ezagutza falta. Freireren ibilbidea ulertzeko, uste dut ezinbestekoa dela testuinguru soziopolitikora hurbiltzea, bestela ezin da ondo ulertu zergatik proposatu zuen zapalduaren pedagogia.

Bestalde, bi kontzeptu izan dira ikasleen arreta gehien bereganatu dutenak, hedapena vs. komunikazioaren inguruko Freireren liburuaren irakurketaren ostean: kultur inbasioa eta mutismo kulturala.

Mutismo kulturalarekin berehalako atxikipena sentitu dute, horrela sentitzen baitira askotan. Freirek planteatu zuen bezala, jende guztiak du zeresana, nahiz eta bere hitzetan esan “ez dutela ezer esateko” eta, ondorioz, teknikariek, hedatzaileek edo irakasleek hori erabili ezjakintzat jotzeko. Bi arrazoi nagusi daude mutismoaren eraketan: gutxiespena eta errepresioa. Hitza hartzen duzunero esaten duzuna txorakeria dela entzunez gero, edo zure hitzak zure kontra jotzeko erabiliz gero (dela eskolan kalifikazio eskasa lortzeko, dela gizartean, zigor gogorrak jasateko), ixiltzea ohitura bihurtzen da, eta ohitura hori ondorengoei helarazten zaie. Azkenean, ez da erraza gogoratzea zergatik ixiltzen garen. Nabarmena da errepresioak ixilarazi duela Gerra Zibila nozitutako jende asko eta asko.

Geurera ekarriz, egoera ez hain gogorrean, jakina, ikasleek txikitatik ikasten dute ezin dela hitz egin edozein unetan, ezin direla zenbait kontu kritikatu edo zalantzan jarri, eta botererik gabekoen hitzek ez duela baliorik. Hori ondo ikasita eta barneratuta dagoenean, orduan irakasleak hitz egiteko eskatzen die ikasleei, hitza hartzeko… eta hitza hartzen ez dutenez, esaten zaie “ez dutela parte hartu nahi” edo “ez dutela interesik gaian”; ondorioz, hitz egiteko sistema koertzitiboa antolatzen da: parte hartzeagatik sariak, parte ez hartzeagatik negatiboak…

Baina ikasleen benetako partaidetza sustatuko bada, arazoaren iturrira jo behar da eta ikasleen autoestimua landu, ikasleen jakintzak balioetsiz eta eztabaidatuz, konfiantzazko ingurune batean. Hau ez da egun batetik bestera egiten, prozesu bat da eta prozesu hori pertsona batzuentzat oso azkarra bada ere, beste pertsona batzuek denbora gehiago behar izaten dute. Normala, ez dira fidatzen edo ez dakite nola hartu hitza. Horregatik, Freirek planteatzen duen bezala, komunikazioa da giltza, eta komunikazioa soilik da komunikazio egiturak horizontalduz gero. Freirek planteatu zuen komunikazioa (hau da, benetako komunikazioa) maitasun-ekintza dela, ez “ikasleak maitatzen dituzulako” (new age joera neoliberalek proposatzen duten moduan), baizik eta komunikaziora maitasunez irekitzen garelako, errespetuz eta goxotasunez, kritikoki jokatuz baina ez ikasleen hitzak suntsituz eta beti irakaslearenak gaineratuz.

Mutismo kulturalaren kontzeptuaz hitz egitea asko estimatu zuten ikasle gehientsuenek, beren egoera hobeto ulertzeko eta irakasle direnean ere, komunikazioaren garrantziaz jabetzeko.

Inbasio kulturalaren kontzeptua, aldiz, konplexuagoa izan da eztabaidatzeko eta hausnartzeko. Eskolak etengabe egiten duen zerbait izanik, hobeto landu dugu jakintza herrikoien balioaz eztabaidatuz. Freirek oso ondo seinalatu zuen pedagogia inbaditzaileak direla nagusi eta, ondorioz, kolonizazioa edo neokolonialismoa ari ginela (ari garela) sustatzen. Gaur egun, hau are nabarmenagoa da, globalizazioak homogeneizazio prozesu kolonialista nabarmena ezarri duelako. Horregatik, globalizazioaren kolonizazioari aurre egiteko nazionalismoetara jotzea ez da izango erantzuna, masa-kulturaren eta kultura instituzionalaren (instituzionalizatuaren eta, askotan, folklorizatuaren) oposizioa eragiten duelako, gazteak masa-kulturaren eta lokalismoen ezpaten artean erabakitzeko eskatuz. Zentzu horretan, Freirek proposatzen du elkarrizketa eraikitzaileak aktibatzea, jakintzak elkarlotzea eta lantzea, beti “ikasle irakaslearen” ideietatik abiatuz (hitz eta gai eragileen laguntzaz, adibidez), “ikasle irakaslearen” emanzipaziorako baldintzak landuz eta “irakasle ikaslearen” sentsibilitatez (guk jabegabetze edo “desempoderamiento” hitza gehituko genuke hau azaltzeko).

