Adimen Artifizialaren erabileran jabetza intelektuala eta copyright-a

Unibertsitatean Adimen Artifizial sortzailea erabiltzean, jabetza intelektuala eta egile-eskubideak uneoro errespetatu behar dira.

Ez da onargarria kanpoko IA tresnetan copyright-ak babestutako testuak, irudiak, taulak, aurkezpenak, artikuluak, irakaskuntza-materialak, ikerketa-datuak edo bestelako edukiak sartzea, horretarako baimenik, lizentziarik edo oinarri juridikorik ez badago.

Horregatik, material propioak, baliabide instituzionalak eta lizentzia irekidun edukiak (adibidez, Creative Commons) lehenestea gomendatzen da, betiere dagokion aitortza eginez. Eduki bat IA bidez sortu, moldatu edo eraldatu izanak ez du jabetza intelektualaren arloko indarreko araudia betetzeko betebeharra ezabatzen.

Oro har, IA tresnek sortutako edukiak ez dira gizakiak sortutako lanen moduan egile-eskubideek babestutako obrak izaten. Hala ere, eduki horien berrerabilera baldintzatuta egon daiteke bai erabilitako tresnaren baldintza eta politikengatik, bai aurrez babestutako lanekin izan dezaketen antzekotasunagatik. Ondorioz, sortutako edukien erabileraren ardura juridiko eta akademikoa beti pertsona erabiltzaileari dagokio.

Kontuan hartu behar da IA tresnek itxuraz sinesgarriak diren baina lehendik dauden materialen antzekoak izan daitezkeen emaitzak sor ditzaketela. Horregatik, ezinbestekoa da edukiak berrikusi, egiaztatu eta, hala badagokio, modu kritikoan egokitzea, material akademikoetan, irakaskuntza-edukietan edo komunikazio instituzionaletan erabili aurretik.