Arreta pedagogikoa, hortaz, harreman-moduetan jarri behar da, edukiak bigarren mailara pasaz. Bestela, inportanteena “transmititu beharreko edukiak” badira eta tresna pedagogikoak “pilulari azukrea gehitzea” bada, hau da, ardatza transmisioa bada, kolonizatzen segiko dugu eta jendearen jakintzak suntsitzen jarraituko dugu, jendea ixilaraziz.

 

ESKERTZAK

Eskerrak eman nahi dizkiet lankideei, poster erakusketa egiteko eman dizkidaten erraztasunengatik. Dekanotzari eta bereziki Igor Caminori, posterrak jartzeko panelak eskuratzeko egindako ahaleginagatik (oso lanpetuta bazegoen ere). Administrazioko langileei, Arantza eta Junkali batez ere, panelekin emandako laguntzagatik. Fakultateko garbitzaileei, beren lana oztopatu badugu ere, atseginez lagundu digutelako.

Eta, jakina, Lehen Hezkuntzako graduko 1. mailako ikasleei, oso energia onean lan egiteagatik eta lan-giro bikaina sustatzeagatik.

 

 

PAULO FREIRE GOGOAN poster erakusketa, abenduak 7

Datorren asteartean, ABENDUAK 7, Paulo Freireri omenaldi xume bat egingo diogu Lehen Hezkuntzako graduko 1. mailako ikasleok, bere jaiotzaren 100. urteurrena ospatzeko:

PAULO FREIRE GOGOAN. POSTER ERAKUSKETA.

  • NON: UPV/EHUko Hezkuntza eta Kirol Fakultateko Hezkuntza eraikinean (Juan Ibáñez de Sto. Domingo k/, 1, Vitoria-Gasteiz). Beheko korridorean eta gimnasioan.
  • NOIZ: ABENDUAK 7, 16:00-19:00

 

Izan ere, pedagogo brasildar honen ekarpenak funtsezkoak dira gaur egungo hezkuntza proposamenak ulertzeko, eta ikastolen mugimenduan ere eragin handia izan zuen. Horrez gain, ezin dugu aipatu gabe utzi ikertzeko ikuspegi soziopraxikoaren lehen sustatzaileetako bat izan zela, ikerketa ekintza parte-hartzaileari bidea ireki ziotelarik. Garrantzi handikotzat jo dugu bere zenbait lan gaur egungo begietatik irakurtzea.

Omenaldi honetan, Paulo Freireren lanean gako izan diren hainbat kontzeptu hautatu ditugu, bakoitzarekin poster bat egiteko, talde-lanean. Hauek dira hautatutako kontzeptuak:

Hitz eta gai eragileak
Itxaropenaren pedagogia
Galderaren pedagogia
Zanpatuaren antzerkia
Kontzientzia kritikoa
Autonomiaren pedagogia
Komunikazioa
Kontzientizazioa
Elkarrizketa
Hitzaren irakurketa
Utopia
Praxia
Hezkuntza askatzailea

Iturri bibliografiko hauetan oinarritu gara, Freire hobeto ezagutu eta kontzeptuetan murgiltzeko:

  • Arceluz, W. (2006). Universo vocabular y praxis freireana en intervenciones sobre analfabetismo funcional. Revista Iberoamericana de Educación, 38(3), 1-6. https://rieoei.org/historico/deloslectores/1235Arceluz.pdf
  • Cabaluz, F. & Areyuna-Ibarra, B. (2020). La ruta de Paulo Freire en Chile (1964-1969): alfabetización popular e influencias del marxismo heterodoxo. Revista Colombiana de Educación, 1(80), 291-312. https://doi.org/10.17227/rce.num80-11066
  • Freire, P. (1984). ¿Extensión o comunicación? La concientización en el medio rural (13ª ed. en español). Siglo XXI.
  • Freire, P. (1999). Autonomiaren pedagogia. Ikastaria, 10, 9-71. https://core.ac.uk/download/pdf/11502009.pdf
  • García Gómez, T. (argit.). Palabras y pedagogías desde Paulo Freire. La Muralla.

Erakusketa-egunean, posterren autoreek azalpen labur bat emango dute egokitutako kontzeptuaren inguruan, erakusketa bisitatzen duten pertsonak talde txikitan elkarturik, distantzia-neurriak zaintzeko.

Erakusketa arratsaldeko 16:00etan hasiko da, eta posterrak 19:00ak arte egongo dira erakusgai.

Gonbidatuta zaudete ekitaldi honetan parte hartzera!

 

Euskal Soziolinguistika Jardunaldia, 2021eko azaroaren 11n

Aurtengo azaroaren 11n, Iruñeko Baluarten, Euskal Soziolinguistika Jardunaldia egingo da, Soziolinguistika Klusterrak antolaturik. Aurtengo gai nagusia migrazioak eta harrera linguistikoa da, oso bizi dagoen debate baten aurrean hausnarketak, ikerketak eta esperientziak partekatzeko helburuz.

Honela aurkeztu du jardunaldia beren webguneak:

Ez da berria gure artean immigrazioaren fenomenoa. Labur esatearren, XX. mendearen hasieratik, eskualdearen arabera ezaugarri desberdinekin, gizarteko egitura demografikoan aldaketa sakonak eragin ditu euskararen lurraldean. Milurtekoaren aldaketarekin, alabaina, Espainiako eta Frantziako estatuetatik kanpo jatorria duen immigrazioa nabarmenki handitzen ari da, eta adierazle guztiek erakusten dute bizi dugun COVID19 osasun-krisia behin gaindituz gero, are eta gehiago haziko dela.

Kontuan izan behar da, gainera, gaur egungo immigrazioko biztanleriak inoiz baino ezaugarri desberdinagoak dituela, bai jatorri-estatuei dagokionean, baita kultura zein hizkuntza desberdinei dagokionean ere. Jakina, horrekin batera azaleratzen ari diren egoera sozial, ekonomiko eta politikoak ere askotarikoak dira. Beraz, aurreikusi gabeko konplexutasuna kudeatzea ezinbestekoa izango da euskararen biziberritze-prozesuan gizarteak aurrera egin dezan eta kulturen eta hizkuntzen arteko errespetuan eraikitako gizarte kohesionatua bideratu dadin.

2021eko Euskal Soziolinguistika Jardunaldian erronka horri arrakastaz erantzuteko gakoak identifikatzeko saiakera egingo da. Horretarako gaia ikuspegi desberdinetatik lantzen duten pertsonak elkar topatzea eta solastea erraztuko da. Egoeraren deskribapena egiten duten ikerketak, erakunde publikoetatik eta hezkuntza-komunitateetatik martxan dauden egitasmoak ezagutzeko aukera eskainiko da eta aditu zein arituen arteko iritzi trukerako guneak bideratuko dira.

EGITARAUA

09:15 Antolatzaileen agurra · Nafarroako Gobernua. Euskarabidea
· Eusko Jaurlaritza.HPS
· Soziolinguistika Klusterra
09:30 Jatorri atzerritarreko herritarrak Euskal Herrian: kokapen deskriptiboa Hitzaldia · Arkaitz Fullaondo (Ikuspegi Behatokia)- EAE
· Orreaga Azcona (Migrazio Politiken Zuzendaritza Nagusiko Karibu Zerbitzua. Nafarroako Gobernua)- NFK
· Eguzki Urteaga (UPV/EHU)- Ipar Euskal Herria
10:30 Hizkuntza-aniztasuna: bizipenak eta jarrerak Hitzaldia · Belen Uranga (Soziolinguistika Klusterra) eta Xabier Aierdi
11:30 Atsedenaldia
12:00 Eskola testuinguruko errealitatea eta esperientziakAurkezpenak (45’) eta eztabaida parte hartzailea (30’) · Amelia Barquin (Mondragon Unib. HUHEZI)
· Biotza Piko (Eusko Jaurlaritza. Hezkuntza Saila)
13:15 Herri eta komunitate mailako errealitatea eta esperientziakAurkezpenak (45’) eta eztabaida parte hartzailea (30’) · Alex Vadillo eta Elena Urzelai (Gasteizko Udala)
· Arkaitz Fullaondo (Ikuspegi Behatokia)
· Urko Ikardo (Bortzirietako Euskara Zerbitzua)
14:30 Bazkalordua
15:30 Kataluniako kasua: esperientziak, ekimenak eta politikak Hitzaldia Eunice Romero (Migrazio, Babes eta Antiarrazismo Zuzendari Nagusia.  Generalitat de Catalunya)
16:30 Aurrera begirako erronkak eta proposamenak Mahai-ingurua ·  Xabier Aierdi
·  Virginia Eraso (Migrazio Politiken Zuzendaritza Nagusiko Karibu Zerbitzua. Nafarroako Gobernua)
·  Eunice Romero (Migrazio, Babes eta Antiarrazismo Zuzendaritza Nagusia. Kataluniako Generalitatea)
17:30 Egunaren errepasoa eta itxiera

INFORMAZIO GEHIAGO ETA IZENA EMATEKO:

https://soziolinguistika.eus/eu/zabalpena/euskal-soziolinguistika-jardunaldiak/2020-2/

Haur eta Gazte Literatura eta Garapen Iraunkorrerako Helburuak, 2021eko urriaren 20tik 22ra

Urriaren 20tik 22ra, Bilboko Hezkuntza Fakultatean kongresu interesgarri hau egingo da. Hizlari bikainak elkartuko dira eta oso gai interesgarriak landuko dituzte. Kongresua online izango da baina modu sinkronikoan, hau da, zuzenean segituko dira aurkezpenak, eta horrela hizlariekin elkarreraginean aritu ahal izango da.

Honela dio kongresuko webguneak, bere aurkezpenean:

Garapen Iraunkorrak bermatu nahi du gizaki guztiek beren potentziala gara dezatela, duintasunez eta berdintasunez, ingurumen osasungarrian eta ongizatea sustatuz. Horretarako, Nazio Batuen Erakundeak Garapen Iraunkorrerako 2030 Agendan 17 helburu jaso zituen (NBE, 2015). Helburu horiek defendatzen dute, besteak beste, kalitatezko hezkuntza inklusiboa bultzatzea, genero-berdintasuna lortzea eta emakume nahiz neskato guztiak ahalduntzea, ingurugiroaren babesa, desberdintasunak murriztea edo gizarte baketsuak eta inklusiboak sustatzea.

Bestalde, hizkuntza literarioa testutik kanpo dagoen errealitatea ulertzeko baliagarria da: literaturak, ikuspuntu estetiko eta ideologikotik, elkarrizketa sozialak betikotzen ditu, edota zalantzan jartzen, eta, hain zuzen ere horregatik, berebizikoa da haurren eta gazteen kontzientzia kritikoaren garapenean. Hori dela eta, azkenaldian balio sozialak (ekologia, genero-berdintasuna, kultur aniztasuna, etab.) sustatzen dituzten obra literarioen argitalpenek gora egin dute eta, haiekin batera, testu literarioen balio didaktikoaren erabilerak.

Kongresu honetan Haur eta Gazte Literaturaren (HGL) eta Garapen Iraunkorrerako Helburuen (GIH) arteko konbinazioari buruzko eztabaida-foroa sortu nahi dugu. Izan ere jarrerak eta ohiturak aldatzeko bide onenetako bat da hezkuntza, haurtzaroa baita haurrak sentsibilizatzeko eta kontzientziatzeko adin tarterik egokiena.

 

Informazio osoa eta izenematea: https://www.ehu.eus/eu/web/hgl-lij/home.

 

Educação, Memória e Práxis Nazioarteko Mintegia, EDCOren partaidetzarekin, irailak 16

Irailaren 2tik 29ra bitartean, Hezkuntza, Oroimena eta Praxia izeneko online mintegia garatzen ari da, Seminário Internacional: Educação, Memória e Práxis.

Bertan, Paulo Freireren (1921-2021) jaiotzaren 100. urteurrena gogoratu nahi izan da, Antonio Gramsciren (1891-2021) 130. urteurrena eta Universidade Federal de Viçosaren Hezkuntza Sailaren eta aldaketa soziala eta ikaskuntza emantzipatorioa sustatzeko RED sare latinoamerikarraren arteko hitzarmenaren urtebetetzea (2020-2021)

Ondorengo estekan, programa osoa ikus daiteke eta izena eman (doakoa):

https://educacaomaterialista.wordpress.com/seminario-internacional-educacao-memoria-e-praxis/

Webinarrak Educação Materialista-ren Youtubeko kanalean ematen ari dira: https://www.youtube.com/c/educacaomaterialista

ISM taldekide den EDCO (Espacio de Educación Común) ikerketa-taldekideek beren esperientziak partekatuko dituzte Mexikotik, 2. Webinarrean, ostegunean, irailak 16, Mexikoko 11:00etan (Brasilgo 13:00etan, Estatu espainiar penintsularrean 18:00etan).

Gure kide Sinaí Rivera Martínez eta Emiliano Urteaga Uríasek hartuko dute parte. Ez galdu aukera paregabe hau!

ISM2021 Nazioarteko Topaketa Birtuala, abuztuak 4-5

2014an Ilusionista Sozialen Mintegia eratu zenetik, urtero-urtero antolatu ditugu jardunaldiak, topaketak eta ikastaroak (2020. urtean izan ezik). Ohitura on hori berreskuratuko dugu aurten, abuztuaren 4 eta 5ean.

Azken bi urteetan, proiektu interesgarriak ezagutu ditugu eta informalki ideiak trukatzen aritu gara. Topaketa birtual hau baliatu nahi dugu proiektu horietan eta beste zenbaitetan dabiltzan pertsonak harremanetan jarri eta esperientziak trukatzeko, elkarrekin eta elkarrengandik ikasten jarraitzeko.

Saio digitalak antolatzeak zurruntasun edo egitura pixka bat izatea eskatzen digu. Guretzat, politena litzateke jan-edanaren inguruan elkartu, berriketa ederra egin eta orduak bizikidetzan ematea, baina digitalki egiteari esker, munduko leku desberdinetan gauden pertsonak elkartzeko aukera izango dugu. Egongo dira aurrez aurrekotasunerako aukerak aurrerago ere!

Bi gai nagusi jorratuko ditugu: hezkuntza eta dinamizazio komunitarioa. Bi kasuetan, uneotan garatzen ari diren esperientzietatik abiatuko gara, bertan parte hartzen duten ahotik entzunda.

 

 

ISM2021 DATAK, ORDUA ETA SAIOAK

Saioak 18:00etatik 21:00etara izango dira (UTC+2) (Mexiko: 11:00. Argentina: 13:00. Kanariar Uharteak: 17:00).

  • Abuztuak 4, asteazkena.

Haur eta gazteekin hezkuntza-eremuan lan egiten dugunean, zalantza handiak sortzen zaizkigu askatasuna, kultura, jakintzak, harremanak, bizikidetza, sormena eta aisia nola elkarlotu planteatzen dugunean, kultur inbaditzaile izan gabe. Teorian, gauzak nahiko argi ditugu: antiautoritarismoa, elkarren arteko laguntza, elkar zaintza (zaintza horizontalak), konfiantzazko harremanak, eguneroko bizitzaren autogestio kolektiboa, autoestimu pertsonala/taldearena/kolektiboa… Baina egunerokotasunean, oztopo ugari gainditu behar ditugu: burokratikoak, finantzei lotutakoak, presio soziala, gure geure aurreiritziak eta mugak, hezkuntzak berez ezartzen dituen botere-harremanak… Egoeren konplexutasuna kontuan hartuta, saiatuko gara gure kontraesanei nola egiten diegun aurre argitzen eta sakontzen.

Saio honetan, hasierako aurkezpenaren ostean, aurkezpen hauek izango ditugu:

Experiencias de la Escuela Libre de Enseñanza (ELE) de Los Solares (República Dominicana). Guille, Juanín eta Lucía, ELEko maisu-maistrak.

ELE eskola libre proiektu bat da, Errepublika Dominikanako Los Solares herrian kokatua. Uneotan, 4-16 urte arteko 70 haur daude apuntatuta. Inguruko beharrei erantzun nahian, gizartetxe gisa ere funtzionatzen du, horrela, bizilagunek hezkuntza proiektuan parte hartzen dute eta bestelako jarduerak ere egiten dituzte. Gehiago jakiteko: https://escuelalibredeensenanza.org/

Fanzine ZERO en una escuela de educación infantil. Aitziber Arruabarrena (Gasteiz, Euskal Herria)

Esperientzia hau, Gradu Amaierako Lan gisa garatu da, Gasteizko Ramon Bajo eskola publikoan. Auzo honetan, autogestioari lotutako auzo-mugimendu indartsuak daude eta eskolan ere, kulturartekotasuna lantzeko eta bazterkeria gainditzeko hainbat ekimen gauzatu dira. Proiektu honetan, gurasoen, haurren eta eskolako langileen partehartzea sustatu da arte alternatiboaren laguntzaz, fanzine digital eta paperezko bat eratzeko.

Entretejer con la palabra colectiva. Sinaí Rivera Martínez (Mexiko Hiria).

Aurkezpen honetan, hainbat esperientzia elkarlotuko dira: haur hezkuntzako eskoletako maistrekin egindako formazio-lana, emakumeen josketa kolektiboaren garrantzia, eskola iraultzeko egindako hainbat esperientzia… bai Mexiko Hirian eta bai inguruko beste hainbat lekutan. Mujeres y la Sexta mugimenduko hainbat ekimenen berri ere argituko dira, besteak beste, “El mal llamado tren maya” ipuin kolektiboaren sorkuntza prozesuaz hainbat zertzelada emango dizkigu Sinaík.

La fotografía como recurso en las clases de Lengua y Literatura: otras historias por y para contar. Virginia Noelí Barré (Rosario, Argentina).

“Kale argazkia” deritzonaren bitartez, kanon/kontrakanon aurkaritza gainditu nahirik, esperientzia hau gauzatu da derrigorrezko bigarren hezkuntzaren 1. mailako ikasleekin. Narratiben kontura sortzen diren borroka dualistak gainditu eta normalean lantzen ez diren gaiak jorratu dituzte, artearen laguntzaz, ikasleei hitza emanez eta sormenaren dibergentziak ematen duen askatasuna baliaturik.

Lau aurkezpenen ostean, hezkuntzaren alderdi zehatzen inguruko solasa zabalduko dugu, esperientzien laguntzaz, eta nahi duenak hartu ahal izango du hitza, esperientziak gehiago sakontzeko, ideiak trukatzeko edo sortutako oztopoen aurrean izandako bizipenak eta hausnarketak sustatzeko.

Moderatzailea: Ainhoa Ezeiza

 

  • Abuztuak 5, osteguna.

Saio honetan, dinamizazio komunitarioan jarriko dugu arreta nagusia, eta hezkuntza eraikitze kolektiboarekin egongo da nagusiki loturik. Komunitatean lan egiten dugunean, posizio etiko argia izan behar dugu, jendea gure helburuetarako erabilia izan ez dadin. Jendearekin eta jendearengandik lan egin behar dugu, jendea subjektu gisa onartuz eta banakako subjektutik subjektu kolektiborantz joz, eguneroko bizitzaren autogestio kolektiboa dinamizatuz. Esperientzietatik abiatuko gara, konplexutasunez eta konplexutasunetik lan egiteko moduen inguruan solasteko.

Saioaren hasieran, aurkezpen orokorraren ostean, aurkezpen hauek izango ditugu:

La construcción colectiva del conocimiento comunitario a través de las historias orales para la creación de materiales didácticos digitales. Nahia Delgado de Frutos (Donostia, Euskal Herria).

Proiektu honetan, ahozko historiak bildu dira Donostiako Altza auzoan komunitatea dinamizatzen laguntzeko, eta historia horietatik abiatuz hainbat ikas-material sortu dira, Altzako ikastetxeetan erabiltzeko. Ahozko historiak zer diren jakiteko, webgune honetara jo dezakezu: https://historiasorales.org/

Participación con niñxs en contexto de migración (“primera/ segunda generación”): Construyendo espacios comunes en la infancia. Stephan Moore (Berlin, Alemania).

“Kinderclub Bellermannstr.” proiektuan, 6 eta 13 urte arteko haurrekin batera espazio bat eraiki nahi da kolektiboki, Berlingo Gesundbrunnen auzoan. Bertan, gentrifikazio eta espazioen pribatizazio prozesuak estatuaren burokraziarekin aliatu dira, eta haurren erresistentzia funtsezkoa da, kaleen okupazioari eutsiz. Hala ere, gero eta debeku eta muga handiagoak daude, haurrak zokoratzeko, nagusiki migratzailez osatutako auzo honetan. Proiektuan, haurren arteko harremanak dinamizatzen dira, espazio hau aniztasunez eraikitzeko, eta, era berean, matxismoaz, genero-rolez, arrazakeriaz, bortizkeria fisikoaz, jazarpenaz, kontsumismoaz, ingurumenaz… hausnarketa sustatzeko.

Andanzas, ayuda mutua y construcción colectiva en la EDCO, Espacio de Educación Común: Investigación y creación comunitaria. Emiliano Urteaga eta Emilia Negrete (Mexiko Hiria).

Askotariko esperientziak garatu dituzte UACM Mexiko Hiriko Unibertsitate Autonomoan, lehenik LaTICfm laborategian eta berriki EDCO ikerketa eta sortze gunean, besteak beste Lomas de Zaragozako ahozko historiekin egindako dinamizazio komunitarioa, osasun eta jakintzen ehuntzeari lotuta Ixcali jatetxe komunitarioan egindako lana, eta beste hainbat. Aurkezpen honetan, prozesu hauen inguruko hausnarketa eskainiko digute.

San Diego, haciendo memoria al andar. Un barrio con memoria. San Diego auzoko bizilagunak (Sevilla, Andaluzia).

Sevillako San Diego auzoaren memoria kolektiboa aitzakia gisa hartuta, gertaera historikoak idealizatu gabe, proiektu honetan, auzokideen arteko harremanak sustatu nahi izan dira, autoestimu indibidual, taldekakoa eta kolektiboa landuz, sortzen ari diren kontraesanak eztabaidatuz eta auzoa biziberritzeko bide berriak topatuz, eraikitze kolektiboaren bitartez. Prozesu honetan sortutako bizipenak eta hausnarketak partekatuko dizkigute bertako bi bizilagunek. Proiektu honetan bildutako ikus-entzunezkoak eta bestelako materialak webgune honetan daude ikusgai: https://archive.org/details/san-diego-memorias-de-la-periferia-urbana-sevilla-espana

Moderatzailea: Javier Encina

DINAMIKA

Topaketa birtualak egitura hauxe izango du:

  • Proiektu bakoitzeko kideek aurkezpen labur bat egingo dute, 10-15 minutu ingurukoa.
  • Proiektuaren inguruan ideia, zalantza, kezka edo zirikatzeko galderaren bat proposatuko dute, hizketa abiatzeko.
  • Saioan parte hartzen duen edonork hitz egin ahal izango du (edo txat bidez idatzi), saioa amaitu arte. Txandak moderatzaileak antolatuko ditu.

Egun bakoitzean bloke bat egingo dugu. Aurkezleak eta izenburuak izan bezain laster, hemen argitaratuko ditugu. Horrez gain, proiektu bakoitzaren inguruko testu labur bat ere gehituko dugu, orientabide gisa.

HIZKUNTZA

Saioak gaztelaniaz izango dira.

TRESNA DIGITALA

Topaketa online izango da, sarbide librean eta doan. Nahi duzun denboran edo tartean har dezakezu parte.

Euskal Herriko Unibertsitateak instalaturik duen Blackboard Collaborate plataforma erabiliko dugu. Bere abantaila nagusia da ez dela beharrezkoa eposta bidezko identifikaziorik eta ez dela ezer instalatu behar. Estekan sartuta nahikoa da saioan sartzeko. “Defektuz” mikroa eta kamera itzalita izango duzu saioan sartzean, eta klikatzen ez baduzu, ez da aktibatuko.

Horrez gain, saioa grabatzeko aukera ematen du. Hala ere, soilik aurkezpenak grabatuko ditugu (hizlariak baimena ematen badu), horrela libreki hitz egin ahal izango dugu, grabazioaren beldurrik izan gabe!

Hau da topaketan sartzeko esteka (eguna iritsi arte ez da eskuragarri egongo): https://bit.ly/3kUyLIc

EGIAZTAGIRIAK

Soilik gai edo proiektu bat aurkezten duten pertsonek jasoko dute egiaztagiria. Ez da bertaratze agiririk emango.

HARREMANETARAKO

Gai bat proposatu nahi baduzu, informazio gehiago behar baduzu edo edozein zalantza argitzeko, idatzi eposta honetara: ainhoa.ezeiza@ehu.eus

Ahozko historien inguruko ikerketa-artikulua

Hilabeteen arrapaladan, ahaztua nuen blog honetan aipatzea 2020an argitaratutako artikulu bat, ahozko historien inguruan. Hauxe da artikulua, deskarga librean:

Encina, J., Ezeiza, A., & Delgado de Frutos, N. (2020). Historias orales como herramienta para la convivencialidad. Revista Latinoamericana Estudios De La Paz Y El Conflicto, 1(2), 13 – 38. https://doi.org/10.5377/rlpc.v1i2.9828

Ikerketa ugaritan erabiltzen dira ahozko iturriak. Horietariko hainbat epistemologikotzat jotzen dituzte, beste hainbatentzat metodologikoak dira, eta beste zenbaitentzat teknika edo tresnak. Artikulu honetan, jendearekin eta jendearengandik 25 urtetan zehar garatutako hamaika ikerketa-proiekturen arteko alderaketa egin dugu, horietarik seitan ahozko historiekin lan egin dugu eta bostetan ez. Artikuluaren hasieran, gure ikuspegi epistemologikoa argitu dugu eta ahozko historien tresna bizi-historiekin eta ahozko historiarekin kontrastatu dugu.

Alderaketen emaitza gisa, ondorioztatu dugu zein garrantzitsua den ulertzea dispositibo eta tresna hauek ez direla kaltegabeak. Ahozko historien tresna dinamizazio komunitariorako baliagarria da soil-soilik komunitate horren une eta egoerarako egokia bada, hau da, ez dira ahozko historiak bildu behar ikertzaileak tresna hau erabiltzea gustuko duelako, edo beste proiektu batzuetan funtzionatu dutelako, baizik eta gauden komunitatearen egokiera ondo aztertu ostean. Ez dugu jendea ikuskizun bilakatu behar, ezta erabili ere sistemak legitimatzeko (adibidez, bake-prozesu instituzional bat abiatu delako).

Azkenik, hainbat hausnarketa gehitu ditugu kultura herrikoien eta dinamizazio komunitarioaren inguruan.

Parte hartzeko deia: Ahozkotasuna dinamizatzen hezkuntza erakundeetan [PROIEKTUA]

Gure ikerketa-taldean (ISM-UPV/EHU) proiektu bat prestatzen ari gara 2021-2022 ikasturterako, hezkuntza-erakundeetan ahozkotasuna dinamizatzeko, eta parte hartu nahi duten irakasle, ikertzaile, eragile edota ikastetxeak gonbidatu nahi ditugu, bide hau gurekin batera ibiltzeko.

PROIEKTUAREN POSTERRA

Proiektuaren zirriborro osoa irakurri gabe, poster honetan begiratu arin bat eman diezaiokezu proiektuari (HEMEN KLIKATUZ irudia hobeto ikusiko duzu eta deskargatu ahal izango duzu).

KEZKA

Kezka honetatik abiatzen gara:

Lehen Hezkuntzan nerabezarorantz hurbildu ahala, euskararen erabilera harreman informaletan jaitsiz doa, eta Bigarren Hezkuntzan zailtasun nabarmenak ditugu euskara irakasle-ikasle harremanetik kanpo erabiltzeko (atsedenean, pasiloetan, talde-lanetan…). Zailtasun hau Unibertsitatean ere sentitzen dugu.

Gure pertzepzioa da ezinbestekoa dela euskara harreman moduetan berkokatzea, eremu akademikoa erdigune izatetik ingurune informaletarantz dezentratzera eta kulturartekotasunean dinamizatzea.

Proiektu honen asmoa da hezkuntza-maila desberdinen esperientziak konektatzea, printzipio komun batzuetatik abiatuta, gunean guneko berezitasunak kontuan hartuz eta autonomiaz eta interdependentziaz lan eginez.

 

PROIEKTUAREN LEHEN ZIRRIBORROA

Proiektuaren lehen zirriborroari begiratu bat eman nahi badiozu, ESTEKA HONETAN irakur dezakezu.

Proiektuaren azalpena, bideo formatuan: https://youtu.be/JFdxAdrt9ek

 

EPEA

2021eko irailean hasi nahi dugunok, maiatzean abiatu behar dugu etika batzordearen prozedura (gizakiekin lan egiteko edozein proiektuk unibertsitatearen etika batzordearen baiezko txostena behar du).

Horregatik, parte hartzeko interesik baduzu, MAIATZAREN 10ERAKO eposta bat idaztea eskatuko dizugu, argibideak emateko eta parte hartzeko moduen inguruan eztabaidatzeko: ainhoa.ezeiza@ehu.eus

Mezua idazteak EZ DU INPLIKATZEN parte hartuko duzu(e)nik. Ulertzen dugu erabakia hartu aurretik, hainbat alderdi komentatu eta argitu behar direla.

Ez duzu itxaron behar epea amaitu arte. Nahi duzunean jar zaitezke harremanetan nirekin, gauzak komentatzeko edo argitzeko